Ўзбекистон хабарлари
Каримов ишдан ҳайдаган Абдулла Арипов Бош вазир лавозимига тавсия қилинди
Ўзбекистон парламентда кўпчилик ўринга эга бўлган Ўзбекистон Либерал-демократик партияси Бош вазир лавозимга Абдулла Арипов номзодини тавсия қилди.
12 декабрь кунги партия йиғилишида иштирок этган Озодлик манбасининг айтишича¸ Абдулла Арипов катта тажрибага эга мутахассис сифатида Бош вазир лавозимига бир овоздан тавсия қилинганлигини билдирди.
Куннинг иккинчи ярмига бориб O‘zLiDeP матбуот хизмати Абдулла Орипов тавсия қилинган мажлис ҳақида маълумот берди.
Бош вазир лавозимига кимни тайинлаш масаласи Ўзбекистон Республикаси Олий Мажлиси Сенатининг 13 декабрь кунги ялпи мажлисида кўриб чиқилиши кутилмоқда.
Ўзбекистон Республикаси Бош вазири лавозимига тавсия қилинган Абдулла Ниғматович Арипов шу йилнинг 13 сентябрида муваққат президент Шавкат Мирзиëев имзолаган фармон билан Бош вазирнинг ўринбосари лавозимига тасдиқланган эди.
Арипов 2012 йили айнан шу лавозимдан, телекоммуникация соҳасидаги коррупция жанжали ортидан ишдан олинган эди.
Лондондаги Шарқшунослик ва Африка тадқиқотлари марказининг Ўзбекистон бўйича таҳлилчиси Алишер Илҳомов фикрича, “порахўрлик жанжали фигурантининг ҳукуматга қайтарилиши ва Бош вазир лавозимига тавсия қилиниши ëмон сигналдир”.
Абдулла Арипов 2002 йил май ойидан то 2009 йил октябригача Ўзбекистон алоқа ва ахборотлаштириш агентлигининг раҳбари бўлиб,. 2009 йилдан 2012 йилгача эса Ўзбекистон Бош вазири ўринбосари лавозимида ишлаган.
Ўзбекистон марҳум президентининг тўнғич қизи Гулнора Каримованинг чет эл ширкатларидан Ўзбекистон телекоммуникацион бозорига кириш учун пора олгани билан боғлиқ жанжал ҳам ўша пайтда коммуникация соҳасини назорат қилган мулозим Арипов исми билан боғланади.
Швеция прокуратураси апелляция судига тақдим қилган TeliaSonera масъул ходимларининг ўзаро ёзишмаларида ширкат масъуллари Ўзбекистонда бизнес бошлашдан аввал Гулнора Каримова билан контакт ўрнатишга уринганига ишора қилади.
Бу ёзишмалардан маълум бўлишича, TeliaSonera ижрочиси Эско Ритконен Ўзбекистон расмийлари билан музокара қилиш учун Тошкентга келиши керак бўлган. Бунда Марказий Осиёда бизнес юритиш тажрибасига эга бўлган Элден Ўзбекистон алоқа ва ахборотлаштириш агентлигининг ўша пайтдаги раҳбари Абдулла Арипов билан учрашишдан аввал Гулнора Каримова билан келишиб олиш лозимлигини маслаҳат қилади. "Чунки, деб ёзади у, ўта агрессив тип бўлган Арипов рус иневесторлари тарафдоридир".
TeliaSonera собиқ раҳбарига қўйилаётган айбловлар мазкур ширкатнинг Ўзбекистонда бизнес қилиш имконияти эвазига бу мамлакат президентининг қизи Гулнора Каримовага юзлаб миллион доллар пора берганига доир тергов билан боғлиқдир.
Бу ишни тергов қилаётган Швеция прокуратураси Коррупцияга қарши кураш бошқармаси бошлиғи Гуннар Стетлернинг Озодликка айтишича¸
"TeliaSonera бўйича тергов билан боғлиқ жараëн Абдулла Арипов раҳбар бўлган даврни қамрайди. Ариповнинг имзосини айни ишга оид кўп ҳужжатларда кўриш мумкин".
Бу ишга оид Халқаро матбот назарига тушган тафсилотлар ортидан 2012 йилда Арипов ишдан олиниб, устидан жиноят иши очилгани ҳақида Ўзбекистондаги Узметроном интернет нашри хабар берган эди.
2012 йилда ўзининг “ишончли манбаларига” таянган ҳолда хабар қилган Узметроном нашрига кўра, Абдулла Ариповга, жумладан, “Ўздунробита” ширкатига қўшимча ретрансляторлар ўрнатиш учун ноқонуний рухсатномалар берганлик айби қўйилган.
2013 йилга келиб Абдулла Арипов устидан жиноий иш тўхтатилди ва собиқ мулозим Тошкент алоқа коллежида оддий ўқитувчи сифатида яна Бош вазир ўринбосари қилиб тайинланган 2016 йилнинг 13 сентябргача ишлаб юрди.
Таҳлилчи Алишер Илҳомов Озодлик билан суҳбатда ҳукуматга қайтарилган собиқ мулозим ўз вақтида бир имзо билан мамлакат ҳазинасини йиллик бюджетнинг 7 фоизи миқдоридаги пулдан махрум қилганлигини иддао қилди:
- Ўз вақтида "Такилант" ва "Свисдорн" каби номи бору ўзи йўқ оффшор ширкатларга мобил алоқа лицензияси берилишини таъминлаган ва пировардида бу лицензияларни реал мобил операторларига сотиб Ўзбекистон қонунчилигини қўпол бузган мулозим ҳукуматга қайтарилди. Ариповнинг бу қилмиши оқибатида давлат хазинаси бир миллиард АҚШ долларига яқин маблағдан маҳрум бўлди. Бу сумма Ўзбекистон йиллик бюджетининг 7 фоизини ташкил этади. Ëки соғлиқни сақлашга бюджетдан ажратилган пулнинг 50 фоизи демакдир. Бу мулозимни ишига қайта тиклаган Мирзиëев ўз навбатида бу қилмишлар учун маъсулиятни бўлишади. Албатта, Мирзиëевнинг 2012 йили Арипов ишдан олинган вақтда ҳам Бош вазир бўлгани боис¸ у шундоғам бу иш учун қисман жавобгардир. Мирзиëев Абдулла Ариповни ишга тиклагани АҚШ судида кўрилаëтган масалага ҳалақит беради. Ўзбекистон ҳукумати коммуникация ширкатлари тарафидан пора сифатида олиниб ҳозир музлатилган бир миллиард долларни АҚШ суди орқали қайтариб олмоқчи. Пора олди-бердисида исми кечган мулозимнинг яна Бош вазир ўринбосари бўлиши пулни бюджаетга қайтариш шансларини камайтиради¸ дейди Лондондаги Шарқшунослик ва Африка тадқиқотлари марказининг Ўзбекистон бўйича таҳлилчиси Алишер Илҳомов.
Шу билан бирга Илҳомов Абдулла Ариповнинг телекоммуниация соҳасида тажрибали мутахассис эканлигини ҳам эътироф қилди.
Арипов билан боғлиқ жанжалларни ëритган ўзбекистонлик журналист Сергей Ежков ҳам унинг касбий маҳорати ҳақида гапириб¸ Мирзиëев уни шу боис бугунгача асраб келганини таъкидлаган эди.
- У Ўзбекистондаги телекоммуникация модернизациясини бошлаб берган эди. Мирзиëев уни мутахассис сифатида қадрлаб келажак учун асраб қўйган эди¸ деган эди суҳбатдош.
Кун янгиликлари
Қозоғистонликлар Enter Engineering’дан ойлигини ололмаяпти
Ўзбекистоннинг Enter Engineering Pte.Ltd ва UZLITI Engineering МЧЖда ишлаётган қозоғистонлик ходимлар ўтган йилнинг май ойидан буён ойлик маошларини ололмаяпти. Бу ҳақда улар томонидан Қозоғистоннинг Ўзбекистондаги элчиси Бейбут Атамқулов номига ёзилган жамоавий мурожаатида айтилган.
Нусхаси Озодликда бўлган мурожаатномада қозоғистонликлар ўзларига 2024 йилнинг май ойидан буён маош тўланмаётгани, шу туфайли улар ва оилалари қийин аҳволда қолганларидан шикоят қилишган. Ўзбекистон ширкатлари билан шартнома асосида ишлаётганларини билдирган қўшни давлат фуқаролари пулсизлик туфайли ўзларининг асосий эҳтиёжларини таъминлаш, кредитлар ва тураржой учун ижара пулларини тўлаш ва бошқа мажбуриятларини бажаришга имкон топа олмай қолганларини маълум қилишган.
“Бизнинг ширкат раҳбариятига қилган қатор мурожаатларимиз натижа бергани йўқ. Раҳбарият маош кечикаётгани ва ойлик тўланадиган муддат юзасидан натижа берадиган ҳеч қанақа изоҳ бермаяпти. Сўнгги 7 ой ичида фақат сентябрь ойида апрель ойи учун ва ноябрь ойида қисман май ойи учун ойлик маош тўланган”, деб ёзган қозоғистонликлар элчидан Enter Engineering Pte.Ltd ва UZLITI Engineering МЧЖ билан юзага келган вазиятни ҳал қилиш, ўзларининг қонунчиликда кўзда тутилган меҳнат ҳуқуқларини ҳимоя қилиш, меҳнат қонунчилигини бузгани учун ширкат раҳбариятини жавобгарликка тортиш бўйича чора кўрилиши бўйича кўмак сўрашган.
Маълум бўлишича, қозоғистонликларнинг элчига мурожаатидан кейин ҳам муаммони ҳал этилиши бўйича ижобий ўзгариш кузатилган эмас.
Озодлик ўтган йилнинг март ойидан буён Enter Engineering ишларига ойлик берилмаётгани ҳақида бир неча материал ёйинлаган. Бу мавзуда ноябрь ойида ёйинланган сўнгги видеолавҳада ойликсиз қолган минглаб ишчи иш ташлаш билан таҳдид қилгани ҳақида ҳикоя қилинган эди:
Ўзбекистон ҳозирча фазогир учирмоқчи эмас
Ҳозирда Ўзбекистонда космонавт тайёрлаш бўйича ишлар олиб борилмаяпти ва коинотга фазогир учириш ғояси актуал эмас. Бу масалага “Ўзбеккосмос” агентлиги бўлим бошлиғи Муҳиддин Ибрагимов 16 январь куни Тошкентда бўлиб ўтган матбуот анжуманида тўхталган.
“Космонавт учириш жуда ҳам осон нарса. Ҳозирги пайтда айтайлик, шу халқаро космик станцияга, NASAдаги америкалик ҳамкасбларимизга 50-60 миллион доллар пулини тўлаб берсак, ҳозир ҳам учирсак бўлади. Нима учун бу нарсани ҳозир тўхтатиб турибмиз? Чунки учган космонавт бориб, қўпол қилиб айтганда, селфи тушиб келиши керак эмас”, дея иқтибос келтирган “Ўзбеккосмос” вакилидан Kun.uz нашри.
Мулозим таъкидича, катта маблағ эвазига учирилган фазогир коинотда давлат манфаати йўлида тадқиқотлар олиб бориши керак. Мамлакат бундай тадқиқотлар амалга ошириши учун эса вақт зарур.
Муҳиддин Ибрагимов журналистларнинг Ўзбекистон нега ҳамон сунъий йўлдош учирмаётгани борасидаги саволига ҳам жавоб берган.
“Биз сунъий йўлдош гуруҳини учириш бўйича ишлар олиб боряпмиз. Президент қарори бўйича бизга топшириқ берилган. Биз ҳозир шу бўйича турли давлатлар билан ишлаяпмиз. Ҳисоб-китобни жойига қўйганимиздан кейин охирида таклиф киритамиз”, деган агентлик расмийси.
“Ўзбеккосмос” вакилига кўра, Ўзбекистон Туркий давлатлар ташкилоти доирасида, хусусан, Туркия билан сунъий йўлдошни биргаликда учириш имкониятларини муҳокама қилмоқда.
2019 йил август ойида ташкил этилган “Ўзбеккосмос” агентлигига фазовий тадқиқотлар ва технологиялар соҳасида ягона давлат сиёсати, стратегик йўналишларни ишлаб чиқиш вазифаси юкланган.
“Ўзбеккосмос” аввалроқ ўтган йил давомида мамлакатнинг қарийб 721 гектар ер майдонида 1928 та ноқонуний чиқиндихона борлигини аниқлагани ҳақида маълум қилганди.
Урушга борган яна бир ўзбекистонликнинг жазоси енгиллатилди
Россия томонида Украинага қарши курашган Ўзбекистон фуқаросининг жазоси енгиллаштирилди.
Gazeta.uz нашрининг суд ҳужжатларини ўрганган ҳолда ёзишича, жиноят ишлари бўйича Қашқадарё вилояти Деҳқонобод тумани суди 2024 йил 31 октябрида ушбу шахсни Жиноят кодексининг 154- (ёлланиш) ва 223-моддалари (Ўзбекистон Республикасининг давлат чегарасини ёриб ўтиш йўли билан, бир гуруҳ шахслар томонидан олдиндан тил бириктириб, такроран ёки хавфли рецидивист томонидан содир этилган қонунга хилоф равишда чет элга чиқиш ёки Ўзбекистон Республикасига кириш) билан айбдор деб топган. Унга 6 йил озодликдан маҳрум қилиш жазоси тайинланган.
Аниқланишича, 2024 йил февралда мавсумий ишлаш учун Бухородан Санкт-Петербургга борган судланувчи Россия Мудофаа вазирлиги билан шартнома тузган ва рус қуролли кучларида бир йил давомида пул мукофоти эвазига ҳарбий хизмат ўташ мажбуриятини олган.
Ўн бир кунлик ҳарбий тайёргарликдан кейин эркак 2024 йил 28 март куни тан олинмаган Донецк Халқ Республикасининг Новомихайловка қишлоғидаги жанговар ҳудудга жўнатилган. 31 март куни бўлиб ўтган жангларда у дрон портлаши оқибатида яраланган ва Россиянинг Волгоград вилоятидаги ҳарбий госпиталга даволаниш учун олиб кетилган.
Айбланувчи 12 июль куни Ўзбекистонга қайтиб келган ва ўз ихтиёри билан ДХХнинг Қашқадарё вилояти бошқармасига иқрорлик билан мурожаат қилган.
Маълум бўлишича, Қашқадарё вилояти суди апелляция инстанцияси эркакка тайинланган жазони қайта кўриб чиққан ва 6 йил қамоқни икки йиллик синов муддатига алмаштирган. Апелляция инстанцияси судланувчининг соғлиғи (онкологик касаллик ва жароҳатлар), муқаддам судланмагани, айбига иқрорлиги, жиноятни очишдаги ёрдами, шунингдек, унинг оилавий аҳволи (ягона боқувчи, вояга етмаган болалари бор) каби омилларни ҳисобга олгани айтилмоқда.
Сўнгги вақтларда ижтимоий тармоқларда Украина урушида қатнашган ўзбекистонликларга енгил жазо тайинланаётгани хусусидаги муҳокамаларни кузатиш мумкин.
Озодлик аввалроқ жанговар ҳаракатлар мобайнида ўндан ортиқ украиналик ҳарбийни ўлдирган 39 ёшли Т.А.га 4 йилу 2 ой муддатга озодликни чеклаш жазоси тайинлангани ҳақида хабар қилган эди.
Мирзиёев: Ўзбекистон ялпи ички маҳсулоти 115 млрд долларга етди
Ўзбекистоннинг ялпи ички маҳсулоти (ЯИМ) 2024 йилда 6,5 фоизга ошиб, 115 миллиард долларга етган.
Президент Шавкат Мирзиёевнинг 16 январь куни инвестицияларни кенг жалб этиш ва экспортни ошириш юзасидан ўтказилган видеоселектор йиғилишида билдиришича, ўтган йили хорижий инвестиция 1,6 баробар ўсган ҳолда 34,9 миллиард долларни ташкил қилган. Қиймати 10 миллиард долларлик 242 та йирик ва ўрта лойиҳалар ишга тушган, экспорт илк бор 27 миллиард долларга чиққан.
Давлатобод, Янги Наманган, Мирзо Улуғбек, Чилонзор, Шайхонтоҳур туманлари, Наманган ва Самарқанд шаҳарларида инвестициялар 300 миллион доллардан ошган.
Ўзбекистон раҳбарияти 2030 йилга бориб ЯИМни 200 миллиард долларга, унинг аҳоли жон бошига тақсимотини эса 5000 долларга етказиш режаcини эълон қилган эди.
Камчиликлар туфайли Қаршидаги ҳибсхона фаолияти тўхтатилди
Мониторинг жараёнида аниқланган бир қатор камчиликлар сабаб Қашқадарё вилояти Қарши тумани ИИБ вақтинча сақлаш ҳибсхонаси фаолияти тўхтатилди. Бу ҳақда Олий Мажлиснинг Инсон ҳуқуқлари бўйича вакили (омбудсман) матбуот хизмати маълумот тарқатди.
Омбудсман ҳамда унинг ҳузуридаги жамоатчилик гуруҳлари 2024 йилда вилоятдаги вақтинча сақлаш ва тергов ҳибсхоналари, жазони ижро этиш муассасалари ҳамда махсус қабулхоналарни мониторингдан ўтказиб бир қатор камчиликлар аниқлаган.
Жумладан, Қарши шаҳри ИИО фаолиятини мувофиқлаштирувчи бошқармаси, Қарши ва Косон туманлари ИИБнинг вақтинча сақлаш ҳибсхоналарида шахсларни сақлаш шароитлари белгиланган меъёрий талабларга жавоб бермаслиги кузатилган.
Шунингдек, камералар таъмирталаб ҳолатга келиб қолгани, табиий ва сунъий ёруғлик тизими, санитария-гигиена ҳолати, ҳаво алмаштириш тизими талаб даражасида эмаслиги қайд этилган.
Қарши тумани ИИБ вақтинча сақлаш ҳибсхонаси фаолияти тўхтатилиб, сақланаётган шахслар капитал таъмирланган Касби тумани ИИБ вақтинча сақлаш ҳибсхонасига кўчирилган.
Омбудсман камчиликларни бартараф этиш бўйича Ички ишлар вазирлигига тақдимнома киритган.
Айни пайтда вазирлик ҳибсхоналар шароитларини яхшилаш бўйича амалий чоралар кўраётгани билдирилган.
Олий Мажлиснинг Инсон ҳуқуқлари бўйича вакили 2024 йилнинг 10 ойи мобайнида ҳуқуқни муҳофаза қилувчи органлар ходимлари томонидан ҳаракатланиш эркинлиги чекланган шахслар сақланадиган жойлардаги фуқароларга нисбатан руҳий, психологик, жисмоний ёки бошқача тарзда босим ўтказилгани юзасидан 158 та шикоят келиб тушганини маълум қилганди.
Шикоятларни кўриб чиқиш натижасида 10 нафар ходимга нисбатан интизомий таъсир чораси қўлланган. 3 та ҳолатда ходимларга нисбатан Ўзбекистон Жиноят кодексининг тегишли моддалари бўйича жиноят иши қўзғатилган.
Сирдарё ҳокими Акмалжон Маҳмудалиев ишдан олинди
Сирдарё вилояти ҳокими Акмалжон Маҳмудалиев лавозимидан озод этилди.
Президент Шавкат Мирзиёев раислигида 16 январь куни ўтказилган инвестиция ва экспорт масалаларига бағишланган видеоселектор йиғилишида маълум қилинишича, Сирдарё ҳокими инвестицияларни жалб қилиш, қишлоқ хўжалигини ривожлантириш ва бошқа йўналишлардаги фаолиятда жиддий камчиликларга йўл қўйган.
Йиғилишда инвестиция ва экспорт масаласини ўз ҳолига ташлаб қўйгани сабаб Беруний, Қораўзак, Қўнғирот, Пешку, Янгиобод, Қамаши, Хонқа, Шовот, Ромитан, Деҳқонобод, Миришкор, Чироқчи, Нарпай, Нуробод ва Гулистон туманлари ҳамда Оҳангарон шаҳри – жами 16 ҳудуд ҳокимига ҳайфсан эълон қилинган.
50 ёшли Акмалжон Маҳмудалиев 2022 йил 26 ноябридан буён Сирдарё вилоятини бошқариб келаётганди. У бунга қадар Вазирлар Маҳкамаси масъул ходими, Учкўприк тумани ҳокими, Навоий вилояти ҳокими ўринбосари каби лавозимларда ишлаган.
Маҳаллий матбуотнинг хабар қилишича, икки ҳафта муқаддам Акмалжон Маҳмудалиев бошқа ишга ўтиши муносабати билан ўрнига янги ҳоким тайинланиши кутилаётгани ҳақида хабар тарқалган, аммо ҳокимлик буни рад этган эди.
Бухорода икки минг йиллик аслаҳалар топилди
Бухоро вилояти Қоракўл туманидаги Пойкент манзилгоҳидан милоддан аввалги I ва милодий I асрларга оид қурол-аслаҳа ҳамда бошқа осори атиқалар топилди.
“Халқ сўзи” газетаси хабарига кўра, нодир ашёлар саклар ва массагетлар даврида ибодатхона вазифасини ўтаган ҳудудда олиб борилган археологик қазишмалар пайтида аниқланган.
Топилмалар орасида турли ўлчамдаги ханжарлар, ниқоб бўлаклари, камон ва найза учлари, аскарлар зирҳлари, қўл жангида ишлатиладиган металл узуклар бор.
Бухоро давлат музей-қўриқхонаси реставратори Дилмурод Холовга кўра, бу Марказий Осиёда топилган энг қадимий металл қуроллар коллекциясидир.
Олимлар қазишма жараёнида оловни ташишда ишлатилган қўнғироқ ҳамда вазифаси ҳали аниқланмаган айлана шаклдаги қурилмани ҳам топишган.
Маълумот ўрнида: Ўзбекистон Фанлар академияси Археология институти археологлари ва Россия Давлат эрмитажининг Бухоро экспедицияси Пойкент харобаларида 43 йилдан буён тадқиқот олиб боради.
Айни пайтда топилмаларни консервациялаш, таъмирлаш ишлари олиб борилаётганини қайд этган “Халқ сўзи” нашри савобталаб тадбиркорларни реставраторларга ҳомийлик кўрсатишга даъват қилган.
Озодлик аввалроқ Ўзбекистон жануби-шарқидаги тоғларда ўрта асрларга оид Тугунбулоқ ва Тошбулоқ шаҳарлари қолдиғи топилгани ҳақида хабар қилган эди.
Андижонда cобиқ ҳоким янги лавозимга тайинланди
Андижон туманининг собиқ ҳокими Абдужаббор Эгамбердиев Ўзбекистон касаба уюшмалари федерациясининг Андижон вилояти кенгаши раиси лавозимига тайинланди.
2024 йил 18 декабр куни амалга оширилган тайинловдан жамоатчилик қарийб бир ой ўтиб хабар топмоқда.
Kun.uz нашрининг аниқлик киритишича, собиқ ҳоким сўнгги вақтларда Агросаноат мажмуи ходимлари касаба уюшмаси республика кенгашининг Андижон вилояти бўйича масъул ташкилотчиси лавозимида фаолият юритиб келган.
2021 йил февралидан 2022 йил сентябригача Андижон туманига ҳокимлик қилган Абдужаббор Эгамбердиев сайёр қабулда фуқароларга пойгакдан жой бергани ортидан ижтимоий тармоқларда танилган, жамоатчилик уни “ўзини ҳоким эмас, хондек тутаётган”ини танқид қилган эди.
Озодлик аввал хабар қилганидек, Эгамбердиев бошқа тўрт нафар туман ҳокими билан бир қаторда мамлакат президентининг 2022 йил 27 сентябрь кунги қарори асосида “давлат хизматчиси этикасига номуносиб хатти-ҳаракатлари, раҳбарлик маданиятини сақламагани, ўтказилган қабулларда фуқароларга ҳурматсизликка йўл қўйгани ва фаолиятидаги бошқа камчиликлари учун” ишдан олинган эди.
Кейинчалик Абдужаббор Эгамбердиев судлангани маълум бўлди. Жиноят ишлари бўйича Марҳамат туман судининг 2023 йил 8 февралдаги ҳукмига мувофиқ у ўзбошимчалик, мансабга совуққонлик билан қараш ҳамда ҳокимият ёки мансаб ваколатини суиистеъмол қилиш жиноятларини содир этганликда айбдор деб топилган. Икки йил мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилинган собиқ ҳокимга икки йил муддатга ахлоқ тузатиш ишлари жазоси тайинланган.
Олий суд ўтган йил бошида Эгамбердиевга тайинланган жазо юмшатилганини билдирганди.
Ўзбекистон ва БАА стратегик шерикларга айланишди
Жорий йилнинг 15 январь куни Абу Даби шаҳрида Ўзбекистон Республикаси ва Бирлашган Араб Амирликлари ўртасида Стратегик шериклик ўрнатиш тўғрисида декларация имзоланди. Бу ҳақда Ўзбекистон президенти матбуот хизмати маълум қилди.
Абу Дабидаги “Қаср аш-Шати” қароргоҳида Ўзбекистон президенти Шавкат Мирзиёев ва БАА президенти Шайх Муҳаммад Ол Наҳаён учрашуви якунида Инвестицияларни ўзаро рағбатлантириш ва ҳимоя қилиш тўғрисида, Молиявий-техник ҳамкорлик тўғрисида, Стандартлаштириш, метрология ва мувофиқликни баҳолаш соҳасидаги ҳамкорлик тўғрисида каби ҳукуматлараро битимлар ҳам маъқулланган.
Икки давлат раҳбари иқтисодий ҳамкорликнинг янги моделини, жумладан, сунъий интеллект, рақамлаштириш, “яшил” энергетика, шаҳарсозлик ва инфратузилма, туризм, хусусий бизнес каби 6 та асосий йўналишни белгилаб олишган.
Абу Даби ва Тошкент 2030 йилга қадар ўзаро савдо ҳажмини 10 баробарга кўпайтириш ва инвестиция портфелини 50 миллиард долларга етказиш режасини эълон қилишган.
Стратегик шериклик давлатлараро дипломатик муносабатларнинг иттифоқчиликдан аввалги босқичидир.
БАА Ўзбекистон стратегик шериклик муносабатларини ўрнатган ўн олтинчи давлатдир. Ҳозирга қадар расмий Тошкент АҚШ, Россия, Хитой, Япония, Корея, Қозоғистон, Туркманистон, Қирғизистон, Тожикистон, Туркия, Озарбайжон, Венгрия, Ҳиндистон, Покистон, Қатар билан стратегик шерикликка доир ҳужжат имзолаган. Ўзбекистон Россия ва Қозоғистон билан айни пайтда иттифоқчи ҳам ҳисобланади.
Озодлик аввал хабар қилганидек, Ўзбекистон сўнгги бор 2024 йил апрель ойида Қатар билан икки томонлама муносабатларни стратегик шериклик мақомига кўтарганди.
Самарқандда ўқувчи ўзини 8-қаватдан ташлаб ҳалок бўлди
Самарқанд шаҳрида 14 ёшли қиз ўзини юқори қаватдан пастга ташлаб, жонига қасд қилди.
Gazeta.uz нашрининг Бош прокуратура матбуот хизматига таянган ҳолда ёзишича, фожиа 13 январь куни соат 17:30 ларда Баҳор маҳалласида содир бўлган. 29-мактабнинг 8-синф ўқувчиси М.Р. кўп қаватли тураржой биносининг 8-қават йўлак деразасидан ўзини пастга отган.
Ҳолат юзасидан Самарқанд шаҳри прокуратураси томонидан терговга қадар текширув ҳаракатлари олиб борилмоқда.
Ҳолатга аниқлик киритиш мақсадида судга оид тиббий экспертизаси ҳамда масъул идораларга нисбатан хизмат текшируви тайинлангани билдирилган.
Самарқанд шаҳрида 2024 йилнинг 12 декабрига ўтар кечаси таниқли бюти-блогер ва косметолог Гўзал Маҳматқулованинг 8-қават деразасидан тушиб кетиб ўлгани ҳам муҳокамаларга сабаб бўлганди.
Расмийлар марҳума ўз жонига қасд қилганини айтишган, аммо яқинлари бу версияни рад этишган. Ҳодиса маиший зўравонлик оқибати деган тахмин ҳам илгари сурилганди.
Uzbekistan Airways’га қарашли учоқ двигатели парвоз пайти ишдан чиқди
Uzbekistan Airways авиаширкатига қарашли Airbus А320 самолётининг двигатели парвоз пайти ишламай қолди.
Авиаташувчи матбуот хизмати хабарномасига кўра, техник носозлик 15 январь куни HY9607 рейс билан, Бухоро – Москва (Внуково) йўналишида парвоз қилган учоқда кузатилган.
Cамолёт двигателларидан бири Россия аэропортига қўниш пайти ишдан чиққан. Экипаж зарурий чораларни кўриб, бортида 132 йўловчи бўлган ҳаво кемасини муваффақиятли қўндирган.
Daryo.uz нашри хабарига кўра, самолётдаги техник носозлик ортидан Uzbekistan Airways авиакомпаниясининг бир нечта парвози мажбурий кечиктирилаган.
Авиаширкатнинг ўзи самолёт таъмирланаётгани, жадвалга мувофиқ кейинги рейсларни амалга ошириш учун Внуковога захира ҳаво кемаси жўнатилганини қайд этаркан, юзага келган ноқулайлик учун узр сўраган.
Дунё авиаташувчилари каби Uzbekistan Airways ширкатига қарашли учоқларда ҳам техник носозликлар рўй бериб туради.
Озодлик аввалроқ икки йилга қолмай ишдан чиққан 200 миллион долларлик Dreamliner учоғи ҳақида таҳлилий мақола чоп этганди.
БАА ширкати Тошкентда аэротакси хизматини йўлга қўймоқчи
Бирлашган Араб Амирликларининг Jetex компанияси Тошкентда аэротакси ва VIP такси хизматларини жорий этмоқчи. Бу эса туризм ривожига ижобий таъсир кўрсатиб, VIP мижозларга қўшимча қулайлик яратиши кутилмоқда.
Ўзбекистон Транспорт вазири Илҳом Маҳкамов ва Jetex компанияси таъсисчиси Адел Мардини томонидан имзоланган ҳамкорлик меморандумида транспорт соҳасидаги яна бошқа қўшма лойиҳалар ҳақида ҳам сўз боради.
Транспорт вазирлиги матбуот хизматининг маълум қилишича, Jetex компанияси “Тошкент–Шарқий” аэропортида FBO шаклида давлат хусусий шерикчилиги асосида VIP ва CIP мижозларга хизмат кўрсатишни ташкил этиш бўйича инвестицион лойиҳани амалга оширади.
Лойиҳа доирасида кичик авиация соҳасида таъмирлаш, сотиш ва сақлаш хизматлари йўлга қўйилади.
FBO (Fixed Base Operator) аэропортларда ҳаво кемалари ва йўловчиларга комплекс хизматлар кўрсатиш фаолиятидир.
Ўзбекистон Инвестициялар, саноат ва савдо вазирлиги матбуот хизмати маълумотига кўра, президент Шавкат Мирзиёевнинг ташрифи олдидан Абу Дабида икки давлат тадбиркорлари ва мутасаддилари ўртасида 15 та шартнома ва битим имзоланган.
Ҳужжатлар энергетика, соғлиқни сақлаш, қишлоқ хўжалиги, инфратузилмани ривожлантириш, сув таъминоти, транспорт, логистика соҳаларини қамраб олади.
Вазирлик қайдича, Ўзбекистон 2023 йилда 1,08 миллиард доллар, 2024 йилда эса 1,5 миллиард доллардан зиёд БАА инвестицияларини ўзлаштирган.
ДХХ раисига энг юқори ҳарбий унвон берилди
Ўзбекистон Давлат хавфсизлик хизмати раиси Баҳодир Қурбоновга генерал-полковник ҳарбий унвони берилгани маълум бўлмоқда.
Kun.uz мухбири хабарига кўра, ДХХ раиси 14 январь куни Тошкентда Ватан ҳимоячилари кунига бағишлаб ўтказилган байрам тадбирида уч юлдузли генерал погони тақилган формада қатнашган.
Генерал-полковник Ўзбекистонда тинчлик даврида бериладиган энг юқори ҳарбий унвон саналади.
55 ёшли Баҳодир Қурбонов 2024 йил ноябридан буён мамлакат махсус хизматини бошқариб келмоқда.
Озодлик аввал хабар қилганидек, 2024 йил 23 ноябрь куни ўтган ҳукумат мажлисида президент Шавкат Мирзиёев ДХХ раиси Абдусалом Азизовни лавозимдан бўшатган ва унинг ўрнига мудофаа вазири Баҳодир Қурбоновни тайинлаганди.
Баҳодир Қурбонов 2015-2018 йилларда Тошкент шаҳар Ички ишлар бош бошқармаси бошлиғи, 2018-2019 йилларда, Тошкент ҳарбий округи қўшинлари қўмондони, 2019-2024 йилларда Ўзбекистон мудофаа вазири лавозимида фаолият юритган. Унга 2021 йил 13 январида генерал-лейтенант ҳарбий унвони берилганди.
Истанбулда қўлбола ароқдан олти нафар ўзбекистонлик вафот этди
Туркиянинг Истанбул шаҳрида қалбаки спиртли ичимликлар истеъмол қилиш оқибатида ўзбекистонлик олти фуқаро вафот этган. Бу ҳақда Ўзбекистоннинг Истанбулдаги бош консулхонаси маълумот тарқатди.
Дипломатик ваколатхона қайдича, қўлбола ароқ ичиш натижасида ҳаётдан кўз юмган ўзбекистонликларнинг беш нафари эркак, бири эса аёл кишидир. 35–40 ёшдаги қурбонлар “заҳри қотил”ни Истанбулнинг Ақсарай туманидан сотиб олгани айтилган.
14 январь оқшоми ҳолатига Истанбул шаҳрида жами 38 киши сохта спиртли ичимлик истеъмоли оқибатида заҳарлангани очиқланган. Улардан 26 нафари чет эл фуқароларидир. Касалхонага мурожаат қилганларнинг 11 нафари вафот этган.
Қўлбола ароқдан заҳарланиш ҳодисаси ортидан маҳаллий полиция кенг қамровли тергов ишларини бошлаб юборган.
Бош консулхона хабарномасида “мазкур ҳолатга алоқадорликда айбланиб, 2 нафар Туркманистон фуқароси қўлга олинган”и, “уларга нисбатан жиноят иши очилган”и қўшимча қилинган. Ўзбек дипломатлари Истанбулдаги ўзбекистонликларни спиртли ичимликлар истеъмолидан тийилишга ва эҳтиёткорликка чақиришган.
Раҳбарларнинг коррупцияга мойиллик даражаси баҳоланади
Ўзбекистон Давлат хизматини ривожлантириш агентлигининг Раҳбар кадрларни баҳолаш марказида 2025 йил февраль ойидан бошлаб йил давомида камида 500 нафар раҳбарлик лавозимларида ишлаётган ва ушбу лавозимлар учун захирада турганларнинг коррупцияга мойиллик даражаси баҳоланади.
Жамоатчилик муҳокамасига қўйилган 2025 йилга мўлжалланган давлат дастури лойиҳасида ана шу талаб илгари сурилган.
Ҳужжатда мулозимларнинг коррупцияга мойиллик даражасини ўрганиш Коррупцияга қарши курашиш агентлигининг буюртмаси асосида ўтказилиши қайд этилган.
Gazeta.uz нашрининг аниқлик киритишича, давлат хизматчиларида коррупцияга нисбатан муросасиз муносабатни шакллантириш, уларга “ҳалоллик вакцинаси”ни сингдириш ҳамда бу борада превентив механизмларни жорий этиш ҳам кўзда тутилмоқда.
Бу доирада БМТнинг Коррупцияга қарши кураш конвенцияси, халқаро ташкилотлар томонидан Ўзбекистонга билдирилган тавсиялар ҳамда бошқа халқаро стандартларнинг бажарилишини мониторинг қилиш бўйича электрон платформа ишга туширилади.
Лойиҳада давлат хизматчиларида коррупцияга нисбатан муросасиз муносабатни сингдириш бўйича қадриятлар тизимини шакллантириш юзасидан тадқиқотлар олиб бориш, шу асосда таъсирчан чора-тадбирларни жорий этиш каби мақсадлар ҳам баён қилинган.
“Ўзбекистон Республикасида коррупцияга қарши курашиш тўғрисида миллий маъруза”га кўра, 2023 йилда коррупцияга оид жиноятлар оқибатида давлат манфаатларига 1,4 триллион сўм миқдорида зарар етказилган.
Аввалроқ Коррупцияга қарши курашиш агентлиги 2024 йилнинг биринчи ярмида Ўзбекистонда 3837 нафар шахс коррупцияга оид жиноят учун жиноий жавобгарликка тортилганини билдирганди.
Озодлик бир муддат олдин коррупцияга қарши кураш манзарасида юзлаб коррупционер ишга тикланганига эътибор қаратган эди.
