Уманда ҳалок бўлган болалар дафн қилинди
Россиянинг Уман шаҳрига қилган ракета ҳужуми натижасида ҳалок бўлган болаларнинг дафн этиш маросими бўлиб ўтди.
Жума кунги ҳужумда 23 киши қурбон бўлди. Уларнинг барчаси Уман шаҳридаги турар-жой биносига иккита ракета тушиши оқибатида ҳалок бўлган. Украина ички ишлар вазири Игор Клименко қурбонлардан олти нафари болалар эканини маълум қилди
«Мен шу яқин атрофда яшайман. Бу болаларни гўдаклигида бери яхши билардим. Шахсан ўзим уларни шу черковда чўқинтирганман. Мени ҳам фарзандларим бор ва шу мамлакат фуқаросиман. 15 йилдан бери шу шаҳарда яшаб келаман. Энди ҳаммадан хавотир оляпман», черков руҳонийси Фёдор Боцу.
Украина расмийларига кўра, рус қўшинларининг Уман шаҳрига ҳужуми оқибатида оқибатида 9 қаватли уйнинг ярми тўлиқ вайрон бўлган. Вайроналар остидан 17 кишини қутқариб олишга муваффақ бўлинган. Яна икки аёл қидирилмоқда.
Россия ракета зарбаларидан Николаев шаҳрида бир киши ўлди, 23 киши яраланди
Пайшанба (27 апрел) куни Россия Украина жанубида жойлашган Николаев шаҳридаги кўпқават уй ва бошқа биноларга ракеталар билан зарба бериши оқибатида бир киши ҳалок бўлди ва бир ёш бола дохил 23 киши яраланди, дея маълум қилишмоқда Украина расмийлари.
“Кечаси Россия Қора денгиз акваториясидан Николаевга тўртта “Калибр” ракетасини отди.
Ракеталар хусусий уйлар, тарихий бино ва кўпқават уйни нишонга олган. Айни пайтда бир киши ўлгани ва 23 киши, жумладан бир бола яралангани маълум”, деб ёзди Зеленский “Телеграм”да.
Украина Фавқулодда вазиятлар хизмати ёйинлаган видеода қутқарувчилар шикастланган бинолар ҳудудида ишлаётганини кўриш мумкин.
“Биз ҳеч қачон саёҳатларга чиқмадик, ҳеч қачон дам олмадик. Топганимизни мана шу уйга сарфладик. Кейин “русский мир” келди. Қирилиб кетсин бу руслар! Бошимизга бало бўлишди! Ҳеч вақосиз қолдик!” – қичқиради Елена Чебан вайрон бўлган уй ёнида ўтирар экан, йиғидан ўзини зўрға тийиб.
Вилоят ҳарбий маъмурияти раҳбари Виталий Ким қутқарув хизматлари ракета парчаларидан ҳосил бўлган бир неча ёнғинни ўчириб, харобаларни кўздан кечираётганини билдирди.
“Бу ерда келинимнинг ўғли Александр нобуд бўлди. Мен меҳмонхонада ухлаётгандим. Деразалар чил-чил синди...”, дейди шу ерда яшовчи 74 ёшли Мария Чернишова.
Россия минглаб одамлар ўлимига, миллионлаб кишиларнинг ўз уйларини тарк этишига ва шаҳарлар вайрон бўлишига олиб келган ушбу кенг кўламли босқин давомида тинч аҳолига қарата қасддан зарбалар бераётганини инкор этиб келади.
Николаев кемасозлик маркази ва порт шаҳар бўлиб, урушгача бу ерда қарийб 470 минг аҳоли истиқомат қиларди. Шаҳар уруш бошланганидан бери Россиянинг кучли артиллерия ва авиация ҳужумларига учрамоқда.
Украин ҳарбийлари АҚШ гаубицасидан душман позицияларини ўққа тутди
Америкада ишлаб чиқарилган М119 гаубицаси янги бўлмасада, Совет қуролларидан бир қанча устунлиги бор дейди Андрей исмли украин ҳарбийси
«Бу гаубица билан ишлаш осон. Совет давридаги гаубицадан ўқ узиш анча мураккаб, узоқ вақт талаб этади. Бизда эса вақт йўқ», дейди украин ҳарбийси Андрей.
Ярослав исмли ҳарбий Бахмутда рус қўшинларига зарба бериш қийинлашганини қўшимча қилди.
«Илгари душман катта-катта гуруҳ бўлиб юрарди. Эндиликда улар мослашишган, уларни кичик гуруҳларда ҳаракатланаётганини кўряпмиз. Уч-тўрт киши 20-30 метр масофани қўриқлашяпти», дейди украин ҳарбийси Ярослав.
Украина қуролли кучлари бош штабининг хабар беришича, рус кучларининг Бахмут шимоли-ғарбида кки қишлоққа ҳужуми қайтарилган. Ўнлаб аҳоли пунктлари руслар томонидан ўққа тутилди.
Россия Украинанинг ўқ-дори омборларига зарба берганини иддао қилди
Россия Украина ўқ-дори омборлари ва бошқа ҳарбий объектларга зарба берганини билдирди. Ўз навбатида Украина ҳам Россия ҳарбий нишонларига зарба берганини маълум қилди.
Россия Мудофаа вазирлиги матбуот котиби Игор Конашенков Россия қуролли кучлари Купянск, Красний Лиман (Лиман) ва бошқа йўналишлардаги нишонларга ҳамда Украина ҳарбий объектларига зарба берди, дея хабар қилди.
Вазирликнинг билдиришича, Россия қуролли кучлари Донецкдаги 108-ҳудудий мудофаа бригадаси ва 72-механизациялашган бригаданинг ўқ-дори омборларига ҳужум қилган.
Конашенковга кўра, рус қўшинлари Херсонда АҚШда ишлаб чиқарилган М777 артиллериясини йўқ қилган. Россия ҳарбий-ҳаво кучлари эса Су-25 самолётини уриб туширган.
Украина Қуролли Кучлари Бош штаби Россия армияси ўзининг асосий кучларини Бахмут, Авдивка ва Маринкага ташлаганини, бироқ Украина қўшинлари ўтган 24 соат ичида Россия ҳужумларини қайтарганини даъво қилди.
Энг шиддатли жанглар Бахмут ва Маринка атрофида кечган.