Жорий йил 24 июнида бўлиб ўтадиган Ғалаба парадида иштирок этиш учун 12 мамлакатдан ҳарбийлар Москвага етиб борган, улар орасида ўзбекистонликлар ҳам бор. Бу ҳақда парадда қўмондонлик қиладиган россиялик генерал Олег Салюков маълум қилган.

“Бизнинг ўлкага ўн икки мамлакат – Озарбайжон, Арманистон, Беларус, Қозоғистон, Қирғизистон, Хитой Халқ Республикаси, Молдова, Мўғулистон, Сербия, Тожикистон, Туркманистон ва Ўзбекистондан ҳарбийлар етиб келди”, деган Олег Салюков “Красная звезда” нашрига берган суҳбатида.

Генерал Москвага етиб борган ҳарбийларнинг кўпи Алабинодаги парад майдончасида 15 июнь куни бўлиб ўтган машқда иштирок этганини қўшимча қилган.

“Қизил майдон”даги тадбирда 13 мингдан зиёд ҳарбий иштирок этиши кутилмоқда.

Россия пойтахтида ҳар йили 9 май куни ўтказиладиган Ғалаба паради бу йил коронавирус пандемияси туфайли 24 июнга кўчирилгани ҳақида Озодлик аввал хабар қилганди.

Расмий маълумотларга кўра, Россияда шу кунда коронавирусга чалинганлар сони 550 минг нафардан ошган, қурбонлар сони эса 7,5 минг нафарга яқинлашган. Хасталанганларнинг қарийб 210 минг нафари пойтахт Москва ҳиссасига тўғри келади. Беморларнинг 128 минг нафардан кўпроғи соғайгани айтилмоқда.

АҚШ Давлат котиби Марко Рубио Украина президенти Владимир Зеленскийнинг ўз мамлакатини НАТОга қабул қилиш рад этилган тақдирда унга ядровий қурол бериш талабини реалистик, деб ўйламайди.

Рубио Зеленскийнинг таклифини “жиддий” деб ҳисобламайди ва “ядровий қуролга эга бўлиш муаммонинг ечими эмас”, деб ўйлайди.

АҚШ Давлат котибининг бу гаплари унинг АҚШдаги Breitbart ўнгчи-популистик порталига берган ва 25 февраль куни ёйинланган интервьюсидан ўрин олган.

Рубио ўз сўзида ядровий давлатлар сони кўп эмас, аксинча камроқ бўлиши лозимлигини қўшимча қилган.

Аввалроқ Украина президенти британиялик журналист Пирс Морганга интервью бериб, Украина хавфсизлиги учун етарли кафолат ғарб ҳамкорлари томонидан мамлакатга ядровий қурол берилиши бўлиши мумкинлигини билдирган эди. Зеленский қайдича, бу − ҳатто Украина Шимолий Атлантика альянсига қабул қилинмаган тақдирда ҳам − Россия президенти Владимир Путинни янги ҳужумдан тийиб туриш имконини берган бўларди.

Breitbart порталига берган интервьюсида Россия билан ҳамкорликка умид билдирган Рубио АҚШ билан СССР ўртасидаги муносабатлар тарихига ҳам мурожаат қилган. Жумладан, у совуқ уруш авжига чиққан паллада ҳам “Совет Иттифоқи ва Қўшма Штатлар ўзаро алоқага эга” бўлганини айтган.

“Биз ҳалиям мулоқот қилаётган эдик. Худога шукурки, биз, масалан, [Куба] ракета буҳрони пайтида ҳам мулоқот қилганмиз”, деган АҚШ Давлат котиби.

Марко Рубио ўз сўзида давом этиб, “Биз биргаликда геосиёсий ёки балки, иқтисодий жабҳада ишлашимиз мумкин бўлган нарсалар борми?” дея савол ташлаган. У Вашингтон билан Россия ўртасидаги алоқалар қайта бошланиши истиқболини эслатган.

Бироқ, АҚШ Давлат котиби фикрича, ҳозирги пайтда “бу урушни ҳеч бўлмаганда мустаҳкам оташкесимгача олиб бориш” ёки “тўла тугатиш” устувор вазифа бўлиб ҳисобланади.

Қозоғистон ҳукумати мамлакатдаги илк атом электр станцияси қуриладиган жойни расман тасдиқлади. Бунга оид қарор меъёрий ҳужжатлар базасида ёйинланган.

АЭС қуриладиган жой ўлароқ Балхаш кўли яқинидаги Жамбил тумани (Олмаота вилояти) танланган.

Ҳукумат қарори 2024 йил 30 декабридаёқ имзоланган, бироқ у 2025 йил 25 февралида расман эълон қилингани ортидан кучга кирган.

Қозоғистон расмийлари ўтган йили АЭС қурилиши ҳақида қарор қабул қилишганди. Мазкур қарор қабул қилиниши учун мамлакатда референдум ўтказилган, унда овоз бериш жараёнида кузатувчилар кўплаб қонунбузарликлар кузатилгани ҳақида маълум қилишган.

Қозоғистонда кўплаб экологлар ҳалигача атом электр станцияси қурилишига қарши чиқиб келишмоқда. Улар АЭС қурилиши лойиҳа барпо қилиниши муҳтамал бўлган ҳудуд – Балхаш кўлида салбий акс этиши мумкинлигини айтишмоқда.

Жамоатчилик фаоллари ва сиёсатшунослар АЭС Россия томонидан қурилишидан хавотир изҳор қилишяпти. Уларга кўра, бу Қозоғистоннинг қўшни мамлакатга энергетик қарамлигини янада ошириши мумкин.

Қирғизистон Ички ишлар вазирлиги 24 февраль куни оммавий тартибсизликлар уюштиришда гумонланган 11 киши қўлга олингани ҳақида маълумот тарқатди. Озодликнинг қирғиз хизмати қайдича, қўлга олинганлар орасида парламентнинг собиқ депутати ҳам бор.

ИИВ маълумотига кўра, ҳуқуқ-тартибот идораларига 2024 йил декабридаёқ “Қирқ уруу, жети дубан интимағи” жамоатчилик ташкилотининг айрим аъзолари мунтазам равишда учрашувлар ўтказаётгани, у ерда “мамлакатдаги вазиятни беқарорлаштиришга қаратилган оммавий тартибсизликлар, норозилик тадбирлари ва митинглар уюштиришга чақириқлар” янграётганига оид маълумот келиб тушган.

Мазкур иш доирасида милиция мамлакат Жиноят кодексининг 278-моддаси бўйича (“Оммавий тартибсизликлар уюштириш”) гумонланаётганлар яшайдиган манзилларда тинтувлар ўтказган.

Тинтув натижасида ўқотар ва совуқ қуроллар, ўқ-дорилар, ҳарбийлар кийимлари, гиёҳванд моддалар, шунингдек, диний адабиётлар, мобил телефонлар, флеш-карталар ва “оммавий тартибсизликлар ташкил қилиш бўйича йўриқномалар” мусодара қилинган, дея маълум қилган ИИВ. Вазирлик томонидан ёйинланган видеоёзувда, афтидан, қўлга олинганлар ўртасида бўлиб ўтган суҳбатлар аудиоёзуви келтирилган.

Вазирлик ҳибсга олинган шахсларнинг исм-фамилияларининг бош ҳарфлари ва туғилган йилларини келтирган. Озодликнинг қирғиз хизмати улардан бирига оид маълумотлар Бақит Керимбековнинг инициаллари ва туғилган йили билан мос тушиши ҳақида ёзган – у 2002 йилдан 2005 йилгача парламент депутати бўлган.

Қўлга олинганларнинг яқинлари ёки уларнинг расмий вакиллари бу борада ҳали изоҳ берганларича йўқ.

Бу ташкилот вакиллари Қирғизистонда аввалги йилларда ҳам қўлга олинган, ана шундай ҳолатлардан бирида улар наркотик воситалари билан боғлиқ жиноятларда айбланган эдилар.

Туркманистон расмийлари Халқаро хотин-қизлар куни муносабати билан аёлларга 60 манат (3 АҚШ доллари атрофида) миқдорида пул совға қилишади. Бу ҳақда 21 февраль куни бўлиб ўтган ҳукумат мажлисида маълум бўлган.

Туркманистон телевидениесининг “Ватан” ахборот дастури хабарига кўра, совғалар 2025 йилнинг 1 мартидан 6 мартигача улашилади. Пул давлат ва хусусий корхоналарда ишлайдиган аёлларга, пенсионерларга, ижтимоий нафақа олувчилар ҳамда боғча тарбияланувчиларидан бошлаб докторантларгача барча таълим даргоҳи ўқувчиларига берилади.

Туркманистон президенти Сардор Бердимуҳамедов томонидан имзоланган ҳужжатга мувофиқ, тўловга оид қарор мамлакат “ривожи ва фаровонлигида аёллар хизматининг эътирофи ўлароқ” ҳамда “оналар ва опа-сингилларни эъзозлаш бўйича миллий анъаналар”ни давом эттириш учун қабул қилинган.

Туркманистонда ҳар йили Халқаро хотин-қизлар кунида аёлларга давлат раҳбари номидан пул совға қилинади ва унинг суммаси ўзгармасдан қолмоқда. Бугунги кунда 60 манатга мамлакат фуқаролари бир неча килограм пиёз ёки бир кило гўшт сотиб олишлари мумкин.

Марселда Россия консулхонасига ҳужум қилганликда гумонланган икки киши қўлга олинган. Бу ҳақда шаҳар полициясида ишлайдиган манбадан олинган маълумотга таянган ҳолда BFMTV телеканали ва LaProvence газетаси хабар қилди.

Ҳар икки ОАВ муҳтамал ҳужумчилар душанба оқшомида Россия босқинининг уч йиллиги муносабати билан Украинани дастаклаш акциясида иштирок этганини иддао қилган. Мазкур акция Марсель мэрияси биноси олдида ўтказилган эди.

LaProvence нашрининг ёзишича, акциянинг икки иштирокчиси “терговчиларда алоҳида қизиқиш уйғотган”.

Иддаога кўра, гумонланувчилар 50 ва 40 ёшдаги эркаклар бўлиб, улар айни пайтда уюшган жиноятчилик ва алоҳида жиноятларга қарши кураш бўйича бўлим ходимлари томонидан сўроқ қилинмоқда.

BFMTV қайдича, гумонланувчилар консулхонага ҳужум содир этилган 24 февраль тонгида видеокамера ёзиб олган тасвирлар бўйича таниб олинган.

ОАВ маълумотларига кўра, ичига ёнувчи суюқлик қуйилган учта ярим литрли пластик идиш жиноят қуроли ўлароқ хизмат қилган. Дастлабки маълумотларга кўра, улар бино фасадига улоқтирилган, идишлардан иккитаси ёрилиб кетган.

Воқеа жойида сапёрлар ва тезкор хизматлари ходимлари ишлаётган пайтда, BFMTV хабарига кўра, Россия консулхонаси ходимлари ичкарида хавфсиз жойда тутиб турилган.

Ҳодиса чоғида ҳеч ким жабрланган эмас. Нохуш ҳодиса Франция ва Россия Ташқи ишлар вазирликлари томонидан қораланган.

Адоват қўзғатганликда айбланиб, тўрт йилга қамалган “Ватандош” ўзбеклар жамияти раиси Усмон Баратов 36 кундан буён жазо изоляторида сақланмоқда, дея маълум қилди Баратовни қўллаш учун тузилган телеграм гуруҳи.

Ўтган йил августида Москва вилоятининг Ступино шаҳар суди Баратовни Россия Федерацияси Жиноят кодексининг 282-моддаси 2-қисми бўйича айбдор деб топиб, жазони умумий тартибли колонияда ўташ шарти билан 4 йилга озодликдан маҳрум қилган эди.

Баратовга қарши жиноят иши очилишига унинг “Одноклассники” ижтимоий тармоғига товуқлар акс этган сурат карикатура жойлагани сабаб бўлган. Мазкур карикатурада товуқлардан бири “Тухум бўлиши учун хўрозларни урушдан қайтаринглар” деяётганини кўриш мумкин.

Маълумотларга кўра, у колонияга 2025 йил 10 январида олиб борилган. Карантиндан чиққанидан кейин у жазо изоляторига йўлланган ва ҳали ҳам ўша ерда тутиб турилибди – унинг жазо изоляторида тутиш муддати мунтазам равишда чўзиб келинмоқда.

У жазо изоляторига, жумладан ҳаракатланиш чоғида қўлини орқага қилиб юрмагани учун ташланган. Усмон Баратов бу ишни ҳибсга олиш чоғида олинган жароҳатлар ва хасталиги туфайли қила олмаётганини айтган.

“Мен бу ишни қилолмайман, чунки гипертония, остеохондроз ҳамда ҳибсга олиш чоғида икки нафар СОБРчининг устимда сакраганлари, бошимга тепганлари, қўлқоп билан урганлари дохил калтаклашлар ва қийноқлар пайтида олинган жароҳатлар туфайли, яъни умуртқа, бош ва товонларим жароҳатлангани сабабли мен деворларни ушлаб ёки дорвозлардай қўлимни лангар қилиб ҳаракатланишга мажбурман, акс ҳолда, йиқилиб тушаман”, деган Баратов.

Усмон Баратов жазо изоляторидан 3 март куни чиқиши керак. У “ашаддий тартиб бузувчи” деб тан олинган, шунинг учун жазо изоляторидан чиққанидан кейин қаттиқ тартибли қамоққа ўтказилиши мумкин.

Баратовнинг ўзи унга нисбатан қўзғатилган иш бўйича лингвистик экспертиза нотўғри ўтказилганини, Россия судида ўтказилган маҳкама эса ноқонуний бўлганини билдирган. Баратов фикрича, унинг иши Инсон ҳуқуқлари бўйича Европа судида кўрилиши керак эди.

Усмон Баратов 2024 йил февралида Россия Адлия вазирлиги талаби билан “экстремистлар ва террорчилар” рўйхатига киритилган эди.

БМТ Хавфсизлик кенгаши 24 февраль куни Россиянинг Украинага босқинига уч йил тўлиши муносабати билан АҚШ томонидан ҳозирланган резолюцияни қабул қилди. Reuters қайдича, резолюция АҚШнинг можаро бўйича нейтрал позициясини акс эттиради, чунки президент Дональд Трамп тинчлик ўрнатишда воситачи бўлишга уринмоқда.

БМТ ХКда Россия вето ҳуқуқига эга бўлгани учун кенгашнинг 15 аъзоси Украинадаги уруш бўйича ҳалигача ҳеч қанақа чора кўра олмаган.

АҚШ резолюцияси 10 мамлакат томонидан ёқланган. Франция, Буюк Британия, Дания, Греция ва Словения овоз беришдан тийилган.

“Бу резолюция бизни тинчлик йўлига олиб чиқади. Бу биз фахрланишимиз керак бўлган биринчи, лекин муҳим қадамдир. Эндиликда биз ундан Украина, Россия ва халқаро ҳамжамияти учун тинч келажак барпо этишда фойдаланишимиз керак”, дея билдирган АҚШнинг БМТдаги элчиси в.б. Дороти Ши Хавфсизлик кенгашида қилган чиқишида.

Резолюциянинг қисқа матнида “Россия-Украина можароси” қурбонлари юзасидан қайғу изҳор этилиб, БМТнинг мақсади халқаро тинчлик ва хавфсизликни сақлаш бўлиб ҳисобланиши тасдиқланган. Резолюция тез орада мустаҳкам тинчлик ўрнатилишига чақиради.

Reuters Трампнинг воситачилик ҳаракатлари европалик иттифоқчилар ва Украинани ўзларини тинчлик музокараларидан четлатишлари мумкинлигига оид хавотирга тушишларига сабаб бўлганига эътибор қаратган.

Британиянинг БМТдаги элчиси Барбара Вудворд кенгашда Украинадиг тинчлик шартлари аҳамиятга эгалиги ва у “тажовуз оқланмаслиги ҳақида сигнал бўлиши” лозимлигини айтган.

“Мана нима учун кенгаш аъзолари урушга Украина томонидан ҳам, Россия томонидан ҳам тенг қарай олишмаяпти. Агар биз барқарор тинчликка йўл топишни истасак, кенгаш уруш манбасини аниқ белгилаб олиши лозим”, деган Барбара Вудворд.

Аввалроқ 193 та аъзо мамлакатдан иборат БМТ Бош Ассамблеяси АҚШнинг халқаро ташкилот позициясини юмшатишга оид таклифини рад этганди. БМТнинг бу эски позицияси Украина суверенитети, мустақиллиги, бирлиги ва ҳудудий яхлитлигини дастаклашдан иборат бўлган.

Россиянинг Марселдаги бош консулхонаси ҳудудида 24 февраль куни портлаш содир бўлди. Бу маълумотни La Marseillaise нашрига Россиянинг Марселдаги бош консули Станислав Оранский тасдиқлаган.

Аввалроқ Франция нашрлари дипломатик ваколатхона яқинида портлаш содир бўлгани ҳақида ёзишган. Уларнинг маълумотига кўра, портлаш маҳаллий вақт билан эрталабки соат 8 ларда рўй берган. BFMTV телеканали полициядаги манбадан олинган маълумотга таянган ҳолда консулхона биносига ичига ёнувчи суюқлик тўлдирилган иккита шиша отилгани, бу шишалар боғ ичида сингани ҳақида хабар қилган.

Valeurs Actuelles нашри мухбири ҳодиса чоғида ҳеч кимга зиён етмагани, фақатгина моддий зарар етказилганини маълум қилган. Ундаги маълумотга кўра, консулхона яқинида ўғирланган автомобиль топилган.

Россия Ташқи ишлар вазирлиги Марселдаги портлаш “террор хуружининг барча белгиларига эга”лигини билдирган.

“Аккредитация қилган мамлакатдан ҳодиса тергови бўйича тўла-тўкис маълумот берилиши ва тезкор чоралар кўрилишини ҳамда Россия хориждаги ваколатхонасининг хавфсизлигини кучайтириш бўйича қадамлар қўйилишини талаб қиламиз”, дея билдирган Россия ТИВ расмий вакили Мария Захарова.

Россиянинг Марселдаги бош консулхонаси Амбруаз-Пар авенюсида жойлашган. Унинг яқинида Миср, Тунис, Арманистон ва бошқа мамлакатларнинг дипломатик ваколатхоналари бор.

Германияда бўлиб ўтган парламент сайловида, дастлабки натижаларга кўра, сайловчиларнинг 28,5 фоиз овозини йиғолган “Христиан-демократлар иттифоқи/Христиан-социалистлар иттифоқи” блоки ғалаба қозонди. Бу натижа 23 февраль куни эълон қилинган экзит-полл натижалари билан мувофиқ келмоқда.

Иккинчи ўринда “Германия учун альтернатива” ўнг-популистик партияси боряпти, бу партия учун сайловчиларнингг 20,8 фоизи овоз берган.

Учинчи ўринга 16,4 фоиз овоз олган Германия Социал-демократик партияси (ГСДП), тўртинчи ўринга эса 11,6 фоиз овоз олган “90-йиллар иттифоқи/Яшиллар” партияси чиққан.

Сўл партия эса 8,8 фоиз билан бешинчи ўринни эгаллаган.

Deutsche Welle қайдича, Бундестагга сайлов ГСДП учун мағлубиятли бўлган − партия ўз тарихидаги энг ёмон натижани кўрсатган.

Яна бир неча ҳафта ҳукумат раҳбари бўлиб қоладиган Олаф Шольц сайлов натижаларини “аччиқ” деб атаган. ГСДП ҳали сайлов участкалари ёпилмай туриб ХДИ/ХСИ лидери Фридрих Мерцни ғалаба билан табриклаган.

“Германия учун альтернатива” ўнг-популистик партияси кўрсатган натижани эса оммавий ахборот воситалари, аксинча, рекорд натижа ўлароқ баҳоламоқда. Миграцион чекловлар киритилиши, Россияга нисбатан санкцияларнинг бекор қилиниши ва Украинага ҳарбий ёрдам тўхтатилишини ёқлаётган партия вакилларининг кайфияти кўтаринки, деб ёзган DW.

Сайловда давомат 84 фоизни ташкил қилган, бу эса 1990 йилдан буён кузатилаётган энг юқори кўрсаткичдир.

Аввалроқ, агар консерваторлар ҳукуматни шакллантиришни уддалашса, 69 ёшли ХДИ лидери Фридрих Мерц Германия канцлери бўлиши мумкинлигини ҳақида хабар қилинган. ХДИ/ХСИ дастурида Германияда иқтисодий ўсишни кучайтириш ва солиқларни пасайтириш марказий ўринни эгаллаган. Мерц бир неча бор Киевга ҳарбий ёрдамни кўпайтириш, шу жумладан унга “Таурус” қанотли ракеталарини тақдим этишга чақириб келган. Бу ракеталарнинг Украинага берилишини Шольц ҳукумати тўхтатиб келган. Мерц Украина учун адолатли тинчликка эришишни, мамлакатнинг НАТОга аъзолиги масаласини кун тартибидан олиб ташламасликни ёқлаб келади.

Жорий йилнинг 14 февралидан буён касалхонада ётган Рим папаси Франциск астматик респиратор буҳронни бошдан кечирмоқда. Врачлар унинг аҳволини оғир деб баҳолашяпти. Папанинг ҳуши жойида, бироқ у оғриқ ҳис қиляпти, дея билдирган Ватикан матбуот хизмати.

Папанинг нафас олишига ёрдам бўлсин учун у кислородга уланган ҳамда унинг қони қайта қуйилган.

Кардинал Жанфранко Равази, агар Франциск саломатчилиги туфайли ўз вазифаларини бажара олмай қолса, тахтдан воз кечиши мумкинлигини истисно қилмаган.

88 ёшли Франциск февраль ойи ўртасида билан Римдаги Жемелли клиникасига ётқизилган эди. Компьютер томографияси унда икки томонлама пневмонияни аниқлаган. Сўнгги кунларда унинг соғлиғи тобора ёмонлашиб боряпти.

Асл исми Хорхе Марио Бергольо бўлган Рим папаси Франциск 2013 йилда Католик черкови раҳбари этиб сайланганди. 88 ёшли Франциск Католик черкови тарихидаги энг ёши катта папалардан бири бўлиб ҳисобланади. Болалигида бўлажак папа ўпкасининг бир қисмини олиб ташланган, шунинг учун у респираторли хасталикларини айниқса оғир кечиради.

Европа мамлакатларида 23 февраль куни Украинадаги урушнинг 3 йиллиги муносабати билан намойишлар бўлиб ўтди. Тадбирлар иштирокчилари Киевга Россия тажовузига қарши туришда дастак билдиришди.

Якшанба куни Брюсселда тинч намойиш бўлиб ўтди, дея хабар қилди Озодлик мухбири Олена Абрамович. Унга кўра, бир неча минг намойишчи Украина мадҳиясини ижро этишиб, “Россия товон тўлаши лозим”, “Украинага шон-шарафлар”, “Европа учун тинчлик, Украинага ғалаба” деб қичқиришган. Намойиш чоғида ҳаво тревогаси янгради – бу товушни Украинада яшовчи кишилар уч йилдан буён деярли ҳар куни эшитиб келишади.

Украинани қўллаб-қувватлаш юриши 23 февраль куни Прагада ҳам ўтказилган. Минглаб одам шаҳар марказидаги Староместска майдонига келишган. Йиғилганлар олдида Чехия президенти Петр Павел ҳам чиқиш қилиб, Украина ҳудудига бостириб кирган Россия тажовузкор мамлакатга айланиб, халқаро ҳуқуқ меъёрларини бузганини айтган.

Сўнгги бир неча кун ичида Киевга дастак тадбирлари дунё бўйлаб бир неча юз шаҳарда ўтказилган.

Россия қўшинларининг Украинага кенг кўламли босқини 2022 йил 24 февралидан буён давом этиб келмоқда.

Бугун Германияда навбатдан ташқари парламент сайлови ўтказилмоқда. Сайлов ўтган йил охирида бундестаг канцлер Олаф Шолцга ишончсизлик вотуми билдирганидан сўнг 23 февралга тайинланган эди. Ишончсизлик вотумига эса бюджетни молиялаш билан боғлиқ келишмовчилик туфайли иқтидордаги коалициянинг парчаланиши сабаб бўлди.

Шу тариқа, ҳукумат режаланганидан ярим йил олдин истеъфо беради: ҳукумат инқирози бўлмаганида навбатдаги сайлов 2025 йил сентябрда ўтказилган бўлур эди.

Парламентдаги ўринлар учун кураш еттита пешқадам ва 22 кичик партиялар ўртасида кечади. Энг кўп овоз тўплаган партия федерал канцлер лавозимига номзод кўрсатади (одатда партия раиси номзод бўлади), кейин уни президент Франк-Валтер Штайнмайер тасдиқлаши керак.

Шундан сўнг бундестагга ўтган партиялар бошқарув коалициясини тузади. Коалиция одатда 2-3 партиядан ташкил топади. Коалицияга кирмаганлар эса парламент мухолифати бўлиб қолади.

Сайловдан бир неча кун олдин ZDF телеканали ўтказган сўровга кўра, сайловда ХДИ/ХСИ консерватив блоки етакчи бўлиши мумкин – унга сайловчиларнинг 28 фоизи овоз беришга тайёр.

У ҳолда ХДИ раҳбари, 69 ёшли Фридрих Мерц канцлерликка номзод бўлади. ХДИ/ХСИ, хусусан, Германия иқтисодий ўсишини жадаллаштириш ва солиқларни камайтиришга ваъда бермоқда.

Сўровларга кўра иккинчи ўринни “Германия учун алтернатива” (ГуА) ўнг популистик партияси эгаллайди. ГуА 21 фоиз овоз тўплай олиши айтилмоқда. Партия ўз дастурида кўпроқ миграция қонунларини кучайтиришга ва хавфсизлик масалаларига урғу беради.

Шунингдек, ГуА Россия билан ҳамкорлик алоқаларини тиклашни талаб қилиб келмоқда. ГФР махсус хизматлари ГуА депутатларининг Кремлдан маблағ олганига доир шубҳалар важидан бир неча марта текширув ўтказган эди.

Учинчи ўринни, 16 фоиз қўллов билан Социал-демократик партия (СДП) эгаллаши кутиляпти. Канцлер Олаф Шолц худди шу партияга мансуб. СДП инфратузилма лойиҳалари ва ижтимоий дастурларга давлат бюджетидан кўпроқ маблағ ажратиш ташаббусини илгари сурмоқда.

ZDF сўровига қараганда, 14 фоиз сайловчилар “Яшиллар” учун овоз беришади. Ушбу сўл партия дастурида экология муаммолари ва аҳолини ижтимоий қўллаб-қувватлаш лойиҳаларига кенг ўрин берилган.

Сўровда қатнашганларнинг 8 фоизи “Сўллар”га овоз беришини билдирган. Улар мудофаа харажатларини оширишга қарши чиқишмоқда: “сўллар”га кўра солиқ тўловчиларнинг пулларини аввало ижтимоий дастурлар ва инфратузилмаларга йўналтириш лозим.

Бюджет ва давлат қарзи устидан қаттиқ назорат ўрнатишни ўзи учун устивор вазифа қилиб олган Эркин демократик партия 4,5 фоиз овоз тўплаши тахмин қилинмоқда.

Мудофаа бюджетини қисқартириш, Украинага ҳарбий ёрдамни тўхтатишга қарши чиқаётган ва Россия билан яқинлашиш тарафдори бўлган “Сара Вагенкнехт иттифоқи” номли янги сўл партия ҳам қарийб шунча овоз йиғиши мумкин.

Бу икки партия парламентга кириш учун зарур 5 фоизлик тўсиқдан ўтиши эҳтимоли катта.

Сўровда иштирок этганларнинг 4 фоизи кичик партияларга овоз беришини айтган.

Исроил полицияси Тель-Авив яқинида бир неча автобусда портлаш уюштирганликда гумонланаётган шахсларни қидирмоқда. The Times of Israel ва Reuters агентлиги хабарларига кўра, расмийлар портлашлар оқибатида ҳеч ким қурбон бўлмаганини билдиришган.

Исроил нашрлари портлаш мосламалари Бат-Ямадаги тураргоҳда бўлган учта бўш автобусда ишга тушгани ҳақида ёзишмоқда. Бошқа икки автобусдан топилган бомбалар зарарсизлантирилган. Нашрлар ёйинлаган суратларда ёниб кетган автобусни кўриш мумкин.

Исроил ҳарбийлари портлашлардан сўнг ишғол этилган Ғарбий соҳилнинг айрим ҳудудлари ёпиб қўйилгани, “кучайтирилган аксилтеррор” фаолияти давом этиши ҳақида билдиришган. Баёнотда ҳарбийлар содир бўлган воқеа терговида Шин Бет ички разведка хизмати ва полиция билан ҳамкорлик қилаётгани қайд этилган.

Исроил бош вазири офиси ҳодиса ҳақида Бинямин Нетаняхуга ҳарбий котиби томонидан маълумот тақдим этилгани ва яқин орада у хавфсизлик соҳасидаги вазиятга баҳо беришини маълум қилди.

Исроил нашрлари мамлакат транспорт вазири Жамоат транспорти бошқармасига автобуслар, поездлар ва бошқа жамоат транспорти воситалари тўхтатилиб, текширувдан ўтказилиши ҳақида буйруқ чиқаргани ҳақида хабар қилишди.

АҚШ президенти Дональд Трампнинг Украина ва Россия бўйича махсус вакили Кит Келлог 20 февраль куни Киевда Украина президенти Владимир Зеленский билан учрашди. Учрашув натижаларига кўра ўтказилиши режаланган қўшма матбуот анжумани Америка томони илтимосига биноан бекор қилинган. Бу ҳақда Reuters агентлиги ва бошқа нашрлар хабар қилишди.

“Америка овози” рус хизмати қайдича, Киевга келган 19 февраль куни Келлог ўз ташрифидан асосий мақсад Украина томонини тинглаш эканини эълон қилган.

Трампнинг миллий хавфсизлик бўйича маслаҳатчиси Майк Уолтц Украинани АҚШга нисбатан танқидини юмшатишга ҳамда Оқ уй ташаббуси билан илгари сурилган фойдали қазилмалар етказиб бериш бўйича шартномага рози бўлишга чақирган.

АҚШ вице-президенти Жей Ди Вэнс пайшанба куни, унинг фикрича, можаро якунига оз қолганини айтди. Айни пайтда у Россия билан музокара қилмай туриб, урушни тўхтатиш мумкин эмаслигини урғулади.

Президент Зеленский Келлог билан суҳбат чоғида фронтдаги вазият, украиналик асирларнинг барчасини қайтариш ва Украина учун самарали халқаро хавфсизлик кафолатларини излаб топиш масалалари муҳокама қилинганини қайд этди.

“Европейская правда” нашри Зеленский Трампнинг махсус вакилига Киев “Қўшма Штатлар президенти билан инвестициялар ва хавфсизлик бўйича кучли, ҳақиқатан манфаатли шартнома тузиш”га тайёр эканини тасдиқлагани ҳақида ёзган. Шу муносабат билан Трамп томонидан аввалроқ таклиф қилинган Украина фойдали қазилмаларидан фойдаланишга оид шартнома тўғрисида сўз борган.

ОАВ маълумотларига кўра, Трамп маъмурияти Украинага нодир фойдали қазилмаларнинг 50 фоизини АҚШга мулк ўлароқ беришни таклиф қилган, бироқ Зеленский мазкур ҳужжат билан танишиб чиққанидан кейин уни имзолашдан бош тортган.

АҚШнинг AXIOS сайти 20 февраль куни Зеленский Трампнинг илк таклифини рад этганидан кейин Оқ уй Украинага фойдали қазилмалар тўғрисидаги “тузатилган” шартнома лойиҳасини тақдим этгани ҳақида хабар қилган. Axios бу ҳақда битимдан хабардор украиналик мулозим, америкалик мулозим ва уч нафар манбага таянган ҳолда ёзган.

“Лойиҳанинг сўнгги вариантига анча тузатишлар киритилгани сезилади ва у Украина қонунчилигига мувофиқ келади”, деган манбалардан бири.

Трампнинг миллий хавфсизлик бўйича маслаҳатчиси Майк Уолц пайшанба куни журналистларга Зеленский фойдали қазилмалар масаласи бўйича “музокаралар столига қайтиши” лозимлигини айтган.

Петербург расмийлари мигрантларни кузатиш учун шаҳардаги кузатув камераларини этник мансубликни танишга мослаб созланади. Бу ҳақда Петербург маъмурияти миллатлараро муносабатлар қўмитаси раҳбари Олег Капитанов билдирди, дея хабар қилди “Коммерсант” нашри.

Капитановга кўра, янги функционал “миллий анклавлар шаклланиши”га қарши курашда ёрдам беради ва “минтақада ижтимоий тарангликка йўл қўймаслик бўйича превентив чоралар” кўришга имкон яратади.

Мулозим ўз қўмитаси “шахсларнинг миллий мансубиятини аниқлаш учун лицензия сотиб олишга” шартнома тузган, мазкур дастур асосида шаҳардаги саккиз мингта камерани созлаш кўзда тутилган.

“Коммерсант” маълумотига кўра, шартнома суммаси 38 миллион рублдан ошади.

Россия президенти ҳузуридаги Инсон ҳуқуқлари бўйича кенгашда (ИҲК) Петербург расмийларининг қарори танқид қилиниб, “инсон қадр-қийматини ерга урувчи” дея баҳоланган.

“Россияда ҳатто паспортда ҳам миллат кўрсатилмайди. Энди эса томдан тараша тушгандай, телекамералар кишининг қайси миллатга мансублигини аниқлармиш”, деган ИҲК раҳбари Валерий Фадеев.

Москвадаги “Крокус Сити Холл”да содир этилган террор хуружи ортидан Россияда мигрантларга нисбатан ксенофобик кайфиятлар кучайиб кетган. РФ расмийлари ҳужумда Тожикистон фуқароларини айблашган.

Шундан сўнг Россиянинг турли минтақаларида ҳуқуқ-тартиботчилар хорижликлар яшайдиган ва ишлайдиган жойларда рейдлар ўтказа бошлаган. Айрим ҳолатларда мигрантлар ҳарбий комиссариатларда қайдга олинган.

Расмийлар мигрантларга нисбатан қонунчиликни ҳам кучайтиришмоқда. Бир пайтнинг ўзида Россияда миллатчилар “рейдлари” ҳам бошланиб кетган – бу “рейдлар” давомида улар мигрантларни ишдан бўшатиш ва қизларнинг рўмолларини ечиштиришни талаб қилишган.