ISW: Путин янги йирик ҳужумга тайёрланмоқда
Путин ташаббусни қўлга олишга умид қилмоқда ва Америка урушни ўрганиш институтининг янги ҳисоботига кўра, 2023 йилнинг феврал ёки март ойларида бошланиши мумкин бўлган йирик янги ҳужумга тайёрланмоқда.
Кремл инсайдерларининг "Блоомберг"га айтишича, Путин Россиянинг оғир ҳарбий йўқотишлар, муваффақиятсизликларга қарамай, узоқ муддатда урушда ғалаба қозонишига ишончи комил.
Институт прогнозларига кўра, Кремл яқин олти ой ичида йирик стратегик операцияларга тайёргарлик кўриши мумкин - катта эҳтимол билан Луганск вилоятида.
ЕИ вазирлари Россияни ҳарбий жиноятлари учун жавобгарликка тортиш масаласини муҳокама қилди
Европа Иттифоқи адлия вазирлари Стокголмда йиғилиб, Россияни Украинада содир этган жиноятлари учун жавобгарликка тортиш йўлларини муҳокама қилди.
Вазирлар 24 февралда Россиянинг Украинага тўлиқ миқёсдаги ҳужумининг бир йиллиги олдидан учрашдилар.
Европа Иттифоқи Москва тез жавобгарликка тортилишини истайди, гарчи улар қандай қилиб жиноий иш қўзғатиш борасидаги мунозарада усуллар бўйича турлича бўлишса ҳам.
Вазирлар ҳарбий жиноятлар бўйича далиллар тўплаш, шунингдек, Москванинг тажовузкорлигини жиноий жавобгарликка тортиш учун янги халқаро трибунал тузишни муҳокама қилишди.
"Украинада содир этилган уруш жиноятлари учун жавобгарликни таъминлаш президентлик фаолиятимиз учун устувор вазифадир. Бу, шубҳасиз, мураккаб масала, аммо уни амалга ошириш учун ушбу суд ҳамкорлиги жуда муҳим", - Швеция Адлия вазири Гуннар Строммер.
Европа Иттифоқи Адлия комиссари Дидье Рейндерс ўз навбатида: "Биз бу жиноятлар жазосиз қолмаслигини таъминлашимиз керак. Айбдорлар ўз қилмишлари учун жавобгарликка тортилади ва Европа Иттифоқи ва Комиссия бундай жараёнда етакчи рол ўйнашни истайди", - деб таъкидлади.
Голландияда 2014 йил июлида Украина шарқида парвоз қилган MH17 йўловчи лайнерининг уриб туширилиши бўйича жиноий иш қўзғатувчи махсус суд қарор чиқариши учун 2022 йилнинг ноябригача вақт керак бўлди.
Суд уч кишини бу жиноятда айблаб, умрбод қамоқ жазосига ҳукм қилди. Уриб туширилган учоқ бортидаги 298 кишининг барчаси ҳалок бўлганди.
Россиянинг босқини оқибатида минглаб тинч аҳоли ҳалок бўлди, юзлаб шаҳар вайронага айланди. Бирлашган Миллатлар Ташкилотига кўра, Украинанинг фуқаролик инфратузилмасига, жумладан энергетика объектларига ҳужумлар уруш жинояти бўлиши мумкин.
Украинада "махсус ҳарбий операция" ўтказаётганини айтаётган Москва тинч аҳолига атайлаб ҳужум қилганини ёки бошқа ҳарбий жиноятларни содир этганини рад этади.
Зеленский: Жабҳада вазият ўта кескин
Украина кучлари шарқдаги бир неча қайноқ нуқталарда рус қўшинлари билан шиддатли жанглар олиб бормоқда. Ғарб Киевга замонавий танклар етказиб бериши ҳақида хабарлар ўртага чиқаётган бир пайтда Россия шошилинч равишда жабҳада босимни кучайтирмоқда.
Президент Владимир Зеленский жума оқшомида қилган видеомурожаатида Донецк вилоятида вазият “ўта кескин” эканини таъкидлади. У ерда Донецк вилояти жануби-ғарбидаги Угледар ва шимоли-шарқидаги Бахмут шаҳарлари учун қақшатгич жанглар кетаётганини айтди.
Россия артиллериясининг тинимсиз бомбардимонлари оқибатида бу шаҳарлар вайрон бўлган.
Зеленский тунги видеомурожаатида Украинага Россиянинг кучайиб бораётган босимига қарши курашиш учун зудлик билан кўпроқ қуролга эҳтиёж борлигини айтди.
"Жабҳада ва айниқса Донецк вилоятида, Бахмут ва Угледар яқинида вазият ўта кескинлигича қолмоқда. Босқинчилар бизнинг позицияларимизга шунчаки бостириб киришмаяпти, улар ўз атрофидаги шаҳар ва қишлоқларни артиллерия, ҳаводан атайлаб ва тизимли тарзда вайрон қилмоқда. Россия армиясини фақат куч билан тўхтатиш мумкин. Донецк вилоятида шаҳарларимизни ҳимоя қилаётган жангчиларимиз ҳақиқий қаҳрамонлардир”.
Украина Қуролли кучлари Бош штаби 28 январь куни эрталаб ўзининг кундалик ҳисоботида Россия қўшинлари Украина шарқидаги Донецк ва Луганск вилоятларида ҳужумни давом эттираётганини билдирди.
“Душман Бахмут, Авдиивка ва Новопавловка йўналишларида ҳужум ҳаракатларини давом эттирмоқда”, — дейилади Бош штаб хабарида.
“Купянск, Лиман, Запорож ва Херсон йўналишларида душман мудофаа ҳолатида”.
Украина армияси матбуот котиби Сергей Череватий маҳаллий ОАВга Угледарда "қақшатгич жанглар кетаётганини" айтди.
“Кўп ойлар давомида Россия Федерацияси ҳарбийлари. у ерда сезиларли силжиш қилишга уриняпти, лекин уддасидан чиқа олмаяпти”, деди Череватий.
Босқиндан олдин 15 мингга яқин аҳолисига эга бўлган Угледар шаҳри Донецк жанубидаги алоқа тугуни сифатида муҳим стратегик аҳамиятга эга.
Украина Хавфсизлик кенгаши котиби Алексей Данилов Озодлик билан суҳбатда Москва Россия босқинининг бир йиллиги муносабати билан 24 февраль куни янги ҳужумга тайёргарлик кўраётганини айтди.
"Энди улар максимал фаоллашишга тайёргарлик кўрмоқда. . . ва улар юбилейга қадар қандайдир ютуқларга эришишлари керак, деб ҳисоблашади", дейди Данилов.
Украинанинг Ғарб иттифоқчилари Киев мудофаасини мустаҳкамлаш учун ҳарбий техника ва ёрдам ваъда қилишда давом этмоқда.
АҚШ Миллий хавфсизлик вакили Жон Кирби Вашингтон яқин ойларда “жангларнинг шиддатли даврини” кутаётганини айтди ва уруш тўхтаб қолганидан “ҳеч қандай аломат” йўқлигини билдирди.
Зеленский Украинага 500 тагача танк кераклигини айтмоқда.
"Бизга ҳозир 300 ёки 500 та танк керак. Ҳудудимизни, тупроғимизни ҳимоя қилиш учун танклар керак. Халқимизни ҳимоя қилиш учун зирҳли машиналар лозим", деди Зеленский Sky News телеканалига берган интервьюсида.
Украинанинг Франциядаги элчиси Вадим Омельченко 27 январь Ғарб ҳозирга қадар Украинага жами 321 дона оғир танк ваъда қилганини айтди.
Польша айни пайтда мудофаани мустаҳкамлаш учун Украинага қўшимча 60 та танк жўнатишини эълон қилди.
Варшаванинг бу баёноти НАТО аъзолари Германияда ишлаб чиқарилган 100 га яқин “Леопард 2” танкларини Украинага беришга шайланган бир пайтда янгради.
Алоҳида-алоҳида, Қўшма Штатлар ва Буюк Британия мос равишда 31 та “Абрамс” ва 14 та “Чэлленжер 2” танкларини тақдим этишга ваъда беришди.
Украина АҚШдан F16 қирувчи самолётларини ҳам сўраган. Кирби, Вашингтоннинг Украина сўровидан хабардор эканини айтди, лекин “Бугун гаплашадиган қўшимча қурол тизимларимиз йўқ”, деди.
Словакия Украинага МиГ-29 қирувчи учоқларини бермоқчи
Мамлакат мудофаа вазири Ярослав Над шундай баёнот берди.
“Словакия ҳукуматининг қарори аввало Украина ҳукуматининг қарорига, шунингдек иттифоқчиларнинг ушбу масала бўйича розилигига боғлиқ”, деди мулозим.
Қирувчи учоқлар Словакиядаги ҳарбий-ҳаво кучлари базаларидан бирида сақланмоқда.