30 март куни Бирлашган Араб Амирликлари суди 2024 йилнинг ноябрь ойида исроиллик раввин Цви Коганни ўлдиришда айбланган уч нафар Ўзбекистон ватандошини ўлим жазосига ҳукм қилди.
Ўзбекистон Ташқи ишлар вазирлиги судланувчиларнинг апелляция қилиш имкони мавжудлигини эслатди.
ТИВ: Бу ҳали якуний ҳукм эмас
Ўзбекистон Ташқи ишлар вазирлиги Амирлик суди уч ўзбекистонликни ўлим жазосига ҳукм қилганини тасдиқлади.
Ташқи ишлар вазирлиги матбуот котиби Аҳрор Бурҳоновнинг маҳаллий нашрларга билдиришича, ўлимга ҳукм қилинган уч Ўзбекистон ватандошида апелляция қилиш имкони мавжуд:
"Бу ҳали якуний ҳукм эмас. БААда ўлим жазоси ҳукми устидан автоматик равишда апелляция қилинади ва Федерал Олий суднинг жиноят ишлари бўйича коллегиясига юборилади".
WАМ ахборот агентлиги 30 март куни Абу Даби суди 40 яшар раввин Цви Коганни ўлдиришда айбланган уч ўзбекистонликнинг ўлим жазосига ҳукм қилингани ҳақида хабар берди:
“Абу-Даби Федерал апелляция суди Давлат хавфсизлик палатаси бир овоздан айбланувчиларни Исроил ва Молдова фуқаролиги бўлган Сви Коганнинг ўғирланиши ва ўлдирилишида айбдор деб топди. Уч нафар айбланувчи ўлим жазосига ҳукм қилинди, айбланувчиларга ёрдам берган тўртинчи судланувчи эса умрбод қамоқ жазосига ҳукм қилинган”.
Тўртинчи судланувчи шахсига оид маълумотлар маълум эмас. Унинг қайси давлат фуқароси экани номаълум.
Аввалроқ Бирлашган Араб Амирликлари Ички ишлар вазирлиги раввин ўлимида айбланиб, ушланган уч ўзбекистонликнинг исм-шарифини эълон қилган.
Булар, 29 яшар Маҳмуджон Абдураҳим ўғли Кенжабоев, 34 яшар Азизбек Комилович Исмоилов ва 29 яшар Олимбой Тоҳирович Давлатёров.
"Судланувчилар қийноқ остида айбловларни тан олишгандир?"
Франциядаги Марказий Осиё инсон ҳуқуқлари ташкилоти раҳбари Надежда Атаева БААда уч ўзбекистонликка қарши ўтган маҳкаманинг шаффоф ўтмагани сабаб кўплаб саволлар жавобсиз қолганидан хавотир билдиради:
"Раввин ўлимида айбланганларга берилган жазо жиноятга ярашадек туюлиши мумкин, бироқ суд ушбу шахсларни қандай асосда айбдор деб топгани жамоатчиликка қоронғи.
Ўзбекистон томони уч судланувчи Ўзбекистон ватандошлари эканини тасдиқлади. Бироқ бу ерда жавобсиз саволлар анчагина. Маҳкамада Ўзбекистон дипломатик миссияси вакиллари иштирок этганми? Судланувчиларга ҳуқуқий кўмак кўрсатиш учун ҳаракат қилиндими? Суд жараёни қандай кечди? Судланувчиларнинг кўрсатмаларини ким тинглади? Бу шахслар ҳақиқатан ҳам ушбу жиноятда айбдорми ёки йўқлигини жамоатчилик қандай билиши мумкин? Балки судланувчилар қийноқлар остида айбловларни тан олишгандир? Бу шахслар жиноятни бўйнига олган тақдирда ҳам, уларнинг қонунга хилоф ҳаракатларини исботловчи далиллар судга тақдим этилиши керак эди. Мана нима учун бу каби маҳкама жараёнлари шаффоф ўтиши жуда муҳим".
Мотивлар номаълум қолмоқда
Исроил ва Молдова фуқароси бўлган раввин Цви Коган 2020 йилдан буён БААда истиқомат қилиб, яҳудийларнинг “Хабад Любавич” ортодоксал диний ҳаракатини тамсил этиб келган. У ўтган йилнинг 21 ноябрь куни йўқолиб қолган ва орадан уч кун ўтиб Ал-Айн шаҳарчасида унинг жасади топилган.
Уч ўзбекистон ватандоши раввин ўлимидан сўнг Туркияда ушланиб, Амирликка топширилган.
Айни пайтда жиноят мотивлари маълум эмас. Ўзбекистон Ташқи ишлар вазирлиги ва Ўзбекистоннинг Дубайдаги бош консулхонаси шу пайтгача бу борада бирор маълумотни очиқламаган.
Амирлик суди айбланувчиларни “террорчилик ниятида қасддан одам ўлдиришда айблаган”.
Исроил Бош вазири Бинямин Нетаняху қотилликни «антисемит террористик ҳаракат» деб атаган. Исроил Коган яҳудий бўлгани учун нишонга олинганини айтиб келади.
Раввин ўлимида айбланиб, уч ўзбекистонликнинг ушланиши ортидан БААда яшаётган ўзбек муҳожирларига қарши рейдлар ўтказилди.
Жумладан, ўтган йилнинг 25 ноябр куни Дубайда ўтказилган рейдда бир гуруҳ ўзбекистонликлар ушланиб, депорт қилинди. Беш нафар ўзбекистонликка қарши экстремизм билан боғлиқ жиноят иши қўзғатилди. Ҳозирча бу ўзбекистонликларнинг кейинги тақдири маълум эмас.
Раввин ўлимидан сўнг Ўзбекистон ватандоши бўлган эркакларнинг БААга кириши қийинлашди. 30 ноябрь куни ўнлаб ўзбекистонлик Абу Дабига киритилмасдан Тошкентга қайтарилди.
"Раввин ўлимида айбланганлар маҳкамасида шаффофликнинг йўқлиги Бирлашган Араб Амирликларида яшаётган Ўзбекистон ватандошлари учун жиддий оқибатларга олиб келиши мумкин. Ўзбекистон дипломатик миссиясининг пассив позицияси эса нафақат Амирлик, балки бошқа мамлакатларга ҳам ўзбекистонликларнинг саёҳатлари чекланиши, виза сўровлари рад этилишига олиб келиши мумкин", дейди Марказий Осиё инсон ҳуқуқлари ташкилоти раҳбари Надежда Атаева.
БАА Тошкентга топширган ўзбек
Шу ўринда Амирлик билан боғлиқ яна бир хабарни эслаб ўтсак: Ўтган йилнинг декабрида Дубайда ҳибсга олинган Ўзбекистон ватандоши Улуғбек Шодмонов 8 январь куни Тошкентга экстрадиция қилинди.
Тошкентдаги норасмий “офис” билан боғлиқ суриштирувларда номи ўртага чиққан Шодмонов Президент давлат хавфсизлик хизмати раҳбарининг эндиликда собиқ ўринбосари Отабек Умаров атрофидаги муҳим шахс деб ишонилади.
Ўзбекистондаги цемент бизнесининг қарийб ярмини назорат қилиши айтилган Шодмонов Бирлашган Араб Амирликларининг “олтин” визаси асосида оиласи билан Дубайга кўчиб ўтган ва бир неча йилдан буён у ерда яшаётган эди.
Форум