Душанбелик Мадина Мамажонова исмли ёш аёл 70 кундан бери комада қолмоқда. Шифокорларга кўра, унинг миясининг бир қисми жиддий шикастланган. Мадинанинг аёвсиз калтаклангани ҳақидаги хабар жамиятда катта резонанс чиқарган эди. Асосий гумондорнинг амнистия қўллаб, ҳибсдан бўшатилиши норозиликни янада кучайтирди. Президентнинг ўғли аралашганидан сўнггина жиноят ишини қайтадан қўзғатишди.
“Беморнинг аҳволини ярим йилгача кузатамиз”
Мадина ётган “Шифобахш” касалхонаси реаниматолог врачи Озодликнинг тожик хизматига беморнинг аҳволи келгусида қандай бўлишини олдиндан чамалаш имконсизлигини айтди. “Инсон мияси кислород етишмовчилигидан жиддий зарарланиши учун атиги уч дақиқа кифоя. Мадинада худди шундай бўлган, деб ўйлайман”, дейди шифокор.
Исми сир тутилишини хоҳлаган яна бир врач Мадина касалхонага 26 август куни жуда оғир аҳволда келтирилганини, қарийб 70 кундан бери комада эканини билдирди. Унга кўра, врачлар консилиумида беморни ярим йилгача кузатишга қарор қилинган. “Аммо эртага нима бўлишини ҳеч ким билмайди, бу фақат Худога аён”, дейди Озодлик суҳбатдоши.
Уни нега калтаклаб, чалажон қилишди?
Мадина Мамажонова ҳақида жуда оз нарса маълум. У 32 ёшда, мобил алоқа ширкатларидан бирида ишлаган.
Воқеа жорий йилнинг 25 августида рўй берган. Ижтимоий тармоқда аёл у учрашиб юрадиган эркакнинг хотини томонидан олиб қочилиб, шафқатсиз калтаклангани ҳақида хабар қилинган. Кейинроқ Мадинани унинг ҳамкасби Лутфулло Давлатовнинг хотини Азиза Давлатова рашк туфайли калтаклагани маълум бўлди. Айрим маълумотларда Мадина Лутфулло Давлатовнинг иккинчи хотини сифатида тилга олинмоқда.
Лутфулла Давлатов Мадинанинг калтаклашда иштирок этганми, йўқми – ҳозирча мавҳум бўлиб турибди.
Ижтимоий тармоқлар гумонланувчиларга “одам ўғирлаш” моддаси бўйича ҳам айблов эълон қилиш лозимлиги, чунки Мадина Душанбедан куч билан олиб кетилиб, бир неча соат шаҳардан ташқарида сақлангани ҳақида баҳс қилишмоқда. Азиза Давлатова буни бир ёки бир неча одам кўмагида қилган бўлиши эҳтимоли ҳақиқатга яқинроқ, аммо ишга доир маълумотларда бошқа исмлар тилга олинганича йўқ.
Асосий гумондор – Азиза Давлатова аввал ҳибсга олиниб, кейинроқ амнистия қилиниши ва қамоқдан бўшатилиши тожик жамиятида кескин норозилик уйғотди. Жамоатчилик фаоллари Душанбе ҳокими, Бош прокурор ва ички ишлар вазири номига мурожаатнома ёзиб, ижтимоий тармоқларда эълон қилганидан сўнггина ҳуқуқ идоралари ҳаракатга келди.
Маълум бўлишича, Душанбе мэри Рустам Эмомали Бош прокуратура ва ИИВга ушбу резонансли воқеани қайта бошдан тергов қилишга кўрсатма берган.
