ЖАР Путиндан БРИКС саммитига келмасликни сўраган
Жанубий Африка ҳукумати Россия президенти Владимир Путиндан ёзда Жанубий Африкада бўлиб ўтадиган БРИКС саммитига келмасликни сўрамоқда. Бунга сабаб, Украинадаги ҳарбий жиноятларда айбланиб, Халқаро жиноий суд (ХЖС) томонидан Россия президентини ҳибсга олиш ордери. Бу ҳақда Жанубий Африканинг Sunday times газетаси манбаларга таяниб хабар бермоқда.
Жанубий Африка Республикаси Рим статутини имзолаган давлатлар қаторига киради, бу эса уни ХЖС қарорларини бажаришга мажбур қилади.
"Бизда Путинни ҳибсга олмасликнинг иложи йўқ. Агар у бу ерга келса, биз уни ҳибсга олишга мажбур бўламиз", дея айтган газетага Жанубий Африка ҳукумати вакили.
The Sunday timesнашрининг ёзишича, ўтган ҳафта Жанубий Африка ҳукумати Владимир Путинни ҳибсга олиш учун ордер бериш билан боғлиқ имкониятларини ўрганиш учун мамлакат вице-президенти бошчилигидаги махсус ҳукумат қўмитасини тайинлаган.
Қўмита Путиннинг Москвадан видеоалоқа орқали саммитдаги иштирокидан ташқари бошқа вариантларни топмаган.
Украиналик фермер далани миналардан тозалашнинг янги усулини кашф этди
Украиналик фермер Александр Кривцов Россия босқинидан кейин далаларни миналардан тозалашнинг янги усулини ўйлаб топди.
У тракторини рус танкларидан қолган ҳимоя панеллари билан жиҳозлади ва уни масофадан бошқариш пулти билан бошқаради.
Ўтган йили Украинанинг шарқий қисмидан Россия қўшинлари Украинанинг қарши ҳужуми натижасида қувилганидан сўнг, кўплаб далалар миналар билан қопланган, бу фермерларнинг кейинги ҳосил учун ғалла экишини хавф остига қўймойда.
Далаларни миналардан тозалаш осон иш эмас. Бунинг учун фермерлар профессионал сапёрлар хизматига муҳтож.
Александр Кривцов ўз даласини тозалаш учун портлашларга дош бера оладиган масофадан бошқариладиган тракторни ишлаб чиқди. Тракторининг кузовини ҳимоя қилиш учун шикастланган рус ҳарбий машиналарининг зирҳларидан фойдаланиб, у ўз жамоасидан бирига тракторни масофадан туриб бошқариш имконини берадиган тизимни сотиб олди.
“Экин экиш вақти келди, лекин ҳеч нарса қила олмаймиз, қутқарув хизматлари жуда банд бўлгани учун шу ишга қўл урдик".
Бош вазир Денис Шмихал ўтган ҳафта бўлиб ўтган ҳукумат йиғилишида Украина ҳудудининг қарийб 30 фоизи руслар томонидан миналангани ва ҳукумат эътиборини имкон қадар тезроқ қишлоқ хўжалиги ерларини миналардан тозалашга қаратганини айтди.
Зеленский: Террорчиларнинг ракеталари икки кишининг ҳаётига зомин бўлди
Украина президенти Владимир Зеленский 1 май куни Украинанинг шимолий ва марказий ҳудудларига уюштирилган зарбалар оқибатида Чернигов вилоятида 14 ёшли бола ва Днепропетровск вилоятининг Павлоград шаҳрида икки киши ҳалок бўлди, дея билдирди.
Павлоградда яна 40 киши яраланган, дея қўшимча қилди Зеленский ўзининг тунги мурожаатида.
Зеленский душанба тунги видеомурожаатида “Россия босқинчилари ҳар бир бундай зарба учун жавобимизни олади”, деди.
“Террорчиларнинг ракеталари икки кишининг, жуда ёш йигитларнинг ҳаётига зомин бўлди. Яна қирқ киши – аёллар, болалар, эркаклар яраланди ва жароҳатлар бўйича тиббий ёрдам кўрсатиляпти”, деди Зеленский.
Россия Мудофаа вазирлиги ўз кучлари “Украинанинг ҳарбий-саноат объектлари”га юқори аниқликдаги узоқ масофали ҳаво ва денгиз ракеталари ёрдамида зарба берганини маълум қилди.
Россиянинг Брянск вилоятида поезд изидан чиқиб, ёниб кетди
Брянск вилояти губернатори Александр Богомаз поезд изидан чиқиб кетишига темир йўлдаги портлаш сабаб бўлганини айтди.
"Брянск-Унеча темир йўлининг 136-километрида Унечский туманида номаълум портловчи қурилма ишга тушди, натижада юк поездининг локомотиви релсдан чиқиб кетди. Жабрланганлар йўқ. Ҳозирда воқеа жойида тезкор хизматлар ишламоқда", - деб билдирди вилоят губернатори телеграм-каналида.
Йўлнинг Украина билан чегарасидан 60 км узоқликда жойлашган ушбу қисмида ҳаракат тўхтатилди.
Россия темир йўллари маълумотига кўра, Москва вақти билан 10: 17 да содир бўлган ҳодиса натижасида локомотив ёниб кетган ва еттита юк вагони релсдан чиқиб кетган.
Қайд этилишича, поезд нефт маҳсулотлари ва ёғоч олиб кетаётган бўлган. Қурбонлар ҳақида маълумот йўқ.
Поезд Беларуснинг Гомел шаҳридан Брянскка кетаётган бўлган, деб хабар берди Беларус темир йўллари.
Брянск вилояти Украина ва Белорус билан чегарадош. Маҳаллий расмийлар Украина манфаатларини кўзлаб уюштирилган қўпорувчилик ҳаракатлари ҳақида кўп бора айтган.
Богомаз шанба куни шунингдек, Россиянинг Украина билан чегарасидан тахминан 12 км шимолда жойлашган Суземка қишлоғининг Украина томонидан ўққа тутилиши натижасида тўрт киши ҳалок бўлганини билдирди.