Россиянинг Марселдаги бош консулхонаси ҳудудида 24 февраль куни портлаш содир бўлди. Бу маълумотни La Marseillaise нашрига Россиянинг Марселдаги бош консули Станислав Оранский тасдиқлаган.

Аввалроқ Франция нашрлари дипломатик ваколатхона яқинида портлаш содир бўлгани ҳақида ёзишган. Уларнинг маълумотига кўра, портлаш маҳаллий вақт билан эрталабки соат 8 ларда рўй берган. BFMTV телеканали полициядаги манбадан олинган маълумотга таянган ҳолда консулхона биносига ичига ёнувчи суюқлик тўлдирилган иккита шиша отилгани, бу шишалар боғ ичида сингани ҳақида хабар қилган.

Valeurs Actuelles нашри мухбири ҳодиса чоғида ҳеч кимга зиён етмагани, фақатгина моддий зарар етказилганини маълум қилган. Ундаги маълумотга кўра, консулхона яқинида ўғирланган автомобиль топилган.

Россия Ташқи ишлар вазирлиги Марселдаги портлаш “террор хуружининг барча белгиларига эга”лигини билдирган.

“Аккредитация қилган мамлакатдан ҳодиса тергови бўйича тўла-тўкис маълумот берилиши ва тезкор чоралар кўрилишини ҳамда Россия хориждаги ваколатхонасининг хавфсизлигини кучайтириш бўйича қадамлар қўйилишини талаб қиламиз”, дея билдирган Россия ТИВ расмий вакили Мария Захарова.

Россиянинг Марселдаги бош консулхонаси Амбруаз-Пар авенюсида жойлашган. Унинг яқинида Миср, Тунис, Арманистон ва бошқа мамлакатларнинг дипломатик ваколатхоналари бор.

Германияда бўлиб ўтган парламент сайловида, дастлабки натижаларга кўра, сайловчиларнинг 28,5 фоиз овозини йиғолган “Христиан-демократлар иттифоқи/Христиан-социалистлар иттифоқи” блоки ғалаба қозонди. Бу натижа 23 февраль куни эълон қилинган экзит-полл натижалари билан мувофиқ келмоқда.

Иккинчи ўринда “Германия учун альтернатива” ўнг-популистик партияси боряпти, бу партия учун сайловчиларнингг 20,8 фоизи овоз берган.

Учинчи ўринга 16,4 фоиз овоз олган Германия Социал-демократик партияси (ГСДП), тўртинчи ўринга эса 11,6 фоиз овоз олган “90-йиллар иттифоқи/Яшиллар” партияси чиққан.

Сўл партия эса 8,8 фоиз билан бешинчи ўринни эгаллаган.

Deutsche Welle қайдича, Бундестагга сайлов ГСДП учун мағлубиятли бўлган − партия ўз тарихидаги энг ёмон натижани кўрсатган.

Яна бир неча ҳафта ҳукумат раҳбари бўлиб қоладиган Олаф Шольц сайлов натижаларини “аччиқ” деб атаган. ГСДП ҳали сайлов участкалари ёпилмай туриб ХДИ/ХСИ лидери Фридрих Мерцни ғалаба билан табриклаган.

“Германия учун альтернатива” ўнг-популистик партияси кўрсатган натижани эса оммавий ахборот воситалари, аксинча, рекорд натижа ўлароқ баҳоламоқда. Миграцион чекловлар киритилиши, Россияга нисбатан санкцияларнинг бекор қилиниши ва Украинага ҳарбий ёрдам тўхтатилишини ёқлаётган партия вакилларининг кайфияти кўтаринки, деб ёзган DW.

Сайловда давомат 84 фоизни ташкил қилган, бу эса 1990 йилдан буён кузатилаётган энг юқори кўрсаткичдир.

Аввалроқ, агар консерваторлар ҳукуматни шакллантиришни уддалашса, 69 ёшли ХДИ лидери Фридрих Мерц Германия канцлери бўлиши мумкинлигини ҳақида хабар қилинган. ХДИ/ХСИ дастурида Германияда иқтисодий ўсишни кучайтириш ва солиқларни пасайтириш марказий ўринни эгаллаган. Мерц бир неча бор Киевга ҳарбий ёрдамни кўпайтириш, шу жумладан унга “Таурус” қанотли ракеталарини тақдим этишга чақириб келган. Бу ракеталарнинг Украинага берилишини Шольц ҳукумати тўхтатиб келган. Мерц Украина учун адолатли тинчликка эришишни, мамлакатнинг НАТОга аъзолиги масаласини кун тартибидан олиб ташламасликни ёқлаб келади.

Жорий йилнинг 14 февралидан буён касалхонада ётган Рим папаси Франциск астматик респиратор буҳронни бошдан кечирмоқда. Врачлар унинг аҳволини оғир деб баҳолашяпти. Папанинг ҳуши жойида, бироқ у оғриқ ҳис қиляпти, дея билдирган Ватикан матбуот хизмати.

Папанинг нафас олишига ёрдам бўлсин учун у кислородга уланган ҳамда унинг қони қайта қуйилган.

Кардинал Жанфранко Равази, агар Франциск саломатчилиги туфайли ўз вазифаларини бажара олмай қолса, тахтдан воз кечиши мумкинлигини истисно қилмаган.

88 ёшли Франциск февраль ойи ўртасида билан Римдаги Жемелли клиникасига ётқизилган эди. Компьютер томографияси унда икки томонлама пневмонияни аниқлаган. Сўнгги кунларда унинг соғлиғи тобора ёмонлашиб боряпти.

Асл исми Хорхе Марио Бергольо бўлган Рим папаси Франциск 2013 йилда Католик черкови раҳбари этиб сайланганди. 88 ёшли Франциск Католик черкови тарихидаги энг ёши катта папалардан бири бўлиб ҳисобланади. Болалигида бўлажак папа ўпкасининг бир қисмини олиб ташланган, шунинг учун у респираторли хасталикларини айниқса оғир кечиради.

Европа мамлакатларида 23 февраль куни Украинадаги урушнинг 3 йиллиги муносабати билан намойишлар бўлиб ўтди. Тадбирлар иштирокчилари Киевга Россия тажовузига қарши туришда дастак билдиришди.

Якшанба куни Брюсселда тинч намойиш бўлиб ўтди, дея хабар қилди Озодлик мухбири Олена Абрамович. Унга кўра, бир неча минг намойишчи Украина мадҳиясини ижро этишиб, “Россия товон тўлаши лозим”, “Украинага шон-шарафлар”, “Европа учун тинчлик, Украинага ғалаба” деб қичқиришган. Намойиш чоғида ҳаво тревогаси янгради – бу товушни Украинада яшовчи кишилар уч йилдан буён деярли ҳар куни эшитиб келишади.

Украинани қўллаб-қувватлаш юриши 23 февраль куни Прагада ҳам ўтказилган. Минглаб одам шаҳар марказидаги Староместска майдонига келишган. Йиғилганлар олдида Чехия президенти Петр Павел ҳам чиқиш қилиб, Украина ҳудудига бостириб кирган Россия тажовузкор мамлакатга айланиб, халқаро ҳуқуқ меъёрларини бузганини айтган.

Сўнгги бир неча кун ичида Киевга дастак тадбирлари дунё бўйлаб бир неча юз шаҳарда ўтказилган.

Россия қўшинларининг Украинага кенг кўламли босқини 2022 йил 24 февралидан буён давом этиб келмоқда.

Бугун Германияда навбатдан ташқари парламент сайлови ўтказилмоқда. Сайлов ўтган йил охирида бундестаг канцлер Олаф Шолцга ишончсизлик вотуми билдирганидан сўнг 23 февралга тайинланган эди. Ишончсизлик вотумига эса бюджетни молиялаш билан боғлиқ келишмовчилик туфайли иқтидордаги коалициянинг парчаланиши сабаб бўлди.

Шу тариқа, ҳукумат режаланганидан ярим йил олдин истеъфо беради: ҳукумат инқирози бўлмаганида навбатдаги сайлов 2025 йил сентябрда ўтказилган бўлур эди.

Парламентдаги ўринлар учун кураш еттита пешқадам ва 22 кичик партиялар ўртасида кечади. Энг кўп овоз тўплаган партия федерал канцлер лавозимига номзод кўрсатади (одатда партия раиси номзод бўлади), кейин уни президент Франк-Валтер Штайнмайер тасдиқлаши керак.

Шундан сўнг бундестагга ўтган партиялар бошқарув коалициясини тузади. Коалиция одатда 2-3 партиядан ташкил топади. Коалицияга кирмаганлар эса парламент мухолифати бўлиб қолади.

Сайловдан бир неча кун олдин ZDF телеканали ўтказган сўровга кўра, сайловда ХДИ/ХСИ консерватив блоки етакчи бўлиши мумкин – унга сайловчиларнинг 28 фоизи овоз беришга тайёр.

У ҳолда ХДИ раҳбари, 69 ёшли Фридрих Мерц канцлерликка номзод бўлади. ХДИ/ХСИ, хусусан, Германия иқтисодий ўсишини жадаллаштириш ва солиқларни камайтиришга ваъда бермоқда.

Сўровларга кўра иккинчи ўринни “Германия учун алтернатива” (ГуА) ўнг популистик партияси эгаллайди. ГуА 21 фоиз овоз тўплай олиши айтилмоқда. Партия ўз дастурида кўпроқ миграция қонунларини кучайтиришга ва хавфсизлик масалаларига урғу беради.

Шунингдек, ГуА Россия билан ҳамкорлик алоқаларини тиклашни талаб қилиб келмоқда. ГФР махсус хизматлари ГуА депутатларининг Кремлдан маблағ олганига доир шубҳалар важидан бир неча марта текширув ўтказган эди.

Учинчи ўринни, 16 фоиз қўллов билан Социал-демократик партия (СДП) эгаллаши кутиляпти. Канцлер Олаф Шолц худди шу партияга мансуб. СДП инфратузилма лойиҳалари ва ижтимоий дастурларга давлат бюджетидан кўпроқ маблағ ажратиш ташаббусини илгари сурмоқда.

ZDF сўровига қараганда, 14 фоиз сайловчилар “Яшиллар” учун овоз беришади. Ушбу сўл партия дастурида экология муаммолари ва аҳолини ижтимоий қўллаб-қувватлаш лойиҳаларига кенг ўрин берилган.

Сўровда қатнашганларнинг 8 фоизи “Сўллар”га овоз беришини билдирган. Улар мудофаа харажатларини оширишга қарши чиқишмоқда: “сўллар”га кўра солиқ тўловчиларнинг пулларини аввало ижтимоий дастурлар ва инфратузилмаларга йўналтириш лозим.

Бюджет ва давлат қарзи устидан қаттиқ назорат ўрнатишни ўзи учун устивор вазифа қилиб олган Эркин демократик партия 4,5 фоиз овоз тўплаши тахмин қилинмоқда.

Мудофаа бюджетини қисқартириш, Украинага ҳарбий ёрдамни тўхтатишга қарши чиқаётган ва Россия билан яқинлашиш тарафдори бўлган “Сара Вагенкнехт иттифоқи” номли янги сўл партия ҳам қарийб шунча овоз йиғиши мумкин.

Бу икки партия парламентга кириш учун зарур 5 фоизлик тўсиқдан ўтиши эҳтимоли катта.

Сўровда иштирок этганларнинг 4 фоизи кичик партияларга овоз беришини айтган.

Исроил полицияси Тель-Авив яқинида бир неча автобусда портлаш уюштирганликда гумонланаётган шахсларни қидирмоқда. The Times of Israel ва Reuters агентлиги хабарларига кўра, расмийлар портлашлар оқибатида ҳеч ким қурбон бўлмаганини билдиришган.

Исроил нашрлари портлаш мосламалари Бат-Ямадаги тураргоҳда бўлган учта бўш автобусда ишга тушгани ҳақида ёзишмоқда. Бошқа икки автобусдан топилган бомбалар зарарсизлантирилган. Нашрлар ёйинлаган суратларда ёниб кетган автобусни кўриш мумкин.

Исроил ҳарбийлари портлашлардан сўнг ишғол этилган Ғарбий соҳилнинг айрим ҳудудлари ёпиб қўйилгани, “кучайтирилган аксилтеррор” фаолияти давом этиши ҳақида билдиришган. Баёнотда ҳарбийлар содир бўлган воқеа терговида Шин Бет ички разведка хизмати ва полиция билан ҳамкорлик қилаётгани қайд этилган.

Исроил бош вазири офиси ҳодиса ҳақида Бинямин Нетаняхуга ҳарбий котиби томонидан маълумот тақдим этилгани ва яқин орада у хавфсизлик соҳасидаги вазиятга баҳо беришини маълум қилди.

Исроил нашрлари мамлакат транспорт вазири Жамоат транспорти бошқармасига автобуслар, поездлар ва бошқа жамоат транспорти воситалари тўхтатилиб, текширувдан ўтказилиши ҳақида буйруқ чиқаргани ҳақида хабар қилишди.

АҚШ президенти Дональд Трампнинг Украина ва Россия бўйича махсус вакили Кит Келлог 20 февраль куни Киевда Украина президенти Владимир Зеленский билан учрашди. Учрашув натижаларига кўра ўтказилиши режаланган қўшма матбуот анжумани Америка томони илтимосига биноан бекор қилинган. Бу ҳақда Reuters агентлиги ва бошқа нашрлар хабар қилишди.

“Америка овози” рус хизмати қайдича, Киевга келган 19 февраль куни Келлог ўз ташрифидан асосий мақсад Украина томонини тинглаш эканини эълон қилган.

Трампнинг миллий хавфсизлик бўйича маслаҳатчиси Майк Уолтц Украинани АҚШга нисбатан танқидини юмшатишга ҳамда Оқ уй ташаббуси билан илгари сурилган фойдали қазилмалар етказиб бериш бўйича шартномага рози бўлишга чақирган.

АҚШ вице-президенти Жей Ди Вэнс пайшанба куни, унинг фикрича, можаро якунига оз қолганини айтди. Айни пайтда у Россия билан музокара қилмай туриб, урушни тўхтатиш мумкин эмаслигини урғулади.

Президент Зеленский Келлог билан суҳбат чоғида фронтдаги вазият, украиналик асирларнинг барчасини қайтариш ва Украина учун самарали халқаро хавфсизлик кафолатларини излаб топиш масалалари муҳокама қилинганини қайд этди.

“Европейская правда” нашри Зеленский Трампнинг махсус вакилига Киев “Қўшма Штатлар президенти билан инвестициялар ва хавфсизлик бўйича кучли, ҳақиқатан манфаатли шартнома тузиш”га тайёр эканини тасдиқлагани ҳақида ёзган. Шу муносабат билан Трамп томонидан аввалроқ таклиф қилинган Украина фойдали қазилмаларидан фойдаланишга оид шартнома тўғрисида сўз борган.

ОАВ маълумотларига кўра, Трамп маъмурияти Украинага нодир фойдали қазилмаларнинг 50 фоизини АҚШга мулк ўлароқ беришни таклиф қилган, бироқ Зеленский мазкур ҳужжат билан танишиб чиққанидан кейин уни имзолашдан бош тортган.

АҚШнинг AXIOS сайти 20 февраль куни Зеленский Трампнинг илк таклифини рад этганидан кейин Оқ уй Украинага фойдали қазилмалар тўғрисидаги “тузатилган” шартнома лойиҳасини тақдим этгани ҳақида хабар қилган. Axios бу ҳақда битимдан хабардор украиналик мулозим, америкалик мулозим ва уч нафар манбага таянган ҳолда ёзган.

“Лойиҳанинг сўнгги вариантига анча тузатишлар киритилгани сезилади ва у Украина қонунчилигига мувофиқ келади”, деган манбалардан бири.

Трампнинг миллий хавфсизлик бўйича маслаҳатчиси Майк Уолц пайшанба куни журналистларга Зеленский фойдали қазилмалар масаласи бўйича “музокаралар столига қайтиши” лозимлигини айтган.

Петербург расмийлари мигрантларни кузатиш учун шаҳардаги кузатув камераларини этник мансубликни танишга мослаб созланади. Бу ҳақда Петербург маъмурияти миллатлараро муносабатлар қўмитаси раҳбари Олег Капитанов билдирди, дея хабар қилди “Коммерсант” нашри.

Капитановга кўра, янги функционал “миллий анклавлар шаклланиши”га қарши курашда ёрдам беради ва “минтақада ижтимоий тарангликка йўл қўймаслик бўйича превентив чоралар” кўришга имкон яратади.

Мулозим ўз қўмитаси “шахсларнинг миллий мансубиятини аниқлаш учун лицензия сотиб олишга” шартнома тузган, мазкур дастур асосида шаҳардаги саккиз мингта камерани созлаш кўзда тутилган.

“Коммерсант” маълумотига кўра, шартнома суммаси 38 миллион рублдан ошади.

Россия президенти ҳузуридаги Инсон ҳуқуқлари бўйича кенгашда (ИҲК) Петербург расмийларининг қарори танқид қилиниб, “инсон қадр-қийматини ерга урувчи” дея баҳоланган.

“Россияда ҳатто паспортда ҳам миллат кўрсатилмайди. Энди эса томдан тараша тушгандай, телекамералар кишининг қайси миллатга мансублигини аниқлармиш”, деган ИҲК раҳбари Валерий Фадеев.

Москвадаги “Крокус Сити Холл”да содир этилган террор хуружи ортидан Россияда мигрантларга нисбатан ксенофобик кайфиятлар кучайиб кетган. РФ расмийлари ҳужумда Тожикистон фуқароларини айблашган.

Шундан сўнг Россиянинг турли минтақаларида ҳуқуқ-тартиботчилар хорижликлар яшайдиган ва ишлайдиган жойларда рейдлар ўтказа бошлаган. Айрим ҳолатларда мигрантлар ҳарбий комиссариатларда қайдга олинган.

Расмийлар мигрантларга нисбатан қонунчиликни ҳам кучайтиришмоқда. Бир пайтнинг ўзида Россияда миллатчилар “рейдлари” ҳам бошланиб кетган – бу “рейдлар” давомида улар мигрантларни ишдан бўшатиш ва қизларнинг рўмолларини ечиштиришни талаб қилишган.

Буюк Британия бош вазири Кир Стармер кейинги ҳафтада АҚШ президенти Дональд Трампга Россия билан тинчлик битими тузилганидан сўнг мазкур битимга риоя қилиниши кафолатларидан бири ўлароқ Украинада Европа мамлакатларидан бўлган 30 минг чоғли ҳарбийни жойлаштириш бўйича режани тақдим этади. Бу ҳақда The Telegraph газетаси ўз манбаларидан олинган маълумотга таянган ҳолда хабар қилди.

Стармер кейинги ҳафтада Трамп билан учрашиш учун Вашингтонга сафар қилиши кутилмоқда. Аввалроқ у Британия тинчликпарварлик миссияси доирасида ўз ҳарбийларини Украинага йўллашга тайёрлигини билдирган эди. Европа мамлакатларидан ҳеч бири бу миссияда иштирок этиши ҳақида ҳали бу қадар аниқ-равшан баёнот бергани йўқ.

The Telegraph мақоласида айтилишича, Стармер таклиф қилиши кутилаётган режадаги асосий унсур АҚШ томонидан дастакдир. Қўшма Штатлар Россия оташкесим шартларини бузмаслиги бўйича кафолатни ўз зиммасига олиши керак бўлади. Режада Россия сулҳ шартларини бузган тақдирда, АҚШнинг Марказий ва Шарқий Европа мамлакатларида жойлаштирилган қирувчи учоқлари ва ракеталари жавоб зарбасини беришга тайёр бўлиши лозимлиги кўзда тутилган.

Нашрнинг ёзишича, Стармер режасини Франция ҳам дастакмоқда, мазкур режа 17 февраль куни НАТО бош котиби иштирокида Парижда ўтказилган ЕИ йирик мамлакатлари ва Британия лидерларининг учрашувида муҳокама қилинган. Трампнинг ўзи ва унинг маъмурияти вакиллари Украина хавфсизлиги кафолати учун айнан Европа масъулиятни ўз зиммасига олиши лозимлиги ҳақида бир неча борбаёнот беришган. Трамп Стармернинг бу борадаги муҳтамал таклифига қандай муносабатда бўлиши ҳозирча маълум эмас. Режада АҚШ қуруқликдаги қўшинларини Украинага жойлаштириш кўзда тутилмаган.

Режада Украинага фронт чизиғида жойлаштирилмайдиган кичикроқ ҳарбий контингентни йўллаш назарда тутилган. The Telegraph нашрининг ёзишича, европалик ҳарбийлар Украинанинг йирик шаҳарларида, портларида ва АЭС каби бошқа ўта муҳим инфратузилма объектларида бўлишади. Нашр манбаларидан бирига кўра, “содир бўлаётган манзара” тўкислигини таъминлаш учун миссияда кузатув ва разведка учоқлари, дронлар ва сунъий йўлдошлар иштирок этади. Кема қатновида эркинликни таъминлаш учун Қора денгизга қўриқчи кемалари йўлланади.

Британия ҳукумати мақолада баҳс этилаётган режанинг ҳақиқийлигини ҳали расман тасдиқлагани йўқ.

Украина, Россия билан оташкесим келишувига эришилган тақдирда, ғарблик ҳамкорлар томонидан хавфсизлик кафолати берилишини талаб қилмоқда. Украина президенти Владимир Зеленскийга кўра, Украина НАТОга қабул қилинмаган тақдирда, мамлакатда Шимолий Атлантика иттифоқи мамлакатларидан бўлган тинчликпарвар кучлар жойлаштирилиши лозим. Москва вакиллари аввалроқ бунинг имконсизлигини билдиришган.

Жанубий Корея украиналикларга асир тушган шимолий кореялик аскарлар истаган тақдирда, уларнинг ҳар қайсисини қабул қилишга тайёрлигини билдирди. Бу ҳақда Bloomberg агентлиги Жанубий Корея Ташқи ишлар вазирлиги баёнотига таянган ҳолда хабар қилди.

“Шимолий кореялик аскарлар Конституцияга мувофиқ равишда бизнинг фуқароларимиз бўлиб ҳисобланишади ва алоҳида олинган шахслар ирода эркинлигининг ҳурмат қилиниши халқаро ҳуқуқ ва одатларга ҳам мувофиқдир”, дейилган ТИВ баёнотида.

Бу таклиф асирга олинган КХДР аскари “Чосон ильбо” газетасига берган интервьюсида Жанубий Кореядан бошпана олишни исташи ҳақида билдиргани ортидан янграган. Мақолада исми келтирилмаган украиналик мулозимдан бундай имконият Жанубий Корея ҳукумати қарашларига боғлиқ эканига оид иқтибос келтирилган.

Жанубий Корея ўз ниятини украиналик расмийларга етказилгани ва улар бу борада зарур маслаҳатлашувларни давом эттираётганларини билдирган. Мамлакат ТИВ шимолий кореялик аскарлар “уларнинг ихтиёрларига қарши тақиб хавфи бўлган жойга йўлланмаслиги керак”лигини қўшимча қилган.

2025 йил январь ойида Киев Россиянинг Курск вилоятида шимолий кореялик икки нафар ҳарбий асирга олингани ҳақида маълум қилган. Сўроқ пайтида улардан бири Россияга урушда қатнашиш учун эмас, балки машқларга келганини айтган. Кейинроқ Украина президенти Владимир Зеленский, агар КХДР лидери Ким Чен Ин Россияда асоратда тутиб турилган украиналик ҳарбийларга алмашишни ташкил қилса, Киев асирдаги шимолий кореяликларни унга топширишга тайёрлигини билдирган эди.

Ғарб разведкалари иддаосига кўра, урушда иштирок этиш учун Россияга КХДРдан 10 минг чоғли ҳарбий келган бўлиши мумкин.

Москва ва Пхеньян Украинага қарши жангларда КХДРдан бўлган ҳарбийлар иштирок этаётганини тасдиқламаган, бироқ буни тўғридан-тўғри инкор ҳам қилган эмас.

АҚШ президенти Дональд Трамп Украина президенти Владимир Зеленскийни “сайловсиз диктатор” деб атаб, у “тезроқ ҳаракат қилиши керак, акс ҳолда, мамлакатсиз қолади”, дея билдирди.

“Бу орада биз Россия билан урушни тўхтатиш ҳақида муваффақият билан музокара олиб бормоқдамиз, бу эса, кўпчилик эътирофига кўра, фақат Трамп ва Трамп маъмурияти қила олиши мумкин бўлган ишдир”, деб ёзган АҚШнинг амалдаги президенти Truth Social ижтимоий тармоғидаги ўз саҳифасида.

Трамп иддаосича, АҚШ урушга 350 миллиард доллар сарфлаган, Зеленский эса, афтидан, “охурни сақлаб қолишни истаяпти”.

“Бир ўйлаб кўринг-а, камтарона муваффақият соҳиби бўлган комик Владимир Зеленский Америка Қўшма Штатларини ғолиб келиб бўлмайдиган, аввало бошлаш керак бўлмаган, у АҚШсиз ва “Трамп”сиз ҳеч қачон изга сололмайдиган урушга 350 миллиард доллар сарфлашга кўндирди”, дея қайд этган у.

Трампга кўра, Зеленский АҚШ Украинага йўллаган пулларнинг ярми “йўқолиб қолгани”ни тан олмоқда. АҚШ президентининг билдиришича, Украина президенти “сайловдан бош тортмоқда”, “украиналик ўртасида ўтказилган сўровларда жуда паст ўринларни эгаллаб келяпти”, “у яхши уддаётган ягона иш эса Байден билан “скрипка чалгандай” ўйнаш” бўлиб қолмоқда.

Зеленский Трампнинг Украинада сайлов ўтказиш зарурати ва украиналиклар ўртасида Зеленскийни қўллаш даражаси “тўрт фоизгача” тушиб кетгани тўғрисидаги баёнотларига аввалроқ қуйидагича жавоб берган:

“Киев халқаро социология институти (КХСИ) маълумотига кўра, бугунги кунда менга аҳолининг 57 фоизи ишонади. Агар кимдир мени ҳозирнинг ўзида алмаштирмоқчи бўлса, буни уддалай олмайди”.

КХСИ ўтказган ижтимоий сўров натижаларига кўра, украиналикларнинг 57 фоизи Зеленскийга ишонади, 37 фоизи эса ишонмайди.

Ўз рейтингининг 4 фоиз эканига оид сўзларга изоҳ бераркан, Зеленский Трамп “дезинформация” ичида яшаётгани ва уни Россия тарқатаётганини қайд этган.

Украина президентига кўра, куни кеча Россия ташқи ишлар вазири ва АҚШ Давлат котиби Саудия Арабистонида учрашган пайтда бу масалалар нимагадир кўтарилган эмас.

“Улар Саудия Арабистонда ўзларининг икки томонлама масалаларини муҳокама қилишаётгани уларнинг ҳуқуқи. Ваҳоланки, мен АҚШ Путинга кўп йиллик изоляциядан чиқишга ёрдам беряпти, деб ҳисоблайман”, дея қайд этган Зеленский.

Владимир Путин Россия “Украина билан музокара жараёнидан ҳеч қачон бош тортмагани”ни айтиб, “иккала томон учун мақбул қарорга чиқилиши”ни исташини билдирган.

“Биз эса ҳеч кимни ҳеч нарсага мажбурламаяпмиз. Биз тайёрмиз. Бу ҳақда мен юз марта айтдим. Истасалар, марҳамат, музокарага келишсин. Биз музокара столига қайтишга тайёрмиз”, деган у. Кейинроқ Кремль матбуот котиби Песков Россия ва АҚШ Путин ва Трамп учрашувига тайёргарликни “зудлик билан бошлашга келишиб олгани”ни билдирган.

Ватикан 88 ёшли Рим папаси Францискнинг соғлиғи ёмонлашгани ҳақида маълумот тарқатди - унга икки томонлама ўпка шамоллаши ташхиси қўйилган.

Reuters агентлиги хабарига кўра, 18 февраль куни папа Франциск компьютер томографиясидан ўтган ва унда пневмония бошланаётгани аниқланган. Янги ташхис қўшимча медикаментоз муолажани талаб қилган, дея қайд этишган Рим папаси матбуот хизмати вакиллари.

Ўтган ҳафтада (14 февраль куни) Рим-католик черкови раҳбари Римдаги Жемелли клиникасига ётқизилган эди. Пировардида унинг нафас йўллари полимикроб инфекциясига чалингани маълум бўлиб, у касалхонада яна “номаълум муддатгача” қолиши айтилганди.

18 февраль куни папанинг атрофидагилар, хасталигига қарамай, Францискнинг “кайфияти яхши бўлиб қолаётгани”ни билдиришган.

Асл исми Хорхе Марио Бергольо бўлган Рим папаси Франциск 2013 йилда Католик черкови раҳбари этиб сайланганди. 88 ёшли Франциск Католик черкови тарихидаги энг ёши катта папалардан бири бўлиб ҳисобланади. Болалигида бўлажак папа ўпкасининг бир қисмини олиб ташланган, шунинг учун у респираторли хасталикларини айниқса оғир кечиради.

Европа Иттифоқи мамлакатлари Украина учун камида 6 миллиард евролик ҳарбий ёрдам пакетини ҳозирлашмоқда. Politico нашрининг ёзишича, янги ёрдам пакети АҚШ воситачилигида Россия билан музокаралар бошланиши олдидан Киевнинг стратегик позициясини мустаҳкамлаши лозим.

Пакет кенг кўламдаги ҳарбий маҳсулотлар номенклатурасини – бир ярим миллионта артиллерия снарядидан ҳаводан мудофаа тизимларигача – ўз ичига олиши керак. Бу Россиянинг Украинага қарши 2022 йил февралида бошланган кенг кўламли босқини бошидан буён Европа Иттифоқининг Украинага энг йирик ёрдам пакетларидан бири бўлади. Мақолада урғуланишича, пакет Европа комиссиясининг юқори лавозимли вакиллари Киевга борадиган 24 февралгача тақдим этилиши мумкин.

Politico нашининг дипломатик доиралардаги икки манбадан олинган маълумотга таянган ҳолда қайд этишича, 6 миллиард евро бошланғич маблағ бўлиб, у мамлакатлар ўз захираларини ҳар томонлама ревизия қилганидан кейин “10 миллиард евро ва ундан кўпроқ”қача ҳам кўтарилиши мумкин.

Ҳарбий ёрдамнинг йирик пакети 17 февраль куни Парижда бўлиб ўтган лидерларнинг ошиғич учрашуви чоғида конкрет қарорлар қабул қилишга муваффақ бўлинмаганидан кейин ЕИнинг Украинани дастаклаш қарорида қатъий эканини яққол кўрсатувчи ҳаракатлардан бири бўлган бўларди. ЕИ АҚШ ва Россия ўртасида урушни тўхтатиш бўйича музокаралардан четда қолган, бу эса ЕИ мамлакатлари пойтахтларида ҳам, Киевда ҳам саросимага сабаб бўлган, дея қайд этилган Politico нашри мақоласида.

Ҳарбий дастакнинг оширилиши Украинага ўз қуролли кучлари сафини тўлдириш, Киев тинчлик музокараларига тайёрланар экан, фронт чизиғида Россия ҳужумларини қайтариш ва ўз шаҳарларини ҳаво ҳужумларидан ҳимоя қилишга ёрдам беради. Шунингдек, бу ЕИнинг ўз делегацияси бундан буёнги музокараларга қўшилиши зарурлигига оид далилларини кучайтириши мумкин.

АҚШ Давлат котиби Марко Рубио ва Россия ташқи ишлар вазири Сергей Лавров 18 февраль куни Ар-Риёзда икки томонлама музокаралар ўтказишган.

Украинага ёрдам битими ЕИ мамлакатларининг барчаси томонидан маъқулланадими ёки уни фақат битимни қабул қилишни истайдиган мамлакатлар коалициясигина дастаклайдими − ҳозирча маълум эмас. Дипломатлардан бирига кўра, Венгриянинг қаршилигини ҳисобга олган ҳолда мазкур битим ЕИ мамлакатларнинг барчаси томонидан бир овоздан маъқулланиши эҳтимоли кам.

АҚШ президенти Дональд Трамп ва Ҳукумат самарадорлиги департаменти раҳбари, тадбиркор Илон Маск 18 февраль куни Fox News телеканалига биргаликда интервью беришган.

Прайм тайм вақтида эфирга узатилган қарийб бир соатли интервьюнинг катта қисми Ҳукумат самарадорлиги департаменти (DOGE) фаолиятига бағишланган бўлиб, мазкур департаментнинг мақсади, Илон Маскка кўра, “бюрократияни заифлатиш ва демократияни тиклаш”дан иборат.

Fox News телеканали бошловчиси Шон Ханнити интервьюни АҚШ ва жаҳонда энг муваффақиятли тадбиркор сифатида танилган Илон Маскни президент Трампнинг яқин маслаҳатчиси, давлат аппаратини қисқартириш ва оптималлаштириш бўйича тавсиялар ҳозирловчи департамент раҳбари ўлароқ таништиришдан бошлаган.

Илон Маск ўз ролини “президентга технологик дастак кўрсатувчи” ёрдамчи ўлароқ белгилаган. Маск етакчилигидаги департамент, унинг сўзларига кўра, “президент фармонлари бажарилишини таъминлаш”га уринмоқда.

Президент Трампнинг ўзи Илон Маск тимсолида ёрдамчи ўлароқ “ўта ақлли инсон”га эга бўлгани, унинг гуруҳи давлат аппаратининг ўзини оқламаган харажатларини қисқартиришни белгилаш каби ўзи томонидан қўйилган вазифани амалга оширишга қодирлигини айтган. Дональд Трампнинг ишонишича, DOGE юзлаб миллиард долларлик молиявий суиистеъмолларни излаб топади. Ҳукумат самарадорлиги департаменти фаолияти натижасида эришилиши мумкин бўлган иқтисоднинг умумий суммасини президент Трамп триллион долларга баҳолаган.

Интервью чоғида Дональд Трамп ва Илон Макс етакчи федерал бошқармаларнинг иш ҳужжатларини ўрганиш бўйича DOGE ташкилотига катта ҳуқуқлар берган президент Трампни ўз ваколатлари ташқарисига чиқаётганликда орқаваротдан айблаётган танқидчиларга жавоб беришган.

“Биз Дональд Трампни президент этиб сайлаган одамларнинг бюрократияни қисқартириш истагини бажаришга уриняпмиз”, деган Илон Маск интервью чоғида.

Украина президенти Владимир Зеленский аввалроқ 19 февралга режаланган Саудия Арабистонига ташрифини кечиктиришга қарор қилган. Зеленскийга кўра, эндиликда унинг бу мамлакатга сафари 10 мартга қолдирилган. Ташриф Зеленскийнинг жорий ҳафтада шарқ мамлакатларига сафари доирасида амалга оширилиши керак эди. Бу сафар доирасида у аввал Бирлашган Араб Амирлиги, кейин эса Туркияда бўлган.

Зеленский сафар жадвалига ўзгартиш киритилгани ҳақида АҚШ ва Россия делегациялари ўртасида Украина масаласи бўйича Саудия Арабистони пойтахтида бўлиб ўтган музокаралар кунида эълон қилган. Украинада уруш бошланганидан буён илк маротаба учрашаётган АҚШ ва Россия томонлари Ар-Риёзда, жумладан Украинадаги уруш билан боғлиқ масалаларни муҳокама қилишган. Делегацияларга Ташқи ишлар вазирликлари раҳбарлари етакчилик қилишган. Украина ва бошқа мамлакатлар вакиллари мазкур учрашувга таклиф қилинган эмас.

Зеленскийнинг 18 февраль куни билдиришича, Россия ва АҚШ делегацияларининг Саудия Арабистондаги учрашувига Украинанинг чақирилмагани Киев учун “сюрприз” бўлган. Украина лидерига кўра, “ҳеч қанақа мос келиш” бўлмаслиги учун у чоршанбага режаланган Ар-Риёзга сафарини бошқа кунга кўчирган ва эндиликда АҚШ делегациясини Киевда кутмоқда.

Reuters агентлиги 18 февраль оқшомида АҚШнинг Украина ва Россия бўйича махсус вакили Кит Келлогнинг Киевга йўл олишини хабар қилган. Бунда агентлик Келлогнинг кун тартиби билан таниш бўлган манбадан олинган маълумотга таянган.

Зеленский уруш якунига оид музокараларни Украинасиз юритиш мумкин эмаслигини такрорлаган. Украина президентига кўра, адолатли тинчлик таъминланиши учун АҚШ иштирокидаги Киевга хавфсизлик кафолати беришга оид музокараларда Украина билан Европа ҳам иштирок этишлари лозим.