Ўзбекистон билан Афғонистон чегарасида жойлашган “Айритом” божхона постида 9 февраль куни текширилган юк машинаси ичидан 612 кг гашиш моддаси топилган. Бу ҳақда Ўзбекистон Давлат божхона хизмати маълумот тарқатди.

Хабарномада наркотик моддалар 13,5 тонна оғирликдаги юк ичида бўлган 2986 дона супурги дастаклари орасидан топилгани айтилган.

“Дастлабки ҳисоб-китобларга кўра, мазкур гиёҳвандлик воситасининг қора бозорлардаги нархи тахминан 16,5 млн АҚШ долларидан ошади”, дея қайд этишган божхона қўмитаси ходимлари айни пайтда ҳолат юзасидан терговга қадар текширув ҳаракатлари давом эттирилаётганини қўшимча қилишган.

“Centrum Air” авиакомпаниясининг Мадина – Наманган йўналиши бўйича парвоз қилаётган MFX3338 рейси экипажи 10 февраль тонгида Фарғонадаги муқобил аэродромга йўл олишга қарор қилган. Бу ҳақда Uzbekistan Airports ширкати матбуот хизмати маълумот тарқатди.

Қайд этилишича, учоқнинг муқобил аэропортга йўналишига Наманган аэропортида кузатилган ноқулай об-ҳаво шароити (туман) сабаб бўлган.

Хабарномада учоқ душанба куни маҳаллий вақт билан соат 7:53 да Фарғона аэропортига бориб қўнгани қўшимча қилинган.

Ўзбекистонда 2025 йил охиригача АИ-80 русумли автомобиль ёқилғисидан фойдаланиш ва сотишни чеклаш учун “барча куч ва ресурслар сафарбар этиш” кўзда тутилган. Бу ҳақда президент Мирзиёев томонидан жорий йил 7 февралида имзоланган “Ўзбекистон – 2030” стратегиясини “Атроф-муҳитни асраш ва “яшил иқтисодиёт” йилида амалга оширишга оид давлат дастури тўғрисида”ги фармонида билдирилган.

Ҳужжатга мувофиқ, аҳолини “сифатли, экологик тоза ва арзон ёқилғи билан таъминлаш” ҳақида топшириқ берилган. Бу чора Ўзбекистондаги экологик вазиятни яхшилашга қаратилгани айтилмоқда.

Фармон билан мамлакатнинг барча ҳудудларида жойлашган иссиқлик ва электр энергияси ишлаб чиқариш корхоналарига ёқилғи сифатида мазутдан фойдаланишни тўлиқ тақиқлаш ҳам кўзда тутилган.

Президент Мирзиёев ўтган йил январь ойи охирида бўлиб ўтган видеоселектор мажлисида бош вазир Абдулла Ариповга 2025 йилдан Аи-80 бензинидан тўлалигича воз кечиш ҳақида топшириқ берган эди. Ундан аввал эса Экология вазирлиги баёнот тарқатиб, “халқаро стандартларга тўғри келмайдиган АИ-80 маркали бензиндан фойдаланаётган техника воситалари атмосферага меъёридан ортиқ зарарли ташламалар чиқараётгани”ни урғулаганди.

Вазирлик Тошкент ҳавосига кўрсатилаётган салбий таъсирни камайтириш мақсадида бир қатор фавқулодда чораларни таклиф қилган бўлиб, улар орасида “Евро-4” стандартидан паст экологик тоифадаги мотор ёқилғидан (АИ-80 русумли бензин) фойдаланишни тақиқлаш ҳам бор эди.

Экологик жиҳатдан зарарли деб топилган АИ-80 кўплаб мамлакатлар, шу жумладан, Ўзбекистонга қўшни бўлган Қирғизистон ва Тожикистонда тақиқланган. 2017 йилда 80 октанли бензин Қозоғистонда ҳам йўқолган - у фақат махсус буюртма асосида ишлаб чиқарилади, холос.

АИ-80 бензини бошқа русумдаги бензинлардан арзонроқ бўлгани учун харидоргир бўлиб ҳисобланади. Ўтган йилнинг 5 ноябрида АИ-80 русумли бензиннинг 1 тоннаси 9 миллион 998 минг сўмгача кўтарилган. Бу 2023 йил ноябридаги нархдан (7 миллион 375 минг сўм) 26,2 фоизга қимматдир.

Тошкент вилоятининг Зангиота туманида Spark русумли автомашинани бошқариб кетаётган Сирдарё вилояти прокурорининг катта ёрдамчисининг ёнидан “Зардекс” номли 50 дона кучли таъсир қилувчи дори воситаси топилган. Бу ҳақда Ўзбекистон Давлат хавфсизлик хизмати маълумот тарқатди.

ДХХ қайдича, бунинг ортидан тезкор тадбир давом эттирилиб, прокуратура ходимига дори сотгган самарқандлик 27 ёшли фуқаро ҳам Тошкент шаҳрида қўлга олинган, ундан ҳам 300 дона “Зардекс” дори воситаси ашёвий далил ўлароқ мусодара этилган.

Инсон миясига кучли таъсир кўрсатадиган бу дори воситалари Ўзбекистонга Қирғизистондан ноқонуний йўллар билан олиб келингани, айни пайтда ҳолат юзасидан терговга қадар текширув ҳаракатлари олиб борилаётгани билдирилган.

Аввалроқ президент администрацияси ҳузуридаги Наркотикларни назорат қилиш миллий маркази директори Равшан Маматов Ўзбекистонда “дорихона наркоманияси” авж олгани юзасидан хавотир изҳор қилган эди. Ўсиш динамикасидан ташвиш билдирган Маматов наркожиноятлар билан боғлиқ аниқ рақамларни очиқлаган эмас.

Муқаддам “Юксалиш” умуммиллий ҳаракати 2019 йил якунида Ўзбекистонда наркотик воситалари билан боғлиқ 5 мингдан зиёд жиноят содир этилгани, наркодиспансерда ҳисобда турганлар сони эса 5698 нафарга етгани ҳақида маълумот тарқатган эди.

Ўзбекистон ташқарисида фаолият юритиб келаётган Eltuz.com нашрининг YouTube видеопорталидаги канали ўчириб қўйилди.

Нашр бош муҳаррири Қудрат Бобожонга кўра, YouTube каналида Ўзбекистон бош вазири Абдулла Арипов ҳақида ёйинланган танқидий материаллардан сўнг “олдинига турли арзимас сабаблар билан шикоят қилинган”, журналистлар бу шикоятлар асоссизлигини исботлагани ортидан киберҳужум йўли билан “каналга порно ва террор мазмунидаги контентларни юклаб, канални вақтинча ўчиришга муваффақ бўлинган".

Қудрат Бобожон мазкур YouTube каналининг “Ўзбекистонда болалар меҳнати ҳақида туркум лавҳалар қилган, мавжуд режим ичидаги коррупционерларни ревизор дастури орқали фош қилган, “Автобус” каби ҳажвий дастурлар ва ҳар жума бериладиган мультипликацион программаларда” муштарий билан бирга мушоҳада юритадиган канал бўлганини қайд этган.

Нашр иддаосига кўра, каналга қарши уюштирилган ҳужумларга “бош вазир Абдулла Ариповнинг коррупцияси фош қилинган контентлар” сабаб бўлган.

Швецияда рўйхатдан ўтказилган “Элтуз” нашри 2015 йилдан буён фаолият юритиб келади. Муассисларга кўра, нашр “либерал-демократик қадриятлар¸ сўз ва ифода эркинлиги, тараққиëт тарафдорлари ва жамиятни яхши томонга ўзгартириш истагида бўлганлар учун минбар” вазифасини ўташ мақсадида ташкил этилган. Айни пайтда нашр сайти ҳамда ижтимоий тармоқлардаги, хусусан, Фейсбук ва Телеграмдаги саҳифалари ишлаб турибди.

“Маъно” тадқиқотчилик ташаббуслари маркази директори Бахтиёр Эргашев Ўзбекистонга “хорижий агентлар” тўғрисидаги қонун зарур, деб ҳисоблайди. Унинг фикрича, бу қонун хориждан келаётган пуллар ва ахборот мустақиллигини таъминлаш учун лозим.

Эргашевга кўра, бу каби қонунлар АҚШ, Франция, Россия, Грузия ва Қирғизистонда мавжуд. У қонун жазолаш характерига эга бўлмаслиги, бор-йўғи молиялаштиришда шаффофликни таъминлаши лозимлигини таъкидлаган.

Бахтиёр Эргашев ёш экспертлар орасида бундай ташаббусга талаб борлиги, бироқ уни эҳтимолий қабул қилиш муддати ноаниқлигича қолаётганини қайд этган.

“Хорижий агентлар” тўғрисидаги қонун постсовет ўлкалари ичида биринчи бўлиб Россияда қабул қилинган бўлиб, у ҳуқуқбонлар ва халқаро жамоатчилик томонидан режим мухолифлари ва ўзгача фикрлиларга қарши қўлланиладиган репрессив қонун ўлароқ танқид қилиб келинади. Россия ортидан бу каби қонун ўтган йилнинг август ойида Грузияда ҳам кучга кирган. “Хорижий таъсир шаффофлиги тўғрисида”ги бу қонун қабул қилинганидан кейин Тбилисида ва мамлакатнинг бошқа шаҳарларида фуқаролик жамияти фаоллари ва мухолифатчиларнинг норозилик намойишлари бошланишига сабаб бўлган.

Грузияда “хорижий агентлар”га оид қонун қабул қилинганидан кейин Европа Иттифоқи унинг муҳтамал интеграцияси жараёнини тўхтатиб, Тбилисига 30 миллион евро миқдоридаги ҳарбий ёрдамни музлатиб қўйган. Ўша пайтда АҚШ ҳам бу мамлакатга бериладиган 95 миллион долларлик молиявий ёрдамни тўхтатганини эълон қилган эди.

Хорижий ўлкага чиқиб кетиб, 3 ойдан кўпроқ вақт давомида Ўзбекистонга қайтмаган фуқароларга пенсия бериш вақтинча тўхтатилади. Бу ҳақда Пенсия жамғармаси матбуот хизмати эслатган.

Пенсия жамғармаси қайдича, пенсионер Ўзбекистонга қайтиб келганидан кейинунга вақтинча тўхтатилган пенсиясини қайта тўлаш бошланади.

Хабарномада фуқаро Ўзбекистонга қайтиб келганидан сўнг олинмай қолган ойлардаги пенсиясининг 24 ойлигини олиш ҳуқуқига эгалиги билдирилган.

Маҳаллий қонунчиликка мувофиқ, пенсия тўлаш фуқаро вафот этганда, пенсияга ҳуқуқлар йўқолганда, хорижий ўлкадан пенсия олишга оид ҳолат аниқланганда ёки доимий яшаш учун чет элга чиқиб кетганда, озодликдан маҳрум этилганда ҳам тўхтатилиши мумкин.

Ўзбекистонда ёшга доир энг кам пенсия миқдори ўтган йилнинг 1 сентябридан бошлаб ойига 834 минг сўм (тақрибан 65 АҚШ доллари) этиб белгиланган. Бу миқдор мамлакатнинг минтақадаги қўшнилари бўлмиш Қозоғистон (110 доллар) ва Қирғизистондагидан (80 доллар) камроқ, Тожикистондагидан (18 доллар) эса кўпроқдир.

Гулнора Каримовага алоқадор жиноят иши доирасида 182 миллион доллар миқдоридаги маблағ Швейцариядан Ўзбекистонга қайтарилади. Бу ҳақда маълум қилган Адлия вазирлиги матбуот хизмати мазкур маблағ Ўзбекистон ҳукумати ва Швейцария федерал кенгаши ўртасида имзоланган битим доирасида қайтарилишини урғулаган.

Вазирлик қайдича, “Мусодара қилинган активларни тақсимлаш тўғрисидаги битим” 6 февраль куни Ўзбекистон адлия вазири Акбар Тошқулов ҳамда Швейцариянинг Ўзбекистондаги фавқулодда ва мухтор элчиси Константин Оболенский ўртасида имзоланган.

Адлия вазирлиги қайтариладиган 182 миллион доллар Ўзбекистоннинг “айрим фуқаролари томонидан ноқонуний орттирилган бўлиб, 2012 йилда Швейцария Бош прокуратураси томонидан Г. Каримовага нисбатан қўзғатилган жиноят иш юритуви доирасида тўлақонли мусодара қилинган”ига эътибор қаратган.

Маблағ БМТнинг Uzbekistan Vision 2030 Fund кўп шериклик траст жамғармаси орқали қайтарилиши кўзда тутилган.

Мазкур жамғарма орқали Швейцария ҳудудида мусодара қилинган ноқонуний орттирилган активларни Ўзбекистонга қайтаришга оид битим 2022 йил 16 августида имзоланган эди. Илк битим доирасида 131 миллион доллар миқдоридаги маблағни Ўзбекистонга қайтариш назарда тутилган. Вазирлик хабарномасига мувофиқ, иккинчи битим билан Ўзбекистонга қайтарилган маблағларнинг жами миқдори 313 миллион долларга етади.

Хабарномада Швейцариядан қайтарилаётган маблағлар “Ўзбекистон аҳолисининг манфаатлари учун, хусусан соғлиқни сақлаш ва таълим соҳаларида ижтимоий аҳамиятга молик лойиҳаларни амалга оширишга йўналтирилиши” таъкидланган.

Ўзбекистоннинг аввалги президенти Ислом Каримовнинг қатор иқтисодий жиноятларда айбланиб, 13 йилдан кўпроқ қамоқ муддатини ўтаётган тўнғич қизи Гулнора Каримова 2024 йил охирида Тошкентдаги аёллар қамоқхонасидан 42-сонли манзил колонияга ўтказилгани ҳақида Озодлик аввалроқ хабар қилган.

Бир пайтлар Ўзбекистонни чорак асрдан кўпроқ вақт қаттиққўллик билан бошқарган отасининг сиёсий меросхўри сифатида кўрилган Гулнора Каримова охирги марта 2020 йили Тошкент шаҳар суди томонидан 13 йилу 4 ойга озодликдан маҳрум қилинган эди.

У жиноий уюшма тузиш, товламачилик, ўзлаштириш ва растрата йўли билан талон-торож қилиш, жиноий фаолиятдан олинган даромадларни легаллаштириш ва бошқа жиноятларни содир этганликда айбдор, деб топилган.

Гулнора Каримова Европа ва АҚШдаги қатор халқаро жиноят ишлари ва суриштирувлар фигуранти саналади.

Ўзбекистон Бош прокуратураси ҳисоб-китобича, Каримова давлат ва одамларга 1 триллион 270 миллиард 200 миллинн сўм, 1 миллиард 651,8 миллион АҚШ доллари, 26,1 миллион евро миқдорида зарар келтирган.

Тошкент шаҳрида ноқонуний биноларни бузишнинг янги тўлқини бошланди. Gazeta.uz нашри хабарига кўра, айни кунларда бутун пойтахт бўйлаб кўп йиллар давомида турган, лекин ҳозирда ноқонуний деб топилган бинолар, хусусан, кафеларнинг ёзги террасалари демонтаж қилинмоқда.

Юнусобод туманидаги Nice Joy кафесининг ёзги террасаси ҳам ҳокимлик, кадастр органлари ва Мажбурий ижро бюроси ходимлари талаби ортидан бузиб ташланган.

Nice Joy директори Илҳом Вофаев шаҳар хизмати ходимлари олдиндан огоҳлантирмай келгани, конструкцияни 24 соат ичида олиб ташлашни буюрганини айтган. Унинг сўзларига кўра, кафе маъмурияти аввалроқ ердан фойдаланиш ҳуқуқини олишга ҳаракат қилган, бироқ уринишлар бесамар кетган. Муассаса раҳбари қурилмани сақлаб қолиш учун аҳоли розилиги ҳам фойда бермаганини айтган.

Бир муддат аввал Тошкент шаҳри ҳокимлиги “ихтисослаштирилган хизматлар томонидан ноқонуний қурилмаларни бартараф этиш ишлари” олиб борилаётгани ҳақида маълумот тарқатганди.

Ҳокимликка кўра, бундай объектлар ирригация тизимини бузади, транспорт воситаларига халал беради ва яшил майдонларга киришни тўсади.

Тадбиркорлар эса ижтимоий тармоқларда мулк ҳуқуқини ҳурматсиз қилмаслик, объектларни қонуний тартибда расмийлаштиришга тўсқинлик ҳолатларидан шикоят қилган.

Бундан аввал ҳам пойтахтда ноқонуний биноларни бузиш кампаниялари ўтказилган.

Озодлик “снос”га тушган мулки учун давлатдан товон пулини ололмаётган фуқаролар муаммосини кўп марта кўтариб чиққан.

“Снос”ларни ҳуқуқ фаоллари Ўзбекистонда мулк ҳуқуқи бузилиши рамзи сифатида таъкидлашади.

Жорий йилнинг 3-4 февраль кунлари Ўзбекистонда ўтказилган “Қорадори” тадбирида 112 кг дан ортиқ гиёҳвандлик воситалари (героин, опий, гашиш, синтетик турдаги гиёҳвандлик воситалари) ва 8 мингдан зиёд кучли таъсир қилувчи моддалар тарқатилиши олди олинган. Бу ҳақда Ички ишлар вазирлиги матбуот хизмати маълумот тарқатди.

Вазирликка кўра, икки кун ичида ДХХ билан ҳамкорликда гиёҳвандлик ва кучли таъсир қилувчи дори воситаларининг ноқонуний муомаласи билан шуғулланиб келаётган шахслар ва жиноий гуруҳлар фаолиятига чек қўйиш мақсадида жами 653 та махсус тадбир ўтказилган.

Гиёҳвандлик воситаларининг ноқонуний муомаласидан олинган 287 минг 460 доллар ва 569 миллион сўм миқдоридаги пул маблағлари далилий ашё сифатида расмийлаштирилган.

Тадбирлар доирасида 175 та тиғ, 58 та бита, 24 та кастет ва 77 та қурол ҳам мусодара қилинган.

ИИВ қайдича, қўзғатилган 222 та жиноят иши доирасида 228 нафар шахс жиноий, 64 нафар шахс маъмурий жавобгарликка тортилган. 47 нафар қидирувдаги шахслар ушланган. 357 нафар шахс билан профилактик суҳбат ўтказилиб, уларнинг 231 нафари расман огоҳлантирилган.

ИИВ криминоген вазиятни барқарорлаштириш борасидаги тезкор тадбирлар бошқа йўналишларда ҳам давом эттирилишини билдирган.

Ўзбекистон Давлат божхона қўмитаси маълумотига кўра, 2024 йил мобайнида мамлакатга бир тоннадан ортиқ гиёҳвандлик моддалар олиб кирилишининг олди олинган.

Аввалроқ Наркотикларни назорат қилиш миллий маркази директори Равшан Маматов Ўзбекистонда 2019−2024 йиллар оралиғида наркожиноятлар сони икки бараварга кўпайганини маълум қилиб, мамлакатда “дорихона наркоманияси” авж олганидан хавотир изҳор қилган эди.

Жиноят ишлари бўйича Наманган вилояти Чуст тумани суди раиси Жаҳонгир Якубхўжаев ёрдамчиси Шоҳжаҳон Яхшибоевни калтаклаб, унга жароҳат етказди. Kun.uz нашрининг ёзишича, ҳодиса 2025 йил 18 январь куни содир бўлган.

Суд раиси Жаҳонгир Якубхўжаев ёрдамчиси Шоҳжаҳон Яхшибоевни ўз хизмат хонасида калтаклаган. Ёрдамчи Тўрақўрғон тумани тиббиёт бирлашмасига мурожаат қилган. Тиббий маълумотномада Яхшибоев юз соҳаси юмшоқ тўқималари лат ейиши тан жароҳати олгани кўрсатилган.

Бош прокуратура матбуот хизмати ушбу ҳодиса юз берганини тасдиқлаган ва ҳолат юзасидан Чуст тумани прокуратураси терговга қадар текширув ҳаракатлари олиб бораётганини билдирган.

Муштумзўрликка доир бошқа тафсилотлар очиқланган эмас.

Судьялар олий кенгаши матбуот хизмати жиноят ишлари бўйича Чуст туман суди раисининг хатти-ҳаракатларига оид хабар юзасидан хизмат текшируви тайинлангани, унинг натижаси бўйича қўшимча ахборот берилишини маълум қилган.

Ўзбекистон қонунчилигига мувофиқ судьянинг бу қилмиши МЖтКнинг 52-моддаси (енгил тан жароҳати етказиш) билан малакаланиши мумкин. Бу моддада жарима жазоси кўзда тутилган. Аммо дахлсизлик мақомига эга судьяни тегишли судьялар малака ҳайъатининг хулосаси олинмай маъмурий жавобгарликка тортиш мумкин эмас.

Ўзбекистонда 1 майдан эътиборан электромобиллар учун утилизация йиғими тўрт бараварга қадар оширилади.

Вазирлар Маҳкамаси жорий йил 31 январда қабул қилган “Электродвигателга эга бўлган транспорт воситалари аккумулятор батареяларини утилизация қилиш инфратузилмасини ташкил этиш ишларини молиялаштириш бўйича қўшимча чора-тадбирлар тўғрисида” қарорга маҳаллий матбуот ва жамоатчилик бир неча кун ўтиб эътибор қаратмоқда.

Ушбу ҳужжатга мувофиқ, ишлаб чиқарилган муддатидан бошлаб уч йилдан ортиқ бўлмаган электромобиллар учун йиғим БҲМнинг 30 бараваридан 120 бараварига (45 миллион сўм) оширилмоқда.

Ишлаб чиқарилган муддатидан бошлаб уч йилдан ортиқ бўлган электромобиллар учун йиғим БҲМнинг 210 баравари (ҳозирда БҲМнинг 90) баравари) ёки 78,75 миллион сўмни ташкил қилади.

Қарорда утилизация йиғимини ошириш таклифи Инвестициялар, саноат ва савдо, Иқтисодиёт ва молия ҳамда Экология, атроф-муҳитни муҳофаза қилиш ва иқлим ўзгариши вазирликлари томонидан тайёрлангани қайд этилган.

Ҳукумат ушбу қадамни “яшил” технологиялардан фойдаланишни кенгайтириш, электромобилларнинг яроқсиз ҳолга келиб қолган батареяларининг атроф-муҳитга кескин зарар етказмаган ҳолда утилизация қилинишини таъминлаш ҳамда соҳада маҳаллийлаштириш ишларини янада жадаллаштириш мақсадлари билан асослаган.

Жамоатчилик муҳокамасига қўйилмай қабул қилинган бу қарор фаолларнинг кескин эътирозига сабаб бўлди. Иқтисодчи Юлий Юсупов бу ҳолатни “улкан бюрократик йиртқич махлуқнинг Ўзбекистон иқтисодиётини ютиб юбориши”га менгзатди.

Иқтисодчи Отабек Бакиров эса ҳукуматнинг ушбу қарори ЖСТга кириш музокараларига салбий таъсир этишидан огоҳлантирди.

Озодлик аввал хабар қилганидек, Ўзбекистонда 2024 йил ноябрь ойида электромобиллар учун электромагнит мослашувчанлиги бўйича текширув талаби жорий этилган ва таҳлилчилар бу талабни электромобиллар импорти учун навбатдаги сунъий тўсиқ ўлароқ баҳолашган эди.

Расмий статистикага кўра, 2024 йилда Ўзбекистонда илк бор электромобиль ва гибрид автомобиллар импорти ҳажми бензинда ҳаракатланувчи автомобиллардан ошди. Ўтган йили мамлакатга хориждан 32928 дона бензинда ҳаракатланувчи, жами 41575 дона гибрид (17480) ва электр автомобиллар (24095) келтирилган.

Ўзбекистон Малайзия билан муносабатларни стратегик шериклик даражасига олиб чиқиш ниятида. Бу ҳақда президент Шавкат Мирзиёев 5 февраль куни Куала-Лумпур шаҳрида ташкил қилинган қўшма бизнес форумда маълум қилди.

Маҳаллий матбуот бу Ўзбекистон президентининг Малайзияга сўнгги 20 йил ичидаги илк расмий ташрифи эканини урғуламоқда.

Президент матбуот хизмати қайдича, Малайзия бош вазири Анвар Иброҳимнинг таклифига кўра ушбу мамлакатга ташриф буюрган Мирзиёев электроника ва яримўтказгичлар, сунъий интеллект, рақамли технологиялар, газ-кимё саноати, қурилиш, соғлиқни сақлаш, геология, таълим, транспорт, зиёрат туризми каби соҳаларни икки давлат ҳамкорлигини янада ривожлантиришнинг устувор йўналишлари сифатида кўрсатган.

Мирзиёев Малайзиянинг етакчи компания ва банкларини Ўзбекистоннинг телекоммуникация, энергетика, банк-молия ва бошқа соҳалардаги давлат активларини хусусийлаштиришда фаол иштирок этишга таклиф этган.

Расмий Тошкент “ақлли” қишлоқ хўжалиги технологияларини жорий этиш, органик маҳсулотлар ишлаб чиқариш ва “ҳалол” стандартларини қўллаш бўйича қўшма лойиҳаларни амалга оширишдан ҳам манфаатдорлик билдирган.

Музокаралар якунида Ўзбекистон президенти Шавкат Мирзиёев ва Малайзия бош вазири Анвар Иброҳим номидан Стратегик шериклик йўлида икки томонлама ҳамкорликни чуқурлаштириш тўғрисида қўшма баёнот эълон қилинган. Тошкент ва Куала-Лумпур, шунингдек, божхона, олий таълим, соғлиқни сақлаш, маданият, суд-экспертлик, академик-дипломатик каби соҳаларда ҳамкорликка доир битимлар имзолаганлар.

Томонлар 2025-2026 йилларни Ўзбекистон–Малайзия шериклигини инновацион ривожлантириш даври деб эълон қилишга келишишган.

Ўзбекистонда 2025 йил учун минимал истеъмол харажатлари қиймати бир ойда киши бошига 669 минг сўм этиб белгиланди, дея маълум қилди Статистика агентлиги матбуот хизмати.

Агентлик шарҳига кўра, жаҳон тажрибасида минимал истеъмол харажатлари кўрсаткичидан камбағаллик чегараси сифатида фойдаланиш кенг тарқалган бўлиб, мазкур кўрсаткичдан давлатнинг моддий ва бошқа ижтимоий кўмакларига муҳтож аҳолининг мақсадли (таргет) гуруҳини аниқлаш, камбағалликка қарши курашиш дастурлари самарадорлигини ошириш ва пенсиялар, нафақаларнинг энг кам миқдорини белгилаш, камбағал оилаларга бериладиган бошқа турдаги моддий кўмакларда мезон сифатида фойдаланилади.

Gazeta.uz нашрининг аниқлик киритишича, 2024 йил давомида Ўзбекистонда камбағаллик чегараси икки марта ўзгарган. Дастлаб йил бошида бу миқдор 568 минг сўмдан 621 минг сўмгача оширилган бўлса, 1 майдан газ ва электр энергияси тарифлари ошиши муносабати билан 648 минг сўмга чиқарилган.

Бир муддат аввал Статистика агентлигининг камбағаллик чегарасини аниқлашда фойдаланиладиган минимал истеъмол харажатлари кўрсаткичи танқидга учраганди. Жумладан, иқтисодчи Отабек Бакиров “камбағалларини аниқлайдиган чегара янада камбағаллаштирилган”ига эътироз билдирганди.

Статистика агентлиги бунга жавобан мазкур кўрсаткич халқаро тажриба асосида Жаҳон банки экспертлари билан ҳамкорликда ишлаб чиқилганини маълум қилганди.

2020 йилда Президент администрацияси ҳузуридаги Иқтисодий тадқиқотлар ва ислоҳотлар маркази директори Обид Ҳакимовнинг “Ўзбекистонда кунига 5600 сўм ишлаб топган одам камбағал эмас” деган баёноти ҳам кескин эътирозга учраганди.

Муқаддам Ўзбекистон истеъмолчилар ҳуқуқларини ҳимоя қилиш жамиятлари федерацияси бир ўзбекистонликнинг бир ойлик тирикчилиги учун 2 157 070 сўм керак дея хулоса бергани маълум.

Жиззах вилоятидаги туғруқхонада чақалоқ ўғрилиги қайд этилди.

Kun.uz нашрининг ёзишича, Зафаробод тумани Ёрқин шаҳарчасида яшовчи аёл жорий йил 28 январь куни Республика ихтисослаштирилган она ва бола саломатлиги илмий-амалий маркази Жиззах филиалида икки ўғил фарзандни дунёга келтирган.

31 январь куни соат 19:30 ларда 25-30 ёшлардаги юзига тиббий ниқоб таққан аёл онанинг хонасига кирган ва “Болангизни шифокор кўригига олиб бораман, қорни дам экан” деган баҳона блиан чақалоқлардан бирини олиб чиқиб кетган ва қайтиб келмаган.

Вилоят ИИБ ўғирланган чақалоқни топишда жамоатчиликдан кўмак сўраган.

Маълум бўлишича, чақалоқ шу куннинг ўзида топилган. Уни ўғирлаб кетган шахс ҳам процессуал тартибда ушланган.

Жиззах шаҳри прокуратураси эгизакларнинг бири ўғирлангани ҳолати юзасидан Жиноят кодексининг 137-моддаси (одам ўғирлаш) 2-қисми билан жиноят иши қўзғатган ва дастлабки тергов ҳаракатларига киришган.

Озодлик аввалроқ Ўзбекистонда чақалоқ сотишга уриниш ҳолатлари кўпайгани ҳақида таҳлилий мақола чоп этганди.

Чақалоқ ўғирлаш эса кам учрайдиган жиноят экани айтилади.