Ўзбекистоннинг айрим шаҳарларига ички авиа ва темир йўл қатновлари 18 майдан тикланади. Бу ҳақда Республика махсус комиссиясининг қарори қабул қилинди.

Қарорга асосан Тошкент шаҳридан Нукус, Урганч, Термиз шаҳарларига бориш ва қайтиш авиақатновлари тикланади.

Бундан ташқари Тошкент шаҳридан Навоий, Бухоро, Қарши шаҳарларига “Афросиёб” тезюрар поезди ҳамда Фарғона водийсига темир йўл қатновини қайта йўлга қўйиш назарда тутилган.

Авиа ва темир йўл қатновларини ташкил этишда барча карантин қоидаларига амал қилиш, жумладан, йўловчилар сонини камайтириш, дезинфекция қилиш ва бошқа санитария талаблари сўзсиз бажарилиши талаб этилади.

Республика махсус комиссияси томонидан карантин даврида маҳаллий йўналишларда авиа ва темир йўл қатновларини йўлга қўйишнинг Вақтинчалик тартиби тасдиқланди. Мазкур тартибни бузганлар маъмурий жавобгарликка тортилади.

Ўзбекистонлик тадбиркорлар Афғонистоннинг муҳим тармоқларига, жумладан, нефть ва газ конларини қидириш ва қазиб олиш, саноатни ривожлантириш, Саманган вилоятида цемент заводи қурилишига сармоя киритади. Бу ҳақда Ўзбекистон бош вазири ўринбосари Жамшид Хўжаев Тошкентда Афғонистон муваққат ҳукумати бош вазирининг иқтисодий масалалар бўйича ўринбосари вазифасини бажарувчи Мулло Абдул Ғани Бародар билан музокараларда маълум қилган.

Gazeta.uz нашрининг хабар қилишича, Мулло Абдул Ғани Бародар ташрифни самарали деб атаган ва Ўзбекистон расмийлари билан музокаралар чоғида савдони кенгайтириш, электр энергияси импорти, Афғонистон қишлоқ хўжалиги маҳсулотларини экспорт қилиш, транспорт инфратузилмасини ривожлантириш, темирйўл қурилиши бўйича келишувларга эришилганини таъкидлаган.

“Толибон” мулозимига кўра, электр узатиш линиясини қуриш лойиҳаси қийматини 252 млн доллардан 222 миллион долларгача камайтиришга муваффақ бўлинган.

“Савдо, энергетика, авиация, қишлоқ хўжалиги, темирйўл транспорти соҳаларида тегишли вазирлар билан бир неча бор учрашув ўтказилди. Бу йўналишларда янада олдинга силжиш мумкин”, деган Бародар.

“Толибон” мулозими 23 февраль куни Ўзбекистон билан Ҳайратон–Ҳирот темирйўли лойиҳаси бўйича ҳам келишувга эришилгани, қурилиш техник-иқтисодий асослаш якунланганидан кейин 10 кун ичида бошланишини маълум қилган.

Томонлар, шунингдек, ўнта афғон товарига ва ўнта ўзбек товарига божхона тўловларини нолга туширишга келишишган.

Озодлик аввалроқ Ўзбекистон бош вазири Абдулла Арипов Тошкентда Толибон шакллантирган афғон ҳукумати раҳбарининг ўринбосари в.б. Мулло Aбдул Ғани Бародар билан музокара ўтказгани ҳақида хабар қилган эди.

Ўзбек расмийлари “Толибон” ҳаракати вакиллари 2021 йил 15 августида Кобулни эгаллаб олганидан буён улар билан орани бузмасликка уриниб келишади. Расмий Тошкент толиблар ҳокимият тепасига келганидан буён бир неча бор Афғонистонга инсонпарварлик ёрдамини йўллаган.

Толиблар ҳокимиятга келганидан буён дунёдаги мамлакатлардан биронтаси у шакллантирган ҳукуматни расман тан олган эмас.

Ўзбекистон Афғонистоннинг Тошкентдаги элчихонасини 2024 йил февраль ойида янги маъмурият ихтиёрига топширган.

Ўзбекистон ташқи ишлар вазири Бахтиёр Саидов 2024 йил 9 октябрь куни Афғонистоннинг Тошкентдаги дипломатик миссияси янги раҳбари Абдул Ғаффор Теравийни қабул қилган.

Ўтган йил охирида Афғонистон миллий электр энергияси ширкати (DABS) Ўзбекистон билан электр энергияси импорти бўйича келишув муддатини узайтирганди.

АҚШ фуқаролик атом энергияси технологиялари ҳамда муҳим фойдали қазилмалар йўналишида сармоя киритиш учун Ўзбекистон билан ҳамкорлик қилиш истагида.

Давлат департаменти матбуот хизмати қайдича, Ўзбекистон ташқи ишлар вазири Бахтиёр Саидов ва АҚШ давлат котиби Марко Рубионинг ўтган ҳафта бўлиб ўтган телефон мулоқотида шу масала ҳам муҳокама этилган.

Марко Рубио Бахтиёр Саидов билан суҳбатда Вашингтон Ўзбекистоннинг мустақиллиги, суверенитети ва ҳудудий яхлитлигини қўллаб-қувватлашини яна бир карра таъкидлаган.

Вашингтон, шунингдек, Тошкентга ноқонуний миграцияга чек қўйиш ва терроризмга қарши курашдаги ҳамкорлик учун миннатдорлик билдирган.

Аввалроқ Ўзбекистон ташқи ишлар вазирлиги тарқатган хабарномада “икки ва кўп томонлама алоқаларнинг муҳим мавзулари” муҳокама қилингани билдирилгани ҳолда, атом энергияси технологиялари ҳамда муҳим фойдали қазилмалар масалалари кўтарилгани очиқланмаган эди.

Озодлик аввал хабар қилганидек, Ўзбекистон 2024 йил июнь ойида “Росатом” давлат корпорацияси билан кичик қувватли АЭС қурилишига доир ҳужжатни имзолаган. 330 МВт қувватга эга станция (ҳар бири 55 МВт қувватга эга олтита реактор) Жиззах вилояти ҳудудида барпо этилади.

Ўзбекистон Россия билан биргаликда КҚАЭС қуришга киришаётгани маҳаллий фаолларнинг эътирозига сабаб бўлган. Жамоатчилик бу лойиҳа Кремль қўлида Ўзбекистонга қарши “шантаж қуроли” бўлиб қолишидан хавотир билдирган.

АҚШнинг Ўзбекистондаги элчиси Жонатан Хеник ҳам Ўзбекистон ҳукуматини АЭС қурилишида техник ҳамкорларни танлашда ўта эҳтиёткор бўлишга чақирганди.

Европа Иттифоқи Украинага қарши уруш бошланганининг уч йиллиги муносабати билан Россияга қарши ўн олтинчи санкциялар пакетини қабул қилди.

Брюссель бу гал Украинанинг ҳудудий яхлитлиги, суверенитети ва мустақиллигига путур етказувчи хатти-ҳаракатларга алоқадорлик сабаб 48 нафар жисмоний ва 35 нафар юридик шахсга нисбатан чеклов чоралари қўллаган.

“Мана, уч йилки, Россия ўзига тегишли бўлмаган ерни тортиб олиш мақсадида Украинани аёвсиз бомбаламоқда... Ким босқинчи экани, уруш учун ким жавоб бериши ва товон тўлаши кераклиги борасида шак-шубҳа йўқ. Санкцияларнинг ҳар бир пакети Кремлни уруш олиб бориш учун маблағдан маҳрум этади”, деган Европа Иттифоқи дипломатик маҳкамаси раҳбари Кая Каллас.

ЕИнинг санкциялар рўйхатига Ўзбекистоннинг Uzstanex компанияси ҳам киритилган.

Kun.uz нашрининг ёзишича, StanexGroup ҳолдинги таркибига кирувчи мазкур ширкат Ўзбекистон, Қозоғистон, Қирғизистон, Тожикистон ва Туркманистонда механик дастгоҳларнинг улгуржи савдо билан шуғулланади. Устав фонди 65 миллион сўм. Ягона таъсисчиси – Абрамов Василий Витальевич, директори – Бойцов Дмитрий Александрович. Ширкат офиси Тошкент шаҳри Яшнобод туманида жойлашган.

2024 йил октябрь ойида АҚШ молия вазирлиги ҳам “Россияга қарши санкцияларни четлаб ўтишда иштироки учун” Uzstanex компаниясига нисбатан санкция киритган.

2023 йил 23 июнида Ўзбекистондаги Alfa Beta Creative ва GFK Logistic Asia ширкатлари ҳам АҚШ, ЕИ ва Япония санкциялари рўйхатига киритилган эди.

2023 йил 18 декабрда эса Тошкентдаги Mvizion МЧЖ ЕИ томонидан “қора рўйхат”га тиркалганди.

Озодлик аввал хабар қилганидек, ЕИнинг санкциялар бўйича махсус вакили Дэвид О’Салливан Ўзбекистон ҳукуматини санкцияларни четлаб ўтишда Россияга ёрдам беришнинг оқибатларидан огоҳлантирган.

Ғарб матбуоти ҳам санкция остидаги товарлар Хитойдан Марказий Осиё мамлакатлари орқали Россияга келаётганига эътибор қаратганди.

Самарқанд шаҳридаги ISFT институти 1-босқич талабаси ўз жонига қасд қилди, дея хабар қилди Daryo.uz нашри.

Фожиа 19 февраль куни соат 17:00 атрофида содир бўлган.

2005 йилда туғилган С.М. (қиз) Самарқанд шаҳрида жойлашган кўп қаватли уйнинг 9-қаватидаги хонадон деразасидан ўзини пастга ташлаган ва ҳодиса жойида вафот этган.

Бош прокуратура матбуот хизматининг ҳолатга аниқлик киритишича, ўлим сабабини аниқлаш мақсадида суд-тиббий экспертизаси тайинланган. Қизга тегишли бўлган уяли телефон аппарати эса иш учун аҳамиятли маълумотлар мавжудлигига аниқлик киритиш мақсадида компьютер техникавий экспертизасига топширилган.

Ҳолат юзасидан Самарқанд шаҳри прокуратураси терговга қадар текширув ҳаракатлари олиб бормоқда.

Марҳума ҳали турмуш қурмагани, бувиси билан яшаб келгани айтилмоқда.

Сўнгги ойларда Ўзбекистоннинг турли вилоятларида қизларнинг ўзини юқори қаватдан пастга ташлаш орқали жонига қасд қилиши билан боғлиқ бир неча ҳолат қайд этилди.

Жорий йил 7 февраль куни Қашқадарё вилояти Қарши шаҳрида 17 ёшли қиз ўзини юқори қаватдан ташлаш натижасида ҳалок бўлган.

13 январь куни Самарқанд шаҳрида 14 ёшли қиз айни шу йўл билан жонига қасд қилган.

Самарқанд шаҳрида 2024 йилнинг 12 декабрига ўтар кечаси таниқли бюти-блогер ва косметолог Гўзал Маҳматқулованинг 8-қават деразасидан тушиб кетиб ўлгани ҳам муҳокамаларга сабаб бўлган эди. Расмийлар марҳума ўз жонига қасд қилганини айтишган, аммо яқинлари бу версияни рад этишган.

2024 йил ноябрь ойида Сурхондарё вилояти Денов туманида ҳам шу каби фожиа рўй берганди.

Ўзбекистонда ҳайдовчилар томонидан транспорт воситаларини агрессив бошқариш, дрифт, шахмат шаклида ҳаракатланиш каби йўл безориликлари учун жавобгарлик жорий этилмоқда. Мамлакат президенти 20 февраль куни имзолаган ва 21 февралдан кучга кирган қонунда ана шу талаб илгари сурилган.

Ҳужжатга мувофиқ, Маъмурий жавобгарлик тўғрисидаги кодекс янги 128−10-модда (йўл безорилиги) билан тўлдирилган.

Қонун ҳужжатида транспорт воситалари ҳайдовчиларининг бошқа транспорт воситаларининг ҳаракатига қасддан тўсқинлик қилиши, транспорт воситасини сабабсиз сирпантириш (дрифт), ўз йўналишида ҳаракатланиш бўлагини сабабсиз кескин равишда уч ва ундан ортиқ марта узлуксиз ўзгартириш ёки йўл ҳаракати иштирокчиларининг хавфсиз ҳаракатланишига таҳдид солувчи бошқа хатти-ҳаракатлар йўл безорилиги деб баҳоланган.

Мазкур ҳуқуқбузарлик учун базавий ҳисоблаш миқдорининг (БҲМ) 25 баравари (9 миллион 375 минг сўм) миқдорида жарима солиш ёки 1 йилдан 2 йилгача муддатга транспорт воситасини бошқариш ҳуқуқидан маҳрум қилиш тарзидаги жазо назарда тутилган.

Ушбу ҳуқуқбузарлик транспорт воситаларини бошқариш ҳуқуқи бўлмаган ёки транспорт воситаларини бошқариш ҳуқуқидан маҳрум этилган шахс томонидан содир этилса, БҲМнинг 50 баравари (18 миллион 750 минг сўм) миқдорида жарима ёки 15 суткагача маъмурий қамоққа сабаб бўлади.

Озодлик аввалроқ Қашқадарё вилояти Қарши шаҳрида икки йигит дрифт қилишга уриниш оқибатида ҳалок бўлгани ҳақида хабар қилган эди.

Жиноят ишлари бўйича Жиззах вилояти Арнасой тумани суди 24 февраль куни жамоатчилик фаоли ва собиқ депутат Қобул Дўсовни 1 йилу 2 ойга озодликдан маҳрум қилиш ҳақида ҳукм чиқарди. Суд ҳукмига мувофиқ, Дўсов жазони манзил-колонияда ўтайдиган бўлди.

Жиноят иши материалларига кўра, Қобул Дўсов Жиззах вилоятида истиқомат қилган 5 нафар шахсга туҳмат қилиш ва уларни ҳақоратлашда айбланган.

Суд мажлисларида Қобул Дўсов учта эпизод бўйича оқланган ва икки эпизодда 4 кишини ҳақорат қилишда айбдор деб топилган. У Ўзбекистон Жиноят кодексининг 139-моддаси 3-қисми “а” банди ва 140-моддаси 3-қисми “а” бандида назарда тутилган жиноятларни содир этганликда айбли деб топилиб, ЖКнинг 59-моддаси, 59-моддаси 8-қисми ва 61-моддаси тартибида узил-кесил ўташ учун 1 йил 2 ой муддатга озодликдан маҳрум қилинган. Аввалроқ давлат айбловчиси Дўсовни 3 йилга озодликдан маҳрум қилишни сўраган эди.

Суд котибига кўра, Қобул Дўсов Тошкент шаҳар Чилонзор тумани суди томонидан белгиланган бир йиллик озодликни чеклаш қоидаларини бузиб, шу йилнинг 25 январида манзил колонияга юборилганди.

Санкт-Петербургнинг Москва туманидаги қурилиш майдонида 24 ёшли ўзбекистонлик муҳожир ҳалок бўлди. 3,5 метр баландликдан қулаган мигрант воқеа жойида жон бергани айтилмоқда.

78.ru нашри хабарига кўра, фожиага ишчи томонидан техника хавфсизлиги қоидаларининг бузилиши сабаб бўлган.

Ҳодиса юзасидан тергов ишлари олиб борилмоқда, иш фожианинг аниқ сабабини ўрганишга ҳаракат қилаётган Тергов қўмитаси ва Давлат меҳнат инспекцияси томонидан ўрганиляпти.

Ташқи савдо айланмаси бўйича 2025 йилнинг илк ойида Ўзбекистоннинг энг фаол ҳамкори Хитой Халқ Республикаси бўлган.

Статистика агентлиги қайдича, январь ойида ташқи савдо айланмасининг 22,1 фоизи Хитой ҳиссасига тўғри келади. Иккинчи ўринда 17,7 фоизлик улуш билан Россия бормоқда.

Умуман олганда, ўтган ойда Ўзбекистон жаҳоннинг 154 та мамлакати билан савдо алоқаларини амалга ошириб, ташқи савдо айланмаси ҳажмини 4,5 миллиард АҚШ долларига етказган, бу эса 2024 йил шу даврига нисбатан 7,5 фоизга (297,2 миллион АҚШ доллари) кўпдир. Бунинг 3,2 миллиард доллари импорт, 1,3 миллиард доллари эса экспорт ҳиссасига тўғри келади.

Хитой 2023 йил якунларига кўра ташқи савдо айланмаси бўйича Ўзбекистон асосий савдо ҳамкорларининг барчасини ортда қолдириб, биринчи ўринга чиқиб олган эди.

Аввалроқ Озодлик Ўзбекистонда фаолият юритаётган хорижий давлатлар капитали иштирокидаги корхоналар сони бўйича 2024 йилда Хитой Россияни ортда қолдиргани ҳақида хабар қилган.

Ўзбекистон бош вазири Абдулла Арипов 22 февраль куни Тошкент шаҳрида Толибон шакллантирган афғон ҳукумати раҳбарининг ўринбосари в.б. Мулло Aбдул Ғани Бародар билан икки томонлама музокаралар ўтказган. Бу ҳақда бош вазир матбуот котиби Бекзод Ҳидоятов маълум қилди.

Хабарномада сўнгги йилларда Ўзбекистон билан Афғонистон ўртасида савдо-иқтисодий ва маданий-гуманитар соҳалардаги алоқалар изчил ривожланиб бораётгани, 2024 йилда “Термиз халқаро савдо маркази” очилгани икки томонлама савдони ривожлантиришга хизмат қилаётгани урғуланган.

“Учрашувда ўзаро манфаатли алоқаларни янада кенгайтириш, савдо-иқтисодий, энергетика, транспорт ва бошқа соҳаларда ҳамкорликни изчил ривожлантириш масалалари юзасидан атрофлича фикр алмашилди”, дейилган хабарномада.

Маълумотларга кўра, Афғонистон бош вазирининг ўринбосари в.б. Мулло Aбдул Ғани Бародар бошчилигидаги делегация Ўзбекистонда бўлган 22-23 февраль кунлари вазирлар даражасида қатор мулозимлар билан учрашган, шунингдек, Тошкентдаги қатор ишлаб чиқариш объектларида бўлишган.

Ўзбек расмийлари “Толибон” ҳаракати вакиллари 2021 йил 15 августида Кобулни эгаллаб олганидан буён улар билан орани бузмасликка уриниб келишади. Расмий Тошкент толиблар ҳокимият тепасига келганидан бир ой ўтар-ўтмас Афғонистонга илк инсонпарварлик ёрдамини йўллаган.

Ўшандан буён ўтган уч ярим йил мобайнида Тошкент толибларга бир неча бор гуманитар юк жўнатгани маълум. Ана шундай инсонпарварлик ёрдамларининг охиргиси Афғонистонга ўтган йил декабрь ойи охирида юборилган эди.

Ўзбекистон Олий судининг тафтиш инстанцияси Президент администрациясининг собиқ мулозими Комил Алламжонов хонадонида хизмат қилган 7 нафар шахсни оқлади. Бу ҳақда Олий суд матбуот котиби Азиз Обидов маълум қилди.

Обидовнинг билдиришича, “эълон қилинган суд қарорига кўра маъмурий ҳуқуқбузарлик ҳодисасини тасдиқловчи далиллар етарли бўлмаганлиги сабабли, Б. Ёқубов, С. Сидиков, А. Қурбонмуродов, А. Ташов, А. Салимов, Ж. Турғунов ва Х. Зуфаровга нисбатан чиқарилган суд қарорлари бекор қилиниб, маъмурий ҳуқуқбузарликка оид иш МЖтКнинг 271-моддаси 1-бандига асосан тугатилди”.

Маълум бўлишича, Комил Алламжоновга суиқасд қилинган 2024 йилнинг 26 октябрь куни Тошкент вилояти Қибрай тумани ИИБ томонидан майда безориликда айбланиб, 15 суткага қамалган бу шахслар Алламжонов хонадонида хизмат қилишган.

“Иш юзасидан суриштирув ҳаракатларини олиб боришда ҳуқуқбузарлик ҳодисасини тасдиқловчи далилларни тўплаш чораларини кўрмаган ИИБ ходимига нисбатан Ички ишлар вазирлигига, шунингдек ишни судда кўриб чиқишда ҳуқуқбузарлик ҳодисасини тасдиқловчи далиллар етарли эмаслигига эътибор бермаган судьяларга нисбатан Судьялар малака ҳайъатига хусусий ажримлар чиқариш йўли билан муносабат билдирилди”, дейилган Олий суд хабарномасида.

Озодлик тасарруфидаги маълумотларга кўра, Ўзбекистон Республикаси Ҳарбий судида кўрилган Алламжоновга суиқасд ишида еттовлон жабрланувчи сифатида сўроқ қилинган.

Ўзбекистонда ўз фарзандини қонунга хилоф равишда диний таълим олишга жалб этган ота-оналарга ёки уларнинг ўрнини босувчи шахсларга бундан буён базавий ҳисоблаш миқдорининг 5 бараваридан 10 бараваригача миқдорда жарима солинади.

Бундай чора “Бола ҳуқуқларининг кафолатлари тўғрисида” ги қонунга киритилган қўшимчаларда кўзда тутилган.

Жорий йил 20 февралида имзоланган қонун билан ота-оналар ёки уларнинг ўрнини босувчи шахслар ўз боласини шахсий эътиқодларига мувофиқ диний ва ахлоқий жиҳатдан тарбиялаш ҳуқуқига эгалиги, улар томонидан ўз боласини қонунга хилоф равишда диний таълим олишга жалб этишга, яъни болани рўйхатдан ўтказилмаган ёки лицензияга эга бўлмаган ташкилотларга ёхуд махсус диний маълумотга эга бўлмаган ва диний ташкилотларнинг Ўзбекистон бўйича марказий бошқарув органининг рухсатисиз диний таълимни амалга ошираётган шахсларга диний таълим олиш учун топширишга йўл қўйилмаслиги белгиланган.

Ўзбекистон Маъмурий жавобгарлик тўғрисидаги кодексига киритилган қўшимчага мувофиқ, фарзандини ноқонуний диний таълимга жалб этган ота-она биринчи марта жаримага тортилганидан кейин бир йил давомида бу ишни такроран содир этса, унга нисбатан БҲМнинг 10 бараваридан 15 бараваригача миқдорда жарима солиниши ёки 15 суткагача маъмурий қамоқ жазосига тортилиши мумкин.

Ўзбекистон Олий Мажлис Сенати 20 февраль куни тўртинчи ялпи мажлисида “Ўзбекистон Республикасида фуқароларнинг виждон эркинлигини таъминлаш ва диний соҳадаги давлат сиёсати концепциясини тасдиқлаш тўғрисида”ги қонун лойиҳасини маъқуллаб, имзолаш учун президентга юборган.

Етти боб, 41 банддан иборат мазкур концепцияда диний соҳадаги давлат сиёсатининг мақсад ва вазифалар белгиланган. Ҳужжатда, жумладан Ўзбекистонда диний соҳадаги давлат сиёсатининг мақсади фуқароларнинг виждон эркинлигига бўлган ҳуқуқларини амалга ошириш учун тенг шарт-шароитлар яратиш, турли динларга мансуб диний ташкилотлар ўртасида ўзаро муроса ва ҳурмат ўрнатилишига кўмаклашиш, конфессиялараро тотувликни мустаҳкамлаш ва жамиятда диний бағрикенгликни ва дунёвийликни таъминлашдан иборат экани қайд этилган.

Айни пайтда 35 миллиондан зиёд мусулмон яшайдиган Ўзбекистонда давлат саноқли диний таълим маскани билан аҳолининг, хусусан, диний таълимга эҳтиёж сезган ёшларнинг талабини қай йўл билан қоплаши номаълум бўлиб қолмоқда.

Андижон вилоятининг Марҳамат туманида валюта айирбошлаш билан шуғулланиб келган А.Ю. 3 000 АҚШ долларини 39 миллион сўмга сотган вақтида ушланиб, ундан жами 5 410 АҚШ доллари, 51 600 Россия рубли, 13 450 қирғиз соми ва 16,4 миллион сўм пуллар ашёвий далил сифатида олинган. Бу ҳақда 20 февраль куни Бош прокуратура ҳузуридаги Иқтисодий жиноятларга қарши курашиш департаменти матбуот хизмати маълум қилди.

Хабарномада департаментнинг Косон тумани бўлими ва ИИБ ходимлари ҳамкорлигида ўтказилган тезкор тадбирда фуқаро П.М. 3 300 АҚШ долларини 42,7 миллион сўмга сотиб олган вақтида, департаментнинг Нишон тумани бўлими ва ИИБ ходимлари ҳамкорлигида ўтказилган тезкор тадбирда эса фуқаро Д.К. ва бошқалар фуқаро Б.Т.га 3 400 АҚШ долларини 44,2 миллион сўмга сотган вақтида ашёвий далиллар билан ушлангани қайд этилган

“Мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда”, дейилган хабарномада.

Аввалроқ Иқтисодий жиноятларга қарши курашиш департаменти Тошкент шаҳри, Навоий, Қашқадарё, Наманган, Бухоро ва Тошкент вилоятларида валюта айирбошлаш билан шуғулланиб келган шахслар ушлангани, уларга нисбатан Ўзбекистон Жиноят кодексининг тегишли моддаси билан жиноят ишлари қўзғатилгани ҳақида маълумот тарқатган эди.

Валюта айирбошлаш фаолияти билан расман банклар шуғулланадиган Ўзбекистонда сўнгги кунларда ноқонуний саррофларга қарши кураш тадбирлари нима сабабдан кучайтирилгани ҳозирча номаълум. Аввалги президент Ислом Каримов даврида мамлакат банкларида валюталар қиймати сунъий равишда паст курс билан тутиб турилгани туфайли “валюта қора бозори”га катта эҳтиёж сезилган. Мирзиёев ҳокимият тепасига келганидан кейин валюталар курси эркин қўйиб юборилгани ортидан “қора бозор” бироз бўлса-да, ўз актуаллигини йўқотган эди. Шунга қарамай, валюта курсида кескин ўсиш ёки пасайиш кузатилган пайтларда Ўзбекистонда валюта қора бозори қайта жонланиб қолганини кузатиш мумкин.

Ўзбекистоннинг Вашингтондаги элчихонаси ва Нью-Йоркдаги Бош консулхонаси АҚШ расмийларидан мамлакатда миграция тартибини бузгани учун бошқа давлатларга депортация қилиниши мумкин бўлган ўзбекистонликлар ҳақида маълумот беришни сўраб мурожаат қилган. Бу ҳақда Ташқи ишлар вазирлиги матбуот котиби Аҳрор Бурҳонов маълум қилди.

Мулозим АҚШдаги ўзбек дипломатлари анчадан буён “Ўзбекистон фуқароларининг ўз ватанларига хавфсиз депортациясини таъминлаш мақсадида АҚШнинг тегишли ҳуқуқ-тартибот идоралари билан яқиндан ҳамкорлик” қилиб келаётганини, ўзаро келишувларга мувофиқ равишда Америка томони депортация қилинадиган ўзбекистонликлар билан боғлиқ ҳар бир ҳолат ҳақида тезкорлик билан хабардор қилишини, одатий амалиётга кўра депортация қилинган фуқаролар Ўзбекистонга Нью-Йорк-Тошкент йўналиши орқали қайтишини қайд этган.

Аввалроқ The New York Times газетаси АҚШдаги икки юздан зиёд ҳиндистонлик ва марказий осиёлик ноқонуний мигрант Коста Рика Республикасига йўлланиши ҳақида хабар қилган эди. Уларнинг қанчаси ўзбекистонлик эканига ҳақида аниқ маълумот йўқ. Нашр ўз мақоласида Коста Рика ҳукумати 200 нафар ноқонуний муҳожирни ўз мамлакатига қайтаришда Вашингтон билан ҳамкорлик қилишга розилик билдиргани, шу тариқа бу ўлка ноқонуний муҳожирларнинг ўз мамлакатларига етиб боришида кўприк вазифасини ўташини урғулаган.

Айтилишича, Марказий Осиё ва Ҳиндистондан бўлган ноқонуний мигрантлар Коста Рикага тижорат рейслари орқали олиб келиниб, мигрантларга хизмат кўрсатиш марказига жойлаштирилади ва бу жараён АҚШ ҳукумати томонидан молиялаштирилади.

Жорий йил 20 январидан президентлик лавозимига киришган Дональд Трамп ноқонуний миграцияга қарши аёвсиз кураш эълон қилган.

Озодлик аввалроқ АҚШда яшаб келаётган 975 нафар ўзбекистонлик ноқонуний мигрант сифатида бадарға қилиниши мумкинлиги ҳақида хабар қилган эди.

Маълумотларга кўра, 2023 йил сентябридан 2024 йил сентябригача Қўшма Штатлардан Ўзбекистонга 572 киши депортация қилинган.

Ўзбекистон Ички ишлар вазирлиги ЖИЭД тизимидаги 22-сонли умумий тартибли колонияда 7,5 йиллик қамоқ жазосини ўтаётган блогер, Ўзбекистон инсон ҳуқуқлари “Эзгулик” жамияти фаоли Мурод Махсудов жорий йилнинг 18 февраль куни Навоийдаги турмага ўтказилди. Бу ҳақда Озодликка маҳкумнинг яқинлари маълум қилишди.

“Маҳкум М. Махсудов муассасада ўрнатилган ички тартиб қоидаларини бузиб келаётганлиги ва бир йил давомида икки маротаба интизомий жазога тартилганлиги сабабли колония бошлиғининг 13.02.2025 йилдаги қарорига асосан Ўзбекистон Республикаси ЖИКнинг 105-моддаси ва 112(1)-моддасига асосан сақлаш режимини ашаддий бузувчи маҳкум деб топилган”, дейилган жиноят ишлари бўйича Тошкент вилояти Зангиота тумани суди ажримида.

Маҳкум Мурод Махсудов ўталмай қолган 6 йил 2 ой 5 кун озодликдан маҳрум қилиш жазосини 2 йил қисмини ўташ учун турма тартибидаги колонияда ўтайди.

Қонунчиликка кўра, турмалар турмага қамаш тариқасидаги озодликдан маҳрум қилишга ҳукм қилинган шахсларни, шунингдек умумий ва қаттиқ тартибли колониялардан жазони ўташ тартибини ашаддий бузганлиги учун ўтказилган шахсларни сақлаш учун мўлжалланган.

Халқаро ташкилотлар мазкур турдаги жазони ижро этиш муассасаларини ёпишни тавсия қилиб келади.

Блогернинг кекса педагог отаси Маъмуржон Махсудовга кўра, ҳуқуқни муҳофаза қилиш органлари собиқ ходимлари учун қурилган 22-сонли махсус колонияда жазо муддатини ўтаётган Мурод Махсудов тинимсиз шикоятлари учун турмага юборилган.

“Ўғлимни бир неча марта карцерга ташлашди. Унинг Омбудсман қутиларига ташлаган шикоятлари қонунга хилоф равишда қутиларни бузиб, махсус прокуратура олган. Буни қарангки, Омбудсман котибияти ходимлари ҳам қутиларнинг ҳатто бузилмаганини айтиб ўтирибди. Шундай бўлгач, бизни ким эшитади?” деди Маъмуржон Махсудов.

Ижтимоий тармоқлардаги саҳифаларида коррупция ва непотизм жиноятлари ҳақида ёзган блогер М. Махсудов жиноят ишлари бўйича Яшнобод туман суди томонидан 2024 йил 14 июнь куни чиқарилган ҳукмга кўра, Ўзбекистон Республикаси Жиноят кодексининг 167-моддаси 2-қисми “б, г” бандлари, 165-моддаси 2-қисми “б” банди ва 139-моддаси 3-қисми “а, г” бандлари билан айбли деб топилиб, 7 йил 6 ой муддатга озодликдан маҳрум қилинган эди.

Осиё тараққиёт банки (ОТБ) Ўзбекистон ҳукуматининг сув ресурсларини бошқариш секторини модернизация қилиш ва мамлакатда хавфсиз сув таъминотидан фойдаланиш бўйича ҳаракатларини дастаклаш учун 125 миллион доллар миқдорида қарз ажратилишини маъқуллади.

“Ўзбекистондаги сув ресурслари иқлим ўзгариши ва самарасиз фойдаланиш туфайли жиддий таҳдид остида. ОТБ лойиҳаси Ўзбекистонда углерод изини камайтириш учун сувдан фойдаланишни яхшилаш, энергия сарфини камайтириш ва операцион самарадорликни ошириш учун сувни бошқаришнинг ақлли тизимларини жорий этади”, дея иқтибос келтирган Gazeta.uz нашри ОТБнинг Ўзбекистондаги доимий ваколатхонаси директори Канокпан Лао-Арайадан .

Ушбу маблағ иқлим ўзгаришини ҳисобга олган ҳолда сув ресурсларини ақлли бошқариш, миллий сув таъминоти корхонаси ходимларининг институционал салоҳиятини оширишга кўмак бериши кутилмоқда.

ОТБ лойиҳаси, шунингдек, “Ўзсувтаъминот” акциядорлик жамияти ва унинг ҳудудий филиалларига мамлакат бўйлаб асосий сув истеъмоли объектларида сув сарфини ҳисобга олиш ва телеметрия тизимини ўрнатишни якунлашда ёрдам беради.

Лойиҳа доирасида бутун сув таъминоти ва оқова сув инфратузилмаси, шу жумладан, тахминан 4 млн мижоз уланиши учун активлар инвентаризация қилинади ва жойларда географик хариталаш ишлари амалга оширилади.

Ўзбекистон ОТБга 1995 йилда аъзо бўлган. Ўтган 30 йил давомида банк мамлакатга 14,3 миллиард АҚШ доллари миқдорида қарз, грант ва техник кўмак тақдим этган. Халқаро молиявий тузилма, жумладан, соғлиқни сақлаш, қайта тикланувчи энергия манбалари, коммунал хизматлар ва сув таъминоти соҳаларидаги лойиҳаларни қўллаб-қувватлаган.

Озодлик аввалроқ ОТБ Ўзбекистон ҳукуматининг молия бозорини мустаҳкамлаш ва энергетика секторини ривожлантириш бўйича ташаббусларини қўллаб-қувватлаш учун 400 миллион долларлик қарз ажратгани ҳақида хабар қилган эди.