Украина Россияга ҳудудининг бир қисмини бериш таклифини қабул қилмайди
Украина ташқи ишлар вазири Хитой расмий вакили билан Киевда бўлиб ўтган музокаралар чоғида Киев Россия билан урушни тўхтатиш учун ҳудудини бериши ёки можарони музлатиш бўйича ҳеч қандай таклифни қабул қилмаслигини билдирди.
Хитойнинг Евроосиё масалалари бўйича махсус вакили ва Россиядаги собиқ элчиси Ли Хуи Украинага ташриф буюриб, Украина ташқи ишлар вазири Дмитрий Кулеба билан учрашди.
Бу уруш бошланганидан бери Хитой юқори мартабали вакилининг Киевга биринчи бор келиши.
«Кулеба Хитой ҳукумати махсус вакилига Украина суверенитети ва ҳудудий яхлитлигини ҳурмат қилишга асосланган барқарор ва адолатли тинчликни тиклаш тамойиллари ҳақида батафсил тушунтириш берди. Украина ўз ҳудудларини бериш ёки можарони музлатиш бўйича ҳеч қандай таклифни қабул қилмаслигини таъкидлади», — дейилади Украина ТИВ берган баёнотда.
Юқори мартабали хитой расмийсининг Европага сафари доирасида Россия, Полша, Франция ва Германияда ҳам музокаралар ўтказиши кутилмоқда.
Хитой Москвани қоралашдан, унинг ҳаракатларини «босқин» деб таърифлашдан ўзини тийиб келмокда. Бу эса Хитойнинг можарода потенциал воситачи сифатидаги ролини шубҳа остига олган Ғарбнинг танқидига сабаб бўлди.
АҚШ ЕИ мамлакатларига украин учувчиларини F-16 учоқларида парвозга тайёрлашни тақиқлади
Бу ҳақда “юқори мартабали украин мулозими”га ҳавола берган ҳолда The New York Times хабар қилмоқда. Газета манбасига кўра, Қўшма Штатлар Европа давлатлари, жумладан – айни пайтда Киевга Ғарб қирувчи учоқлари берилишини фаол қўллаб-қувватлаётган Буюк Британия ва Нидерландияга украин учувчиларини F-16 қирувчи учоқларини бошқаришга ўргатишга рухсат бермаган.
17 май куни Буюк Британия ва Нидерландия Украинага F-16 қирувчиларини етказиб беришни таъминлаш мақсадида халқаро коалиция тузаётганини эълон қилган эди.
Бироқ Украинага АҚШ ишлаб чиқарган F-16 қирувчи учоқларини бериш учун Оқ уйнинг розилиги керак. Вашингтон эса учувчиларни тайёрлаш, учоқларга техник хизмат кўрсатиш, шунингдек Россиянинг муҳтамал ҳужумларини рўкач қилиб Киевга қирувчи учоқлар беришни ҳанузгача расман рад этиб келмоқда.
Бироқ март ойида CNN телеканали АҚШ ҳарбийлари украин учувчиларини F-16 учоқларини бошқаришга тайёрлаш учун қанча вақт керак бўлишини ўргангани ҳақида хабар қилган.
Қрим темир йўлида портлаш: дон ортилган вагонлар ағдарилди
Россия босиб олган Қримнинг Симферополь туманида ғалла юкланган вагонлар издан чиқиб кетиб, ағдарилди. Бу ҳақда телеграм-каналлар хабар қилди, кейинроқ маълумотни Россия тайинлаган Қрим “раҳбари” Сергей Аксёнов тасдиқлади.
Аксёнов Baza, 112 ва Mash телеграм-каналлари хабарида тилга олинган портлаш ҳақида лом-мим демаган. Хабарларда портлаш натижасида ғалла ортилган саккиз вагон темир йўлдан чиқиб кетиб, бештаси ағдарилгани айтилади. Ҳукуматга оид SHOT телеграм-канали эса Қримда темир йўлда қўпорувчилик қилган шахс қидирилаётгани ҳақида ёзмоқда.
“Россия билан биргамиз” ҳаракати раиси Владимир Роговга кўра, портлатиш қурилмаси Чистенькое қишлоғи ёнида темир йўл остига ўрнатилган, портлаш таркибнинг юқори қисмида юз берган. Натижада 50 метр йўл шикастланган ва рельслар остида чуқурлиги 2, диаметри қарийб 15 метрлик ўра ҳосил бўлган.
“Кримская железная дорога” ширкати хабарномасида Қримда вагонлар “темир йўл транспорти фаолиятига бегона шахслар аралашуви” туфайли издан чиқиб кетгани ҳақида гап боради.
Чехия Россия элчихонасига бепул фойдаланиш учун берилган ер участкаларини олиб қўйди
Чехия ҳукумати Россияга ер участкаларидан бепул фойдаланиш ҳуқуқини берувчи 9 қарорни бекор қилди. Бу ҳақда Европа масалалари бўйича вазир Мартин Дворжак “Твиттер”да маълум қилди.
Гап Прагадаги Россия элчихонаси ёнидагиквартиралар жойлашган участкалар, шунингдек Брно, Карлови Вари, Влканчици ва Еванидаги бинолар ҳақида бормоқда.
Seznamzpravy нашрига кўра, 2022 йил майда Россиянинг Карлови Вари ҳамда Брно шаҳарларидаги собиқ бош консулхоналари бинолари консуллик биноси мақомини йўқотган.
“Биз мамлакатимиз оккупация қилинганидан сўнг рус танклари нишони остида ҳукуматга мажбуран қабул қилдирилган ва бу кунгача Россияга ҳудудимиздаги катта ер майдонларидан текин фойдаланишга имкон берган қарорларни бекор қилдик. Ушбу ерлардан келадиган бебилиска даромад Украина истилосига сарфланмаслиги керак”, деб ёзди Дворжак.
Чех ҳукумати маълумотига кўра, объектлардан айримлари дипломатик эмас, балки тижорат мақсадида қўлланмоқда, шу боис уларни бепул тақдим этишда давом этишга ҳеч қандай сабаб йўқ. Ҳукумат Россия қайд этилган объектлар бўйича тегишли солиқ мажбуриятларини бажариши лозим, улардан бепул фойдаланиш ўрнига томонлар ижара шартномаси ёки
Чехия учун фойдалироқ бўладиган бошқа битим тузишлари мумкин, деб ҳисоблайди.
Бекор қилинган қарорлар жами 59 та ер участкасига оид. Чехияда Россия текинга фойдаланадиган ер участкаларининг умумий майдони 92 001 квадрат метр бўлиб, шундан 87 863 кв. метри давлат мулкидир.
Айни чоғда Россияда Чехияга атиги 26 875 кв.метр ер майдони берилган бўлиб, Чехия ТИВ раҳбари Ян Липавский аввалроқ бу “ўзаро ҳурмат принпицига хилоф”лигини айтган эди.
Вазирлик ҳукуматнинг ушбу қадами Россия тарафидан Москвадаги Чехия уйига нисбатан айни йўл тутилишига олиб келиши ҳақида огоҳлантирди. Чехия уйи Чехияники бўлса ҳам, Россияга тегишли ерда жойлашган.
Чех ҳукумати бекор қилган қарорлар 1970–1982 йилларда қабул қилинган эди. Ўшанда СССРга дипломатик мақсадларда бепул фойдаланиш учун қатор ер участкалари берилган. Совет Иттифоқи қулаганидан сўнг бу ер участкалари автоматик равишда Россия фойдаланувига ўтган.