Мирзиеёв Трампга табрик мактуби йўллади
Ўзбекистон президенти Шавкат Мирзиёев Дональд Трампни АҚШдаги президент сайловида ғалаба қозонгани муносабати билан табриклади. Мирзиёевнинг табрикномаси матни президент матбуот хизмати томонидан ёйинланди.
“Сайловлардаги ишончли ғалабангиз Сиздек бой тажрибали ва моҳир сиёсатчининг АҚШни халқаро майдондаги нуфузи ва иқтисодий қудратини ошириш, глобал тараққиёт ва фаровонликни таъминлашга қаратилган дастур ва режаларингиз Америка халқи томонидан фаол қўллаб-қувватланганини яна бир бор яққол тасдиқлади”, деган Мирзиёев ўз табригида ўзбекистонликлар АҚШнинг Ўзбекистон мустақиллиги, суверенитети ва ҳудудий яхлитлигини қўллаб-қувватлашга қаратилган ўзгармас позициясини, мамлакатда “ортга қайтмас тус олган туб ислоҳотларга кўрсатиб келаётган доимий кўмаги”ни алоҳида қадрлашини урғулаган.
Ўзбекистон президенти Трампнинг илк президентлик даврида (2018 йил майида) Оқ уйда икки президент ўртасида ўтказилган “сермаҳсул музокаралар”дан кейин Ўзбекистон ва АҚШ ўртасидаги стратегик шерикликнинг янги даври бошланганини эслатган.
“Сизнинг шахсий эътиборингиз билан мамлакатларимиз ўртасидаги муносабатлар мисли кўрилмаган даражада ривожланиб, ўзаро ишонч, ҳурмат ва бир-бирини қўллаб-қувватлашга асосланган сиёсий мулоқотларимиз янада мустаҳкамланди, савдо-иқтисодий, хавфсизлик, ҳарбий-техникавий ва гуманитар алоқалар жадаллашди. Юқори даражадаги вакилларимиз ва қонун чиқарувчилар ўртасидаги фаол ташрифлар алмашувлари натижасида ҳамкорлигимиз сифат ва мазмун жиҳатидан юксак босқичга кўтарилди”, деган Мирзиёев расмий Тошкент бундан буён ҳам Трамп бошчилигидаги АҚШ маъмурияти билан “дўстона алоқаларни изчил давом эттиришдан, олий ва юқори даражада эришилган барча келишувларни тўлиқ амалга оширишдан манфаатдор” эканини қайд этган.
Мирзиёев ўз табригида Ўзбекистон томони “С5+1” платформаси ва “Марказий Осиё давлатлари билан АҚШ ўртасида савдо ва инвестициялар бўйича ҳадли Битими” доирасида минтақавий ҳамкорликни янада кенгайтириш тарафдори эканини таъкидлаган.
Икки мамлакат ўртасида сиёсий-дипломатик, савдо-иқтисодий, хавфсизлик, банк-молия, энергетика, транспорт, қишлоқ хўжалиги, рақамлаштириш, инновация, таълим ва бошқа соҳалардаги шериклик ривожланиб бораверишига умид билдирган Мирзиёев келгусида Афғонистонда барқарор тинчликни таъминлаш ва унинг иқтисодий-ижтимоий тараққиётига ҳисса қўшиш АҚШ ва Ўзбекистон ҳамкорлигининг ажралмас қисмига айланишига ишонишини қўшимча қилган.
Дональд Трамп демократ рақиби Камала Ҳаррисни ортда қолдириб, АҚШ президентлик сайловларида расман ғалаба қозониш учун зарур бўлган сайловчилар коллегиясининг 270 та овозини қўлга киритди.
АҚШдаги президент сайловига илк реакциялар
Венгрия бош вазири Виктор Орбан: “Бу АҚШ сиёсий тарихида энг катта камбэкдир (қайтишдир демоқчи - таҳр.)! Президент Трампни улкан ғалаба билан табриклаймиз. Тинчлик учун ўта керак бўлган ғалаба!”
Сербия президенти Александр Вучич: “Дональд Трампни ғалаба билан табриклайман. У билан биргаликда бизни кутиб турган жиддий хатарларга бас келамиз. Сербия барқарорлик, униб-ўсиш ва тинчлик учун АҚШ билан бирга ишлашга ҳаракат қилмоқда”.
Шунингдек, Трампни Австрия канцлери Нехаммер ва Сальвадор президенти Найиб Букеле ҳам ғалаба билан табриклашга улгурган.
Булар ортидан Трампни Франция президенти, Исроил бош вазири, Грузия ва Косово президентлари ғалаба билан қутлашди.
НАТО бош котиби Марк Рютте ҳам Трампга табригини йўллади.
“Ҳозиргина Дональд Трампни Қўшма Штатлар президенти этиб сайлангани билан табриклади. Унинг лидерлиги бизнинг Альянсимиз сақлаб қолиниши учун яна асосий нуқта бўлади. Мен НАТО доирасида куч билан тинчликни илгари суриш учун у билан яна ишлаш имкониятини сабрсизлик билан кутяпти”, деб ёзган Рютте X ижтимоий тармоғидаги ўз саҳифасида.
Беларуснинг авторитар лидери Александр Лукашенко Трампни “сайлов ғолиби” деб атаган.
Сўнгги соатларда Дональд Трампни сайловдаги ғалаба билан Еврокомиссия раҳбари Урсула фон дер Ляйен, Европа кенгаши етакчиси Шарль Мишель, Туркия президенти Ражаб Тоййиб Эрдўғон, Молдова президенти Майя Санду, Қирғизистон президенти Садир Жапаров, Чехия президенти Петр Павел ва бош вазири Петр Фиала ҳамда Арманистон бош вазири Никол Пашинян табриклагани маълум бўлди.
Бу табрикларга Германия канцлери Олаф Шольц ҳам қўшилди:
“Дональд Трампни АҚШ президенти этиб сайлангани билан қутлайман. Германия ва АҚШ узоқ вақт мобайнида Атлантиканинг икки томонида эркинлик ва фаровонликни илгари суриш билан муваффақиятли ҳамкорлик қилиб келмоқда. Биз фуқароларимиз фаровонлиги учун бу ишни бажаришда давом этамиз”, деб ёзган Шольц Х ижтимоий тармоғидаги ўз саҳифасида.
Республикачилар Конгресснинг юқори палатаси – Сенатда кўпчиликка эга бўлади
Оҳайо штатида Берни Моренонинг ғалабаси Республикачилар партиясига АҚШ Конгрессининг юқори палатаси – Сенатда кўпчиликка эга бўлишни нақд қилиб қўйди.
Автомобиллар савдоси билан шуғулланувчи тадбиркор Берни Морено Оҳайо штатидан уч муддат сенатор бўлган демократ Шеррод Браун устидан ғалаба қозонган.
Морено ғалабаси кўпчилик учун кутилмаган ҳодиса бўлди. Шеррод энг нуфузли қонун чиқарувчилардан бири бўлиб ҳисобланади. У Сенатдаги банклар ишлари бўйича қўмита раиси лавозимини эгаллаб келган.
Сайловда берилган овозлар тўлиқ санаб бўлингач, республикачилар билан демократлар ўртасида фарқ каттайиши мумкинлиги тахмин қилинмоқда. Ҳозирча яна олтита штатда овоз бериш натижалари чиқарилган эмас, бу штатларнинг учтасида республикачилар ғалаба қозониши эҳтимоли бор.