OzodTarmoqда ижтимоий тармоқларда эълон қилинаётган, Озодлик тингловчиси (ўқувчиси, томошабини) қизиқишини уйғотиши мумкин матн, аудио ва видеоларни бериб борилади.
OzodTarmoq рукнида берилаётган материалларда воқеа-ҳодисаларга берилаётган баҳолар мутлақо муаллифлар позициясидир. Муаллифлар позицияси Озодлик позициясига мос келмаслиги мумкин.
OzodTarmoqнинг бугунги сонида шоир ва блогер Карим Баҳриев Фейсбукдаги саҳифасида 29 октябрда эълон қилган пост эътиборингизга ҳавола қилинади. Матн таҳрирсиз берилмоқда. Стилистика ва имло муаллифники.
***
Ижтимоий сатира жанрида бир ҳаваскорлик машқи ёздим шу онда...
ИННОВАЦИОН ТАКЛИФ
Қадимда бир шоҳ вазирларини чақирибди. Ғазаб билан ўшқирибди: "Жамоатчилик қабулхонамизға бир нома тушубди. Қашшоқликдан аксариятимиз тиламчилик қиляпмиз, деб ёзишибди. Бу шармандали ҳол. Йўқотишимиз керак" дебди.
Молия вазири: "Тўхтанг, шохим, уларга лицензия жорий қилсак чи. Лицензия пуллик бўлади. Яна ҳар ойлик солиқ белгилаймиз. Бюджетга тушум бўлади" дебди. Шоҳ: "Балосан, бекорга сенга Хуросонда энг уста молия вазири унвони берилмаган" деб шодланибди.
Меҳнат вазири ҳам шодланибди: "Миллионлаб тиламчиларга меҳнат дафтарчаси очсак, пенсия дафтарчаси очсак, яна тушум, биз ҳам миллионлаб ишчи ўринлари яратилди, деб ҳисобот тузамиз".
Тўқимачилик саноати вазири ҳам илашибди:"Тиланчиларга ягона мажбурий форма жорий этамиз. Тикувчилик цехларимизга иш топилади"...
Шоҳлик ахборот хизмати бошлиғи қўшилибди:"Тиланчиларни ҳар йил пуллик малакасини ошириш курсида ўқитамиз. Шундоқ бир ўқув марказимиз бор!"
Ходимлар бўйича девон мудири: "Штат жадвали тузиб, Тиламчилар билан ишлаш Агентлиги ташкил этардик. Агентлик бошлиғи муовинини жосуслик идорасидан қўярдик, кўз-қулоқ бўларди" дебди...
Хирот ҳокими қўшилибди: "Тиламчиларнинг тасбиҳ ва бошқа ашқол-дашқолларини бизни фабрика ишлаб чиқаради. Четдан тасбеҳ олиб кириш божини оширсак, ўзимиз таъминлардик".
" Етар, - дебди Шоҳ. - деталарни ишлаб чиқинглар, Миллий дастур, йўл харитаси ва тадбирлар жадвали тузинглар. Инновацион ишлаш соз экан. Мана, халқнинг яна бир муаммоси ҳал этилди! "
Карим Баҳриев
