Россия Думаси Путиннинг АҚШ билан энг сўнгги ядровий битимдан чиқиш таклифини маъқуллади
Россия Давлат Думаси АҚШ билан энг сўнгги ядровий битимдан чиқиш йўлидаги биринчи қадамни қўйди ва бир кун аввал президент Владимир Путин эълон қилган ҳаракатни бир овоздан маъқуллади.
Стратегик тажовуз қуролларига оид шартномалар Россия ва АҚШ ўртасидаги икки тарафлама келишув бўлиб, улар стратегик ядровий қуроллар арсеналини ўзаро қисқартиришни назарда тутади.
22 февраль кунги Думадаги овоз бериш Путин чиқишидан 24 соат ўтар-ўтмас бўлиб ўтди.
Россия парламентининг юқори палатаси Федерация Кенгаши қонун лойиҳасини куннинг охирида маъқуллаши кутилмоқда, шундан сўнг Путин уни имзолайди.
Давлат Думаси спикери Вячеслав Володин овоз бериш натижаларига ҳеч қачон шубҳа туғилмаганини айтди.
Бир қанча россиялик қонунчилар Путиннинг Вашингтонни шартномани бузганликда айблаган риторикасини такрорладилар, собиқ президент, ҳозирда Россия Хавфсизлик Кенгаши раиси ўринбосари Дмитрий Медведев, АҚШ ва НАТО Россияга “уруш эълон қилгани” сабабли бу ҳаракат “кечиккан”ини айтди.
АҚШ Давлат котиби Энтони Блинкен Путиннинг бу ҳаракатини “масъулиятсизлик” деб атади.
НАТО раҳбари Йенс Столтенберг Путиннинг қароридан афсусда эканлигини ва Москва буни қайта кўриб чиқишига умид билдирди, бу ҳаракат билан “қуролларни назорат қилиш архитектураси бутунлай йўқ қилинганини” қўшимча қилди.
Москва ва Вашингтон ўртасида шартнома бўйича янги музокаралар ўтган йилнинг ноябрига режалаштирилган эди, бироқ Россия сўнгги лаҳзада уларни бир томонлама бекор қилди.
Намойишчилар Байденга: “Украинага “F16” учоқларини беринг!”
Варшава марказига йиғилган намойишчилар Украинага “F16” учоқлари беорилишини талаб қилмоқда.
АҚШ Президенти Жо Байден Полшага ташрифи пайти тўхтаган “Марриотт” меҳмонхонаси олдида турган намойишчилар орасида “Евромайдан Варшава” уюшмаси раҳбари Наталя Панченко ҳам бор.
“Биз президентдан Украинага “F-16” қирувчи учоқларини беришни сўраймиз. Варшава марказига шундай талаб ёзилган улкан экран ҳам ўрнатдик, жаноб Байден аллақачон кўрган деб умид қиламиз. У тўхтаган меҳмонхона олдида кетма-кет уч кун туради. Фикримизча учоқлар берилиши орқали дунёга тинчлик олиб келиш мумкин", - дейди Панченко.
АҚШ Президенти Жо Байден сешанба куни Варшавада Россия босқинидан бир йил ўтиб Украина "кучли" бўлиб қолаётгани, Москва қўшнисини ҳеч қачон мағлуб этмаслигини айтди.
Рус қўшинлари Херсон марказини ўққа тутди, қурбонлар ва ярадорлар бор
Россия қўшинлари Херсон марказига артиллерия зарбаси берди, камида олти киши ҳалок бўлгани маълум, деди Херсон мудофаа комендатураси раҳбари Дмитрий Плетенчук Суспилна нашрига.
“Суспилна”нинг ёзишича, снарядлар ўша пайтда одамлар бўлган шаҳар марказидаги жамоат транспорти бекатига келиб тушган. Ҳалок бўлганлар ва яраланганларнинг аниқ сони ҳозирча номаълум.
Шаҳар ўққа тутилганини Херсон вилояти ҳарбий маъмурияти раҳбари Александр Прокудин ҳам тасдиқлади. Унинг сўзларига кўра, шаҳарда камида 20 та портлаш овози эшитилган. Тахминларга кўра, отишма Град ялпи ўт очиш тизимларидан амалга оширилган.
Украина президенти Владимир Зеленский Херсоннинг ўққа тутилиши чоғида ҳалок бўлганларнинг оила аъзоларига ҳамдардлик билдирди ва “дунё Россиянинг тажовузкорлиги ва шафқатсизлиги чегара билмаслигини бир дақиқага ҳам унутишга ҳаққи йўқ”, деди.
Пригожин Сергей Шойгуни «давлатга хиёнат»да айблади
«Вагнер» хусусий ҳарбий ширкати асосчиси Евгений Пригожин Россия мудофаа вазири ва бош штаб бошлиғини Вагнер жангчиларини ўқ-дорилардан маҳрум қилиб, гуруҳни йўқ қилишга уринишда айблади. Пригожиннинг таъбирича бу ҳаракатлар ватанга хиёнат билан баробар.
Бизнесмен Евгений Пригожинга тегишли Вагнер ширкати Донецк вилоятининг Бахмут шаҳрини эгаллаш учун бир неча ойдан бери курашиб келмоқда.
«Буни тўғридан-тўғри қаршилик дейиш мумкин. Бу Вагнерни йўқ қилишга уринишдан бошқа нарса эмас. Вагнер ҳар куни юзлаб жангчиларини йўқотиб, Бахмут учун курашаётган пайтда буни давлатга хиёнат билан тенглаштириш мумкин», дея Пригожин ўзининг Телеграм каналида пост қолдирди
Бу Пригожин икки кун ичида эълон қилган иккинчи шундай шикоят. Душанба куни у исми ошкор этмаган ҳолда баъзи амалдорлар унга нисбатан шахсий адовати туфайли Вагнерни таъминотдан узганидан шикоят қилган эди.
«Бош штаб бошлиғи ва мудофаа вазири Вагнерни ўқ-дори таъминоти ҳамда ҳаво транспорти ёрдамидан узишга буйруқ берган», — деди Пригожин.
Пригожин анчадан бери юқори мартабали рус қўмондонларини лаёқатсизликда айблаб, танқид қилиб келади.
Унга кўра, мудофаа вазирлиги Бахмут атрофидаги Вагнернинг муваффақиятларини ўзиники қилиб кўрсатишга ҳаракат қилмоқда.
Россия Мудофаа вазирлиги Пригожиннинг сўзларига изоҳ бермади.