“Ўлим ҳиди ёйилган шаҳар” - Буча қирғинига бир йил тўлди
Зеленский Россия оккупацияси вақтида Бучада 1400 дан зиёд киши ўлган, деб қайд этди.
Украина президенти шаҳар озод этилганига бир йил тўлиши муносабати билан телеграм-каналида пост эълон қилди.
“Буча ва Буча тумани. 33 кунлик оккупация. 1400 дан ортиқ қурбон, улардан 37 нафари – болалар. 175 дан зиёд кишининг жасади оммавий қабрлар ва қийноқ хоналаридан чиқди. Россия 9000 ҳарбий жиноят содир этди. 365 кундирки, ушбу украин шаҳри яна озод яшамоқда. Бироқ у босқинчи мамлакат армиясининг ваҳшийликлари рамзи бўлиб қолди. Ҳаргиз кечирмаймиз. Барча айбдорлар жазоланажак”, деб ёзди президент.
Бир йил муқаддам, 2022 йилнинг 31 мартида украин ҳарбийлари Киев вилоятининг Буча шаҳрини озод қилишган эди. Шаҳар бир ойдан кўпроқ Россия оккупацияси остида бўлди.
Прокуратура аниқлашича, бу вақт ичида Бучада 600 дан зиёд тинч аҳоли ўлдирилган, уларнинг кўпи қийноққа солинган. Россия ҳарбийлари бу ерда 1100 дан ортиқ жиноят содир этгани қайд қилинган.
Зеленский: узоқ йўлни босиб ўтдик!
Украина президенти Владимир Зеленский урушнинг 400 куни оқшом халқига мурожаат қилиб, Россия армиясига қарши бирдамликдаги кураши учун миннатдорлик билдирди:
«Тўрт юз кун. 400 кундирки, кенг миқёсли тажовуздан ҳимояланиб келяпмиз. Биз Украина учун курашган ва курашаётган ҳар бир инсон билан, Украинага ёрдам қилган ва ҳозир ҳам қилаётган давлатлар билан, логистикамизга кўмаклашган ва кўмаклашишда давом этаётган одамлар билан, Украина кучайтирган ва кучайтираётган инсонлар билан узоқ йўлни босиб ўтдик”.
Зеленский мурожаати давомида қўллаб-қувватлагани учун Австрия парламентига миннатдорлик билдирди.
Шунингдек у, Россия кучлари Бахмут шаҳрида катта йўқотишлар эвазига Украина баъзи ютуқларга эришганини қайд этди.
Украина қарийб беш ойдан бери шаҳарни мудофаа қилмоқда. Бироқ украин томони тез орада қарши ҳужумга ўтишни режалаштираётганини айтмоқда.
Украиналик қиличбозлар россиялик ва беларуслар иштирокидаги халқаро мусобақаларни бойкот қилди
Украина қиличбозлари ўз федерациясининг россияликлар ва беларуслар иштирокидаги халқаро мусобақаларни бойкот қилиш қарорини олқишламоқда.
Ўтган йилнинг феврал ойида Россия Украинага бостириб кирганидан сўнг россиялик ва беларуслик спортчилар кўплаб нуфузли халқаро спорт мусобақаларидан четлатилди.
Бироқ, Россия ва Беларус қиличбозларига 2024 йилги Париж Олимпиадасига саралаш ойнаси очилишидан бир неча кун олдин, 10 март куни бўлиб ўтган қиличбозлик бўйича глобал федерациянинг навбатдан ташқари Конгрессида халқаро мусобақаларга қайтишга рухсат берилди.
Ушбу ҳаракат Украина қиличбозлик федерациясини руслар ва беларуслар иштирок этадиган барча тадбирларни бойкот қилишга ундади.
“Ушбу мусобақаларда иштирок этаётган россиялик ва беларуслик қиличбозлар асосан ҳарбий хизматчилардир”, деди Украина қиличбозлик федерацияси президенти Михаило Иллиашев.
Иллиашевнинг қўшимча қилишича, қиличбозлик қоидаларига кўра, украиналик спортчилар ўзлари дуч келган россиялик ёки беларуслик рақиб билан қўл бериб кўришишга мажбур бўлади.
Теннисдан фарқли ўлароқ, қиличбозликда рақибнинг қўлини сиқмаслик дисквалификацияга олиб келади.
Глобал Атлет ташкилоти маълумотларга кўра, уруш Украинада 343 та спорт иншоотини вайрон қилган, 140 мингга яқин ёш спортчи машғулотлар учун жойсиз қолган.
Россияга қарши санкциялар фонида Қозоғистоннинг “Эйр Астана” ширкати даромадлари ошган
Қозоғистоннинг энг йирик авиакомпанияси “Эйр Астана” Россия орқали ҳаво қатновининг қисқариши ва Хитойнинг қайта очилишидан фойдаланиш мақсадида кенгайиш режаларини тезлаштирмоқда. Бу ҳақда ширкат ижрочи директори Питер Фостер Рейтер агентлигига айтган.
Ўтган йили Украинага бостириб кирганидан сўнг, кўплаб авиакомпаниялар Россияга парвозларни тўхтатди.
Натижада Москва Европа ва Осиё ўртасидаги авиақатновлар маркази мақомини йўқотиб, жанубий қўшниси Қозоғистонга бозордаги улушини ошириш имконини берди.
"Украинада уруш бошланишидан олдин, ғарбий йўналишда, хоҳ Европа бўлсин хоҳ Америка, парвозлар асосан Россия Федерацияси орқали эди. "Шубҳасиз, энди бундай эмас. Вазият ўзгарди ва бизга бу ўзгаришдан фойдаланиш учун фурсат туғилди", - дейди Питер Фостер.
Бир қисми Британиянинг BAE Systems компаниясига тегишли бўлган “Эйр Астана” ўтган йили рекорд даражада 78, 4 миллион доллар фойда кўрди.Ширкат йиллик даромади 11 фоизга ўсди. Гарчи ширкат Россияга парвозларни тўхтатган эсада ўтган бир йилда 7, 4 миллион йўловчига хизмат кўрсатган .
Компания жорий йил охиригача ўз паркини 44 та самолётдан 50 тага етказишни режалаштирмоқда.
Фостернинг таъкидлашича, “Эйр Астана” Ғарбнинг Москвага қарши санциялари туфайли таъминот занжири билан боғлиқ муаммоларни тезда ҳал қила олган, бу Марказий Осиёдаги Ғарб маҳсулотларини импорт қилувчи ва уларни Россия орқали транзит қилган кўплаб корхоналар дуч келадиган муаммо.