2013 йил бошида НАТО юкларини Ўзбекистон темир йўллари орқали Европага қайтариш бўйича синов ташувларини амалга ошириш якунланади.

Латвия бош вазири Валдис Домбросвскиснинг 21 март куни парламентда қиладиган чиқишида бу ҳақда маълум қилиши кутилмоқда.

Бундан аввал Буюк Британия мудофаа вазири Филипп Ҳаммонд Афғонистондаги халқаро кучлар таркибидаги инглиз қўшинлари сони 9 мингдан 5200 кишигача камайтирилишини маълум қилган эди. Бу эса Афғонистондан 6500 контейнерда ҳарбий юк ва 2500 дона автомобил олиб чиқлишини кўзда тутади.

“Юкнинг бир қисми Покистон орқали олиб ўтилади. Бироқ ҳарбий юкларнинг асосий қисми Европага Ўзбекистон орқали қайтарилади. Транзит учун тўланиши керак бўлган 700 минг доллар ҳақни техника ва эхтиёт қисмлар билан бериш кутилмоқда”, дея таъкидлади Британия мудофаа вазири.

АҚШ Мудофаа вазирлигининг билдиришича, Америка ва НАТО ҳарбийлари учун Афғонистонга жўнатилаётган юкларнинг 98 фоизи Ўзбекистон ҳудудидан ўтадиган шимолий таъминот тармоғи орқали етказилмоқда.

АҚШ ва Британия Афғонистондан қўшинларини олиб чиқишида Ўзбекистон ўз ҳудудини транзит сифатида тақдим қилиши эвазига ҳарбий техника ваъда қилган.

Ўзбекистон Иқтисодиёт ва молия вазирлиги (ИМВ) ҳисоботига мувофиқ, 2024 йил якунларига кўра мамлакатда давлат қарзи 40 миллиард 199 миллион долларни ташкил қилган. Бу кўрсаткич Ўзбекистон ялпи ички маҳсулотининг (ЯИМ) 35 фоизига тенг.

Вазирлик маълумотига кўра, мазкур қарзнинг 33,7 миллиард доллари ташқи қарз, 6,5 миллиард доллари эса ички қарз ҳиссасига тўғри келади.

ИМВ қайдича, Ўзбекистон халқаро молия ташкилотлари орасида энг кўп қарзни Жаҳон банкидан жалб қилган бўлиб, бу қарз миқдори 7,6 млрд долларга тенг.

Ўзбекистонда давлат қарзи 2024 йил 1 январида 34,93 миллиард долларни ташкил қилганди. Ўтган бир йил давомида қарз миқдори 5,3 миллиард долларга ёки 15 фоизга ошган.

Давлат бюджети лойиҳасига мувофиқ, Ўзбекистон бу йил қарз ўлароқ хориждан 5,5 миллиард долларгача маблағ жалб қилиши мумкин.

Аввалроқ Марказий банк 2024 йилнинг учинчи чораги якунларига кўра Ўзбекистон ташқи қарзи 60 миллиард доллардан ошгани, бундан давлат қарзи 32 миллиард доллардан кўпроқни, корпоратив ташқи қарз эса 27,7 миллиард долларни ташкил этиши ҳақида ҳисобот эълон қилган эди.

Президент Шавкат Мирзиёев Ўзбекистон мусулмонлари идорасининг ахборотини эътиборга олган ҳолда “2025 йилда муборак Рамазон ойининг бошланиши 1 март кунига тўғри келиши”га оид қарор қабул қилди.

Қарор билан Рамазон ойида “эҳтиёжмандлар ҳамда илм-маърифат йўлида изланаётган ёшларга ёрдам бериш бўйича ташаббусларни қўллаб-қувватлашга, оилавий ришталарни мустаҳкамлаш, маҳаллаларда ўзаро тушуниш ва ишонч муҳитини кучайтириш ҳамда ҳурмат ва меҳр-оқибат қадриятларини тараннум этишга, атроф-муҳитни асраш, муқаддас қадамжо, зиёратгоҳ ва қабристонларни ободонлаштириш, кўчатлар экишга ҳамда Рамазон ойи билан боғлиқ тадбирларда меъёрга амал қилиш ва исрофгарчиликка йўл қўймасликка алоҳида эътибор” берилиши белгиланган.

Президент қарорига мувофиқ, Қорақалпоғистон ҳукумати, вилоятлар ва Тошкент шаҳри ҳокимликларига Дин ишлари бўйича қўмита, Ижтимоий ҳимоя миллий агентлиги, Ўзбекистон маҳаллалари уюшмаси, Ўзбекистон фахрийларининг ижтимоий фаолиятини қўллаб-қувватлаш “Нуроний” жамғармаси ва бошқа ҳамкор ташкилотлар билан биргаликда ҳудудларда Рамазон ойини миллий анъана ва қадриятларга мос тарзда ўтказишга доир чора-тадбирларни амалга ошириш топширилган.

Аввалроқ Ўзбекистоннинг Марказий Осиё минтақасидаги қўшнилари бўлган мамлакатлар ва мусулмонлар кўпчиликни ташкил қилувчи бошқа ўлкаларда Рамазон ойи 1 мартдан бошланиши эълон қилинган эди.

Ўзбекистонда 2024 йилда 132 минг 298 та жиноят содир этилган. Жиноятлар сони мамлакат бўйича ҳар 100 минг аҳолига 199 тадан тўғри келган.

Бу рақамлар 26 февраль куни Олий Мажлис Сенатининг Мудофаа ва хавфсизлик масалалари қўмитаси мажлисида Ички ишлар вазирлиги масъуллар томонидан очиқланган.

Ўтган йилда содир этилган умумий жиноятларнинг 92,4 фоизи фош этилган. Қидирувдаги шахсларнинг 8736 нафари ушланган ва бедарак йўқолганларнинг 567 нафари топилган.

Сенат қўмитаси йиғилишида маълум қилинишича, олди олиниши лозим бўлган жиноятлар сони ҳанузгача жиноятларнинг салмоқли қисмини ташкил этмоқда. Бу турдаги жиноятчиликнинг асосий улушини ўғрилик ва фирибгарлик ташкил этиб, уларнинг 59,4 фоизи ёшлар ва 36,1 фоизи илгари судланганлар томонидан содир этилган.

Киберхавфсизлик йўналишида 58,8 мингта жиноят содир этилган бўлиб, уларнинг 97,7 фоизи фуқароларнинг банк пластик карталаридаги пулларни қўлга киритиш билан боғлиқдир.

Сенат матбуот хизмати қайдича, автомобил йўлларида содир бўлган йўл-транспорт ҳодисалари, унда жароҳатланганлар ва вафот этганлар сони бўйича 2023 йилга нисбатан камайишга эришилган бўлса-да, йўловчилар хавфсизлигини таъминлаш юзасидан таъсирчан назорат ҳали ҳам тўлиқ ва самарали ўрнатилмаган. Оқибатда ҳисобот даврида 9364 та йўл-транспорт ҳодисаси содир этилиб, 8901 нафар фуқаро жароҳатланган ва 2203 нафар фуқаро ҳалок бўлган.

Озодлик аввалроқ 2024 йилда мансаб суиистеъмоллиги оқибатида давлат ва жамият манфаатларига етказилган зарар 3,61 триллион сўмга етгани, мамлакат бўйича 4906 нафар мансабдор шахс жиноий жавобгарликка тортилгани ҳақида хабар қилган эди.

Андижон вилоятидаги Олимпия ва паралимпия спорт турларига тайёрлаш маркази 2022-2025 йилларда ўтказган тендерларда шубҳали ҳолатлар юзага чиқди.

Ҳужжатларни ўрганган Daryo.uz нашрининг хабар қилишича, энг яхши таклиф танловида қўли баланд келган корхоналарнинг таъсисчилари бир-бирига “бегона эмас”.

Тендерда ғолиб деб эълон қилинган корхоналар буткул бошқа ихтисосликда экани ҳам эътиборни тортган.

Марказ жорий йил 13-20 февраль кунлари овқатланиш хизматларини кўрсатиш бўйича ўтказган бошланғич қиймати салкам 2,1 миллиард сўмлик тендерда “Lucky kinder garten” МЧЖ ғолиб деб топилган.

“Корхона 2023 йилнинг июль ойида ташкил этилган, фаолияти буюртмачига кўрсатилганидек, озиқ-овқат эмас, балки мебель ишлаб чиқаришга мўлжалланган. Бундан ташқари, тендерга илова қилинган ҳужжатларда ташкилот ўз балансида бинолар мавжудлигини келтирган бўлса-да, кадастр паспортида келтириб ўтилган объектларни davreestr.uz порталидан топишнинг иложи бўлмади”, деб ёзган Daryo.uz.

Cпорт мактабига 6,5 миллиард сўмлик овқат хизмати кўрсатган яна бир фирма компьютер хизматига ихтисослашгани аниқланган.

Нашр ҳолат юзасидан Коррупцияга қарши курашиш агентлиги ва бошқа масъул идоралардан изоҳ талаб қилган.

Озодлик аввалроқ “Деҳқонобод калий заводи” АЖ харид комиссияси кўп миллиардлик тендер ўтказишда қонун талабларини қўпол равишда бузгани ҳақида хабар қилган эди.

Коррупцияга қарши курашиш агентлиги қайдича, 2024 йил давомида давлат харидлари тизимида 263,9 миллиард сўмлик ноқонуний харид натижалари бекор қилинган.

Жорий йилнинг 26 февраль куни фуқаролик ишлари бўйича Шайхонтоҳур тумани судида таниқли журналист Анора Содиқованинг “Муфаса” тахаллуси билан саҳифа юритадиган блогер Мирсаид Ҳайдаровга қарши киритган даъво аризаси кўриб чиқила бошлади.

Kun.uz нашрининг ёзишича, соат 10:30 га белгиланган суд кечикиб бошланган. Қолаверса, жараённи ёритиш учун келган журналистлар суд бошлангунига қадар ичкарига қўйилмай турли баҳоналар билан йўлакда ушлаб турилган.

Суднинг очиқ ёки ёпиқ эканига аниқлик киритилмай бошланган жараён тахминан 40 дақиқаларда якунига етаркан, жавобгар Мирсаид Ҳайдаров ва унинг адвокати суд ёпиқ ўтишини талаб қилган. Бундан ташқари, даъвогар Анора Содиқованинг адвокатлари сони етарли бўлгани важидан суд залидан инсон ҳуқуқлари фаоли Абдураҳмон Ташановни чиқариб юбориш бўйича алоҳида тақдимнома киритилган.

Даъвогарнинг адвокатлари судья нохолис эканини билдириб, ННТдан вакил сифатида ҳуқуқ фаоли Абдураҳмон.Ташановнинг судда қатнашишини таъминлашни сўраб, раддия киритишган.

Анора Содиқова ўз шикоятида блогер Мирсаид Ҳайдаров турли аниқ ва аноним каналларда у ҳақида камситувчи, шаънини булғайдиган ва туҳмат гаплар ёзганини билдирган.

“Адолат истаб судга келдим, ҳеч бўлмаса конституция ишлашидан умидворман. Журналист ва аёл сифатида шаънимга айтилган бу гапларни қабул қилолмайман”, деган у.

Суд ёпиқ ўтиши ҳақидаги қарор ижтимоий тармоқларда суд муҳокамаси ошкоралиги ва ахборот олиш ҳуқуқини чеклаш дея талқин этилган.

Судьялар олий кенгаши матбуот хизмати бунга раддия берган.

“Фуқаролик кодексининг 12-моддасига кўра, барча судларда ишлар муҳокамаси ошкора ўтказилиши белгиланган. Бироқ ишда иштирок этувчи шахсларнинг шахсий ҳаёти тўғрисидаги маълумотлар ошкор бўлишининг олдини олиш, ёзишмалар сирини ва қонун билан қўриқланадиган бошқа сирни сақлаш мақсадида ёпиқ суд муҳокамаси ўтказилишига ҳам йўл қўйилади”, дейилган Кенгаш баёнотида.

Озодлик аввал хабар қилганидек, Анора Содиқова бошчилигидаги Uzdiplomat.uz жамоаси жорий йил 8 февраль куни Тошкент шаҳрида ташкил этган “Йил танлови-2024” маросими тўсқинликка учраган.

Ушбу ҳодиса ортидан ижтимоий тармоқларда Ўзбекистонда мустақил матбуотнинг истиқболи хусусида хавотирли фикрлар янграган.

Ўзбекистоннинг иқтидорли ёш журналистларидан бўлган Алишер Рўзиохунов 26 февраль куни оламдан ўтди. Бу ҳақда унинг дўсти ва ҳамкасби Илёс Сафаров Телеграмдаги саҳифасида маълум қилди.

“Алишер Рўзиохуновдан ажралиб қолдик. У менинг Тошкентга келиб топган энг яқин инсонларимдан бири, кўпчилик фаолиятига, билимига ҳавас қиладиган салоҳиятли журналист эди”, деб ёзди Илёс Сафаров.

32 ёшли журналистнинг ўлимига қанд касали сабаб бўлгани айтилмоқда.

Алишер Рўзиохунов Kun.uz, Gazeta.uz, Bugun.uz каби интернет нашрларида фаолият юритган.

“Иқтидорли ва қалами ўткир журналист Алишер Рўзиохунов фаолияти давомида давлат ва жамият ривожи йўлида юзлаб ижодий материаллар тайёрлаган”, дея марҳум ижодкорга таъриф берди у бир неча йил фаолият юритган Kun.uz таҳририяти.

Ҳамкасбларига кўра, Алишер Рўзиохунов бир муддат аввал журналистикадан кетган эди. Аммо унинг ўзи Фейсбук саҳифасида қолдирган постида журналистикадан кетмагани, балки танаффус олганини билдирганди.

Алишер Рўзиохунов 2018 йили Озодликнинг Прагадаги қароргоҳида меҳмон бўлган эди. У таҳририятимизнинг Ўзбекистонда матбуот эркинлиги мавзусида уюштирган суҳбатида ҳам қатнашган.

Марҳум журналистнинг жанозаси 27 февраль куни эрталаб Андижонда ўқилиши айтилган.

2024 йилда Ўзбекистон ва Покистон ўртасида товар айирбошлаш ҳажми 400 миллион доллардан ошди. Эндиликда бу кўрсаткични 2 миллиард долларга етказиш кўзланмоқда.

Ўзбекистон президенти Шавкат Мирзиёев ва Покистон бош вазири Шаҳбоз Шариф Тошкентда 26 февраль куни ўтказган музокараларда шу каби масалалар муҳокама қилинган.

Президент матбуот хизмати маълумотига кўра, учрашувда икки давлат стратегик шериклик муносабатларини янада кенгайтириш ва мустаҳкамлашнинг барча йўналишлари кўриб чиқилган.

Кейинги бир неча йилда Ўзбекистон – Афғонистон – Покистон мультимодал йўлаги орқали юк ташиш ҳажми 5 баробар кўпайган. Қўшма корхоналар сони 130 тага етган. Тошкент ва Лаҳор ўртасида тўғридан-тўғри авиақатновлар тикланган.

Имтиёзли савдо тўғрисидаги битим доирасида товарлар рўйхатини кенгайтириш, фитосанитария ва карантин талабларини, божхона тартиб-таомилларини ўзаро соддалаштириш, банклараро ҳисоб-китоблар механизмларини такомиллаштириш кабилар устувор вазифалар сифатида белгиланган.

Ўзбекистон президенти ва Покистон бош вазири, шунингдек, терроризм, радикализм, исломофобия ва хавфсизликка таҳдид солаётган бошқа замонавий хатарларга қарши курашишда саъй-ҳаракатларни бирлаштириш зарурлигини таъкидлашган.

Шаҳбоз Шарифнинг Тошкентга ташрифи якунида Ўзбекистон ва Покистон ўртасида Фан, техника ва инновациялар соҳасидаги ҳамкорлик тўғрисида битим, Дипломатик паспорт эгаларининг визасиз сафарлари тўғрисида битим, Ички ишлар вазирликлари ўртасидаги ҳамкорлик тўғрисида битим, Профессионал таълим соҳасидаги ҳамкорлик тўғрисида битим каби ҳужжатлар имзоланган.

Ўзбекистон Афғонистон ва Покистон орқали Ҳинд океани бандаргоҳларига чиқиш учун халқаро транспорт йўлаги шакллантирилишини истамоқда.

Термиз–Мозори Шариф–Кобул–Пешовар трансафғон темир йўли тўлиқ ишга туширилган тақдирда, Ўзбекистондан Покистонга юкларни бугунгидай 35 кунда эмас, балки 3-5 кунда етказиб бериш мумкин бўлади. Бир стандарт юк контейнерини манзилга етказиб бериш нархи уч баробарга арзонлайди. Мазкур йўлдан юк ташиш ҳажми йилига 10 миллион тоннага етиши мумкин.

Ўзбекистон умумий қиймати қарийб 1,5 миллиард АҚШ доллари эквивалентидаги навбатдаги суверен халқаро облигацияларини жаҳон молия бозорларида жойлаштирди.

Иқтисодиёт ва молия вазирлиги маълум қилишича, 18 ва 20 февраль кунлари куни Лондонда АҚШ долларида 7 йиллик, еврода 4 йиллик ва сўмда 3 йиллик суверен халқаро облигацияларни жойлаштириш бўйича буюртмалар қабул қилиниши эълон қилинган.

Ўзбекистоннинг халқаро облигацияларини сотиб олиш учун жами 4,2 миллиард доллар миқдорида (доллардаги облигацияларга – 2 миллиард доллар, евродагиси – 1,6 миллиард евро ва сўмдагисига 7,3 триллион сўм) буюртмалар келиб тушган.

Облигациялар бўйича қуйидаги фоиз ставкалари қайд этилган:

• 500 миллион АҚШ доллари миқдоридаги 7 йиллик облигациялар бўйича – 6,95 фоиз;

• 500 миллион евро миқдоридаги 4 йиллик облигациялар бўйича – 5,1 фоиз;

• 6 триллион сўм миқдоридаги 3 йиллик облигациялар бўйича – 15,5 фоиз.

Вазирликка кўра, халқаро облигацияларни жойлаштиришдан келиб тушган маблағлар 2025 йилги давлат бюджети тақчиллигини молиялаштириш ҳамда ипотека дастурини молиялаштириш учун тижорат банкларига ресурс ажратиш учун йўналтирилади.

Жумладан, “яшил” мақоми билан чиқарилган евродаги облигациялардан келиб тушадиган маблағлар сув тежовчи технологияларни жорий қилиш, санитар тозалаш ишларини ташкил этиш каби лойиҳаларни молиялаштириш учун сарфланади.

Доллар ва сўмда чиқарилган облигациялардан тушган маблағлар эса аҳолини уй-жой билан таъминлаш, мактаблар, мактабгача таълим муассасалари ва бошқа ижтимоий соҳа объектларини қуришга йўналтирилиши билдирилган.

Фаоллар халқаро миқёсда яна 1,5 миллиард доллар қарзлар жалб қилиниши ортидан мамлакатда маош ва нафақалар ошириладими деган саволни муҳокама қилмоқда.

Жумладан, иқтисодчи Отабек Бакиров ҳукумат облигациялар орқали 2024 йил май ойида ҳам 1,5 миллиард долларлик қарз жалб қилган бўлса-да, маош ва пенсиялар индексация қилинмаганига эътибор қаратган.

Озодлик аввал хабар қилганидек, Ўзбекистон 2020 йил ноябрь ойида тарихида илк маротаба халқаро молия бозорларида миллий валютада 2 триллион сўм ҳажмида суверен облигациялар жойлаштирганди.

Ўзбекистонда ҳайдовчиларга ҳисобланадиган жарима баллари фақатгина ЙПХ инспекторлари тузган баённомалар асосида шаклланади. Бу масалага Ички ишлар вазирлиги ЙҲХХ бошлиғи ўринбосари Эрали Бозоров 25 февраль куни Тошкентда ўтказилган матбуот анжуманида тўхталди.

“Халқимизнинг келиб тушган таклифлари ва ижтимоий ҳолатни инобатга олган ҳолда фақат йўл патрул хизмати инспектори томонидан расмийлаштирилган маъмурий баённома асосида баллик тизимга ўтилади. Қоидабузарликларни базада ҳисоблаш ИИВ ЙҲХХ томонидан электрон тарзда амалга оширади. Бу ерда инсон омили бўлмайди”, дея иқтибос келтирди ИИВ мулозимидан Kun.uz нашри.

Келгусида камера ва радарларга тушганда ёзиладиган жарималарни ҳам 12 балли тизимга қўшиб ҳисоблаш режалаштирилган.

Маълумот ўрнида: 20 февраль куни Ўзбекистон Республикаси Маъмурий жавобгарлик тўғрисидаги кодексига йўл ҳаракати хавфсизлиги тизимига доир ўзгартиришлар киритилди. Унга кўра, мамлакатда йўл ҳаракати қоидабузарликлари бўйича 12 балли жарима тизими жорий этилади.

Жарима баллари белгиланган ҳуқуқбузарликлардан бири илк марта содир этилган кундан эътиборан бир йил давомида ҳисоблаб борилади. Жарима балларининг ҳар бири бир йилдан сўнг автоматлаштирилган тарзда ечиб борилади.

Жарима баллари 12 дан ошган ҳайдовчилар камида 6 ой муддатга транспорт воситасини бошқариш ҳуқуқидан маҳрум қилинади.

Қорайтирилган ойнали транспорт воситаларидан фойдаланиш, транспорт воситалари ҳайдовчиларининг белгиланган ҳаракат тезлигини ошириб юбориши, ҳайдовчиларнинг светофор тақиқловчи сигналига бўйсунмаслиги каби ўндан зиёд қоидабузарликлар учун жарима баллари ҳисобланади.

Озодлик аввал хабар қилганидек, 20 февраль куни имзоланган қонунга мувофиқ мамлакатда йўл безорилиги учун ҳам жавобгарлик жорий этилди.

Хоразм вилояти Янгиариқ туманида ота ўз ўғлини ов милтиғи билан отиб ўлдирди. ЎзА хабарига кўра, қотиллик жорий йил 19 февраль куни содир этилган.

Туманнинг Янгиариқ маҳалласида яшаган 71 ёшли эркак аввал 51 ёшли ўғлини отиб ўлдирган, кейин эса келини ва неварасини оғир жароҳатлаган.

Жиноят иши тергов-тезкор гуруҳи томонидан фош этилгани, гумонланувчи эҳтиёт чораси сифатида қамоққа олингани билдирилган.

Маълум бўлишича, дастлабки тергов ҳаракатлари олиб борилаётган қотиллик жинояти Хоразм вилояти ҳокими Жўрабек Раҳимов, ҳуқуқни муҳофаза қилувчи органлар ва кенг жамоатчилик вакиллари иштирокида муҳокама этилган.

Ҳоким ушбу жиноятнинг келиб чиқишига сабаб бўлган омиллар дастлабки тергов ва суд органлари томонидан батафсил ўрганилиши, жиноятнинг олдини олишга масъул бўлган шахслар ҳамда қотиллик содир этилган маҳалла еттилиги фаолиятига танқидий баҳо берилишини айтган.

Оила бошлиғининг фарзандлари жонига қасд қилиши билан боғлиқ жиноятлар аввал ҳам содир этилган.

2024 йил июнь ойида Наманган вилояти Тўрақўрғон туманида яшовчи эркак унаштирилган йигитга турмушга чиқишни рад этгани сабаб ўз қизини ўлдирган.

2020 йил июнь ойида Наманганнинг Янги Замин маҳалласида яшовчи 44 ёшли эр хотини ва вояга етмагани фарзандини болта билан чопиб ўлдирган.

2018 йилда эса андижонлик ота алимент важидан 3 ёшли қизчасининг жонига қасд қилган эди.

Ботир Қудратхўжаев Ўзбекистон Республикаси фавқулодда вазиятлар вазири лавозимига тайинланган. Шу муносабат билан у Бош прокурор ўринбосари – ҳарбий прокурор лавозимидан озод этилган.

Президент матбуот хизмати маълумотига кўра, илгарироқ Ботир Қудратхўжаев номзоди Олий Мажлис Қонунчилик палатаси депутатлари томонидан маъқулланган.

ФВВ матбуот хизмати қайдича, президент фармонига мувофиқ, Қудратхўжаевга генерал-майор ҳарбий унвони ҳам берилган.

Ботир Қудратхўжаев кўп йиллардан буён прокуратура тизимида ишлаб келган. Жумладан, 2014-2016 йилларда Сурхондарё вилояти прокурори, 2016-2017 йилларда Тошкент шаҳри прокурори, 2017-2020 йилларда БП ҳузуридаги Мажбурий ижро бюроси директори, 2020-2022 йилларда Хоразм вилояти прокурори лавозимида фаолият юритган. 2022 йил ноябрида эса Бош прокурор ўринбосари – ҳарбий прокурор лавозимига тайинланганди.

2022 йил мартидан буён фавқулодда вазиятлар вазири сифатида ишлаб келган Абдулла Қўлдошевнинг нима сабабдан ишдан кетгани ва қандай вазифага тайинлангани ҳақила ҳозирча маълумот йўқ.

Ўзбекистон, Қирғизистон ва Тожикистон президентлари иштирокида илк бор уч томонлама саммит ташкил этилади.

Қирғизистон Вазирлар Маҳкамаси раиси ўринбосари Эдил Байсаловнинг Женевада БМТ Инсон ҳуқуқлари бўйича кенгаши 58-сессиясида маълум қилишича, уч давлат етакчиси Тожикистоннинг Хўжанд шаҳрида жорий йил 31 март куни учрашишади.

Қирғизистон ҳукумати мулозими саммит минтақавий ҳамкорликни мустаҳкамлашда муҳим қадам бўлишини таъкидлаган.

Учрашув Бишкек ва Душанбе ўртасидаги кўп йиллик чегара зиддияти ҳал этилган вақтга тўғри келмоқда. Жорий йил 21 февраль куни Қирғизистон ва Тожикистон расмийлари ўзаро чегарани делимитация қилиш бўйича якуний протоколни имзолашганди.

Эдил Байсалов икки давлат чегара чизиғи борасида келишганини “дипломатия ва сиёсий ироданинг тарихий ғалабаси” деб атаган.

Хўжанд саммитида президентлар Марказий Осиёда хавфсизлик, барқарорлик ва фаровонликни таъминлашга қаратилган ҳамкорликнинг асосий масалаларини муҳокама қилиши кутилмоқда.

Сўнгги вақтларда минтақа давлатлари, жумладан, Ўзбекистон, Тожикистон ва Қирғизистон ўзаро зиддиятдан мулоқот йўлига ўтгани кузатилмоқда.

Озодлик аввалроқ уч давлат бош вазирлари давлат чегаралари туташган нуқтада учрашиб, уч томонлама тадбирларни ташкил этиш билан боғлиқ масалаларни муҳокама қилгани ҳақида хабар қилганди.

Ўзбекистонлик тадбиркорлар Афғонистоннинг муҳим тармоқларига, жумладан, нефть ва газ конларини қидириш ва қазиб олиш, саноатни ривожлантириш, Саманган вилоятида цемент заводи қурилишига сармоя киритади. Бу ҳақда Ўзбекистон бош вазири ўринбосари Жамшид Хўжаев Тошкентда Афғонистон муваққат ҳукумати бош вазирининг иқтисодий масалалар бўйича ўринбосари вазифасини бажарувчи Мулло Абдул Ғани Бародар билан музокараларда маълум қилган.

Gazeta.uz нашрининг хабар қилишича, Мулло Абдул Ғани Бародар ташрифни самарали деб атаган ва Ўзбекистон расмийлари билан музокаралар чоғида савдони кенгайтириш, электр энергияси импорти, Афғонистон қишлоқ хўжалиги маҳсулотларини экспорт қилиш, транспорт инфратузилмасини ривожлантириш, темирйўл қурилиши бўйича келишувларга эришилганини таъкидлаган.

“Толибон” мулозимига кўра, электр узатиш линиясини қуриш лойиҳаси қийматини 252 млн доллардан 222 миллион долларгача камайтиришга муваффақ бўлинган.

“Савдо, энергетика, авиация, қишлоқ хўжалиги, темирйўл транспорти соҳаларида тегишли вазирлар билан бир неча бор учрашув ўтказилди. Бу йўналишларда янада олдинга силжиш мумкин”, деган Бародар.

“Толибон” мулозими 23 февраль куни Ўзбекистон билан Ҳайратон–Ҳирот темирйўли лойиҳаси бўйича ҳам келишувга эришилгани, қурилиш техник-иқтисодий асослаш якунланганидан кейин 10 кун ичида бошланишини маълум қилган.

Томонлар, шунингдек, ўнта афғон товарига ва ўнта ўзбек товарига божхона тўловларини нолга туширишга келишишган.

Озодлик аввалроқ Ўзбекистон бош вазири Абдулла Арипов Тошкентда Толибон шакллантирган афғон ҳукумати раҳбарининг ўринбосари в.б. Мулло Aбдул Ғани Бародар билан музокара ўтказгани ҳақида хабар қилган эди.

Ўзбек расмийлари “Толибон” ҳаракати вакиллари 2021 йил 15 августида Кобулни эгаллаб олганидан буён улар билан орани бузмасликка уриниб келишади. Расмий Тошкент толиблар ҳокимият тепасига келганидан буён бир неча бор Афғонистонга инсонпарварлик ёрдамини йўллаган.

Толиблар ҳокимиятга келганидан буён дунёдаги мамлакатлардан биронтаси у шакллантирган ҳукуматни расман тан олган эмас.

Ўзбекистон Афғонистоннинг Тошкентдаги элчихонасини 2024 йил февраль ойида янги маъмурият ихтиёрига топширган.

Ўзбекистон ташқи ишлар вазири Бахтиёр Саидов 2024 йил 9 октябрь куни Афғонистоннинг Тошкентдаги дипломатик миссияси янги раҳбари Абдул Ғаффор Теравийни қабул қилган.

Ўтган йил охирида Афғонистон миллий электр энергияси ширкати (DABS) Ўзбекистон билан электр энергияси импорти бўйича келишув муддатини узайтирганди.

АҚШ фуқаролик атом энергияси технологиялари ҳамда муҳим фойдали қазилмалар йўналишида сармоя киритиш учун Ўзбекистон билан ҳамкорлик қилиш истагида.

Давлат департаменти матбуот хизмати қайдича, Ўзбекистон ташқи ишлар вазири Бахтиёр Саидов ва АҚШ давлат котиби Марко Рубионинг ўтган ҳафта бўлиб ўтган телефон мулоқотида шу масала ҳам муҳокама этилган.

Марко Рубио Бахтиёр Саидов билан суҳбатда Вашингтон Ўзбекистоннинг мустақиллиги, суверенитети ва ҳудудий яхлитлигини қўллаб-қувватлашини яна бир карра таъкидлаган.

Вашингтон, шунингдек, Тошкентга ноқонуний миграцияга чек қўйиш ва терроризмга қарши курашдаги ҳамкорлик учун миннатдорлик билдирган.

Аввалроқ Ўзбекистон ташқи ишлар вазирлиги тарқатган хабарномада “икки ва кўп томонлама алоқаларнинг муҳим мавзулари” муҳокама қилингани билдирилгани ҳолда, атом энергияси технологиялари ҳамда муҳим фойдали қазилмалар масалалари кўтарилгани очиқланмаган эди.

Озодлик аввал хабар қилганидек, Ўзбекистон 2024 йил июнь ойида “Росатом” давлат корпорацияси билан кичик қувватли АЭС қурилишига доир ҳужжатни имзолаган. 330 МВт қувватга эга станция (ҳар бири 55 МВт қувватга эга олтита реактор) Жиззах вилояти ҳудудида барпо этилади.

Ўзбекистон Россия билан биргаликда КҚАЭС қуришга киришаётгани маҳаллий фаолларнинг эътирозига сабаб бўлган. Жамоатчилик бу лойиҳа Кремль қўлида Ўзбекистонга қарши “шантаж қуроли” бўлиб қолишидан хавотир билдирган.

АҚШнинг Ўзбекистондаги элчиси Жонатан Хеник ҳам Ўзбекистон ҳукуматини АЭС қурилишида техник ҳамкорларни танлашда ўта эҳтиёткор бўлишга чақирганди.

Европа Иттифоқи Украинага қарши уруш бошланганининг уч йиллиги муносабати билан Россияга қарши ўн олтинчи санкциялар пакетини қабул қилди.

Брюссель бу гал Украинанинг ҳудудий яхлитлиги, суверенитети ва мустақиллигига путур етказувчи хатти-ҳаракатларга алоқадорлик сабаб 48 нафар жисмоний ва 35 нафар юридик шахсга нисбатан чеклов чоралари қўллаган.

“Мана, уч йилки, Россия ўзига тегишли бўлмаган ерни тортиб олиш мақсадида Украинани аёвсиз бомбаламоқда... Ким босқинчи экани, уруш учун ким жавоб бериши ва товон тўлаши кераклиги борасида шак-шубҳа йўқ. Санкцияларнинг ҳар бир пакети Кремлни уруш олиб бориш учун маблағдан маҳрум этади”, деган Европа Иттифоқи дипломатик маҳкамаси раҳбари Кая Каллас.

ЕИнинг санкциялар рўйхатига Ўзбекистоннинг Uzstanex компанияси ҳам киритилган.

Kun.uz нашрининг ёзишича, StanexGroup ҳолдинги таркибига кирувчи мазкур ширкат Ўзбекистон, Қозоғистон, Қирғизистон, Тожикистон ва Туркманистонда механик дастгоҳларнинг улгуржи савдо билан шуғулланади. Устав фонди 65 миллион сўм. Ягона таъсисчиси – Абрамов Василий Витальевич, директори – Бойцов Дмитрий Александрович. Ширкат офиси Тошкент шаҳри Яшнобод туманида жойлашган.

2024 йил октябрь ойида АҚШ молия вазирлиги ҳам “Россияга қарши санкцияларни четлаб ўтишда иштироки учун” Uzstanex компаниясига нисбатан санкция киритган.

2023 йил 23 июнида Ўзбекистондаги Alfa Beta Creative ва GFK Logistic Asia ширкатлари ҳам АҚШ, ЕИ ва Япония санкциялари рўйхатига киритилган эди.

2023 йил 18 декабрда эса Тошкентдаги Mvizion МЧЖ ЕИ томонидан “қора рўйхат”га тиркалганди.

Озодлик аввал хабар қилганидек, ЕИнинг санкциялар бўйича махсус вакили Дэвид О’Салливан Ўзбекистон ҳукуматини санкцияларни четлаб ўтишда Россияга ёрдам беришнинг оқибатларидан огоҳлантирган.

Ғарб матбуоти ҳам санкция остидаги товарлар Хитойдан Марказий Осиё мамлакатлари орқали Россияга келаётганига эътибор қаратганди.