Швейцария прокуратураси бадавлат мижозларга хизмат кўрсатишга ихтисослашган Lombard Odier банкини оғирлаштирувчи шартлар билан пул ювишда айблади, деб ёзди Financial Times нашри.

Расмийларга кўра, банк бир неча йил давомида Ўзбекистон биринчи президенти Ислом Каримовнинг тўнғич қизи Гулнора Каримованинг жиноий фаолиятини яширишга кўмаклашиш бўйича “ҳал қилувчи рол”лардан бирини ўйнаган.

Прокуратура тахминича, 2023 йил сентябрида айблов эълон қилинган Каримова йирик миқдордаги пул маблағларини ўзлаштириб, уларни Швейцариядаги “Офис” дея танилган ташкилот орқали ювган. Гулнора Каримованинг ўзи мазкур айбловларни рад этган.

Lombard Odier банкининг собиқ ходимига ҳам айблов эълон қилинган. Прокуратура бу ишни 2016 йилдан буён юритиб келмоқда.

Гулнора Каримова 2015 йилнинг 18 декабрида Тошкент шаҳар судининг ҳукми билан 10 йилга, 2020 йилнинг 18 мартида эса янги очилган жиноят иши доирасида 13 йилга озодликдан маҳрум қилинганди. У айни пайтда жазо муддатини Тошкент вилоятининг Зангиота туманида жойлашган аёллар колониясида ўтамоқда.

Ўзбекистонлик тикувчи ва тадбиркор Дилором Йўлдошева 2024 йилда ВВСнинг дунёдаги илҳомлантирувчи ва нуфузли 100 аёл рўйхатига киритилди.

ВВС махсус лойиҳаси муаллифларига кўра, Йўлдошева икки йил аввал йиғим-терим мавсумида содир бўлган бахтсиз ҳодиса туфайли икки оёғидан айрилган.

Шунга қарамай, у умидсизликка тушмаган. У янги иш ўрганиш ва ўзбекистонлик ёш аёлларга пул топишда ёрдам бериш мақсадида ўзининг тикувчилик бизнесини очган.

Тадбиркорлик асослари билан танишган деновлик Дилором Йўлдошева кейинроқ 40 дан зиёд аёлни тикувчиликка ўргатган. Бир неча ойдан кейин унинг ширкати анча ўсган, у ишчилар ва мактаб ўқувчилари учун кийим-кечак тикиш бўйича шартномалар тузган.

“Ўшандан буён унинг бизнеси фақат ўзи учунгина эмас, бошқа ўнлаб аёллар учун ҳам даромад манбаига айланган”, дея қайд этишган лойиҳа муаллифлари.

ВВС “100 аёл” лойиҳасининг бу йилги мавзуси “барқарорлик” бўлган.

Рўйхатда Нобель тинчлик мукофоти лауреати Надя Мурад, актриса Шэрон Стоун, қўшиқчи Рэй, рассом Трейси Эмин, иқлим ўзгаришига қарши кураш фаоли Аденике Оладосу, ёзувчи Кристина Ривера Гарса ва бошқа машҳур исмларга дуч келиш мумкин. Бироқ унга президентнинг қизи Саида Мирзиёева ёки Сенат раиси Танзила Норбоева дохил Ўзбекистонда нуфузли деб топилган 40 нафар аёлнинг биронтаси киритилган эмас.

Дилором Йўлдошевадан аввал ВВС “100 аёл” рўйхатига Қаршидаги 2-мактаб-интернати ўқитувчиси Муҳаббат Шарапова (2017 йил) киритилган эди.

2025 йилдаги ёшлар Осиё ўйинлари Ўзбекистонда эмас, Баҳрайнда ўтказиладиган бўлди. Бу ҳақда Осиё Олимпия кенгаши матбуот хизмати маълумот тарқатди. https://oca.asia/news/5716-oca-approves-bahrain-to-host-asian-youth-games-2025-after-uzbekistan-withdraws.html

Қайд этилишича, ООК ижроия кенгашининг 2 декабрдаги мажлисида Ўзбекистон Миллий Олимпия қўмитаси Тошкентдаги Олимпия шаҳарчаси қурилиши кўзланган муддатда якунланмагани учун ўзбек расмийлари 2025 йил сентябрига режаланган Осиё ўйинларини ўтказа олмасликлари ҳақида хат йўллагани маълум бўлган.

ООК бош директори Ҳусайн ал-Мусаллам 2025 йилдаги ёшлар Осиё ўйинлари 2026 йилда Дакарда ўтказиладиган ёшлар Олимпия ўйинлари билан боғлиқ экани, шунинг учун ҳам кейинги йилдаги ўйинларни ортга суриб бўлмаслигини билдирган.

Бу орада Баҳрайн Олимпия қўмитаси 2025 йилги Осиё ўйинларини ўтказишга тайёрлигини билдирган ва шу тариқа мазкур спорт тадбири Баҳрайнда ўтказиладиган бўлган.

Айни пайтда Ўзбекистон Миллий Олимпия қўмитаси томонидан бу борада тарқатилган хабарномада “пандемиядан кейинги чекловлар сабабли Олимпия шаҳарчаси қурилиши учун зарур воситалар етказиш жараёнида узилишлар кузатилгани ва фойдаланишга топшириш муддати кечикишини инобатга олган ҳолда Ўзбекистон томони ООКдан мусобақани яна бир йилга суришни сўрагани”, бироқ “Олимпия спорт турларидаги беллашувлар келгусида Дакар-2026 ўсмирлар ёзги Олимпия ўйинларига саралаш вазифасини бажариши назарда тутилгани боис ООК III ёшлар Осиё ўйинлари 2025 йилда ташкил этилиши муҳимлигини билдиргани” урғуланган.

“Шу туфайли ООК III ёшлар Осиё ўйинлари мезбонлигини Баҳрайнга топширди ва Ўзбекистонга Ислом бирдамлиги ўйинлари ёки Жанг санъати ва ёпиқ иншоотлардаги Осиё ўйинлари каби катталар миқёсидаги йирик комплекс тадбирларни ўтказишга тайёргарлик кўришни тавсия қилди”, дейилган МОК хабарномасида.

Қўшма Штатлар Молия вазирлигининг Хорижий активларни назорат қилиш бошқармаси (OFAC) Хоразм вилоятидаги меҳрибонлик уйида тарбияланувчиларни зўрлаган масъул мансабдорларга қарши санкциялар жорий қилди.

АҚШ Молия вазирлиги хабарномасида қайд этилишича, санкция рўйхатига Урганчдаги болалар уйининг собиқ мудираси Юлдуз Худайбергенова, Хоразм вилояти адлия бошқармасининг собиқ бошлиғи Ойбек Машарипов ва Янгиариқ тумани фавқулодда вазиятлар бошқармасининг собиқ бошлиғи Анвар Курязов киритилган. Улар одам савдоси ва гендер зўравонлик, хусусан давлатга қарашли меҳрибонлик уйида тарбияланувчи қизларга нисбатан жинсий зўравонликда айбланган.

Мазкур шахсларга нисбатан чекловлар Халқаро қулликка қарши кураш куни муносабати билан жорий этилган. Санкциялар киритилиши бу одамларнинг АҚШдаги ёки америкаликлар тасарруфи ёки назорати остида бўлган мол-мулклари музлатилишини англатади. Шунингдек, уларга нисбатан АҚШ Давлат департаменти томонидан киритилган виза чекловлари ҳам жорий қилинади.

Урганчдаги меҳрибонлик уйида тарбияланувчи қизлар 10 ой давомида давлат мулозимлари дохил турли эркаклар томонидан жинсий зўравонликка дучор қилинганлари ҳақида Озодлик аввалроқ бир неча бор хабар қилган.

2022 йил сентябрида мазкур иш Хива тумани судида кўриб чиқилган ва Меҳрибонлик уйи мудираси Юлдуз Худойбергенова Ўзбекистон Жиноят кодексининг 135-моддаси (Одам савдоси), 167-моддаси (Ўзлаштириш ёки растрата йўли билан талон-торож қилиш) ва 209-моддаси (Мансаб сохтакорлиги) билан айбдор деб топилиб, 5 йил 6 ой муддатга озодликдан маҳрум этилган.

Адлия ва Фавқулодда вазиятлар бошқармалари раҳбарлари эса ЖКнинг 128-моддаси (Ўн олти ёшга тўлмаган шахс билан жинсий алоқа қилиш) билан 1,5 йилга озодликдан чекланди. Декабрь ойида Хоразм вилояти суди апелляция инстанцияси биринчи инстанция суди ҳукмини ўз кучида қолдирган.

Мулозимларга берилган жазонинг енгиллиги Ўзбекистон жамоатчилиги орасида норозилик уйғотган. Бунинг ортидан 2023 йил ноябрида иш қайта кўриб чиқилиб, Машарипов ва Курязов уч йилга озодликдан маҳрум этилган.

Ўзбекистон ва Бирлашган Араб Амирликлари дипломатлари ўзбекистонлик фуқароларнинг БАА ҳудудига кириши билан боғлиқ вазиятни муҳокама қилишган. Бу ҳақда Ўзбекистон Ташқи ишлар вазирлиги матбуот хизмати маълумот тарқатди.

ТИВ хабарномасига мувофиқ, 2 декабрь куни ташқи ишлар вазирининг биринчи ўринбосари Бахромжон Аълоев БААнинг Ўзбекистондаги элчиси Саид Матар ал-Қамзийни қабул қилган.

Учрашувда икки мамлакат ўртасидаги сиёсий, савдо-иқтисодий ва инвестициявий алоқаларни ривожлантириш масалаларидан ташқари “сўнгги кунларда Ўзбекистон фуқароларининг Бирлашган Араб Амирликлари ҳудудига киришларида кузатилаётган қийинчиликлар билан боғлиқ вазият бўйича” фикр алмашилган.

“Мавжуд ҳолатни имкон қадар қисқа муддатларда ҳал қилиш бўйича тегишли чора-тадбирлар кўришга келишиб олинди”, дейилган вазирлик хабарномасида.

Аввалроқ Озодлик 30 ноябрь куни Тошкентдан Абу Дабига учиб борган 31 нафар ўзбекистонлик эркак БАА ҳудудига киритилмагани, улар аэропортдан ҳам чиқарилмай, бир суткадан кейин ортга қайтариб юборилгани ҳақида хабар қилган эди.

Мазкур ҳодисадан сўнг ижтимоий тармоқларда муайян ёшдаги ўзбекистонлик эркакларнинг БАА ҳудудига кириши тақиқланганига оид тахминлар илгари сурилган.

Абу Даби аэропортида ўзбекистонликларнинг ушлаб қолиниши ва сўроққа тутилиши БАА ҳудудида яҳудий руҳонийси Цви Коган ўлдирилиши ортидан рўй берган.

Ўтган ҳафта Бирлашган Араб Амирликлари Ички ишлар вазирлиги исроиллик раввин ўлимида гумонланган уч ўзбекистонлик қўлга олинганини маълум қилганди.

БАА ИИВ баёнотига кўра, қотилликда гумонланаётганларнинг исми Олимбой Тоҳирович, Азизбек Комилович ва Маҳмуджон Абдураҳим бўлиб, улардан икки нафари 28 ёшда, яна бири эса 33 ёшдадир.

Жанубий Кореяда ноқонуний юрган ўзбекистонликлар учун “яшил йўлак” орқали мамлакатдан чиқиб кетиш муддати 2025 йилнинг 31 январигача узайтирилди. Бу ҳақда Ўзбекистон Миграция агентлиги маълум қилди.

“Яшил йўлак” лойиҳаси муддати 30 ноябрь куни тугаши лозим эди. Миграция агентлигининг Сеулдаги ваколатхонаси ва Корея Адлия вазирлиги ўртасида ўтказилган музокаралар якунида мазкур муддатни узайтиришга келишилган.

Корея қонунчилигига мувофиқ, мамлакатда ноқонуний ишлаб, яшаб юрган шахслар қуйидаги миқдорда жарима тўлайди:

• 1 ойдан кам бўлса 1 миллион вон (716 доллар);

• 1 ойдан 3 ойгача 1,5 миллион вон (1074 доллар);

• 3 ойдан 6 ойгача 2 миллион вон (1432 доллар);

• 6 ойдан 1 йилгача 4 миллион вон (2864 доллар);

• 1 йилдан 2 йилгача 7 миллион вон (5012 доллар);

• 2 йилдан 3 йилгача 10 миллион вон (7160 доллар);

• 3 йилдан 5 йилгача 20 миллион вон (14321 доллар);

• 5 йилдан 7 йилгача 25 миллион вон (17902 доллар);

• 7 йилдан кўп бўлса 30 миллион вон (21482 доллар).

Миграция агентлиги қайдича, кўрсатилган муддат ичида Кореяни ихтиёрий тарк этган ноқонуний муҳожирлар жаримадан озод этилади ва кейинчалик Кореяга қайта кириши енгиллашади.

Белгиланган муддатдан сўнг Жанубий Кореяда қолганларга нисбатан эса катта миқдорда жарима (ҳар бир ой учун 2000 доллар) ва мамлакатга қайта киришга тақиқ қўлланади.

Аввалроқ миграция идораси Корея Республикасида 92 минг нафар ўзбекистонлик қонуний, 9000 нафари эса ноқонуний тарзда яшаб келаётганини маълум қилганди.

Сеул ҳукумати муайян давлат фуқароларининг 10 фоизидан ортиқ қисми ноқонуний мақомда бўлса, ўша давлат фуқароларига виза чеклови жорий этади.

Озодлик Корея Республикаси президенти Юн Сок Ёлнинг жорий йил июнида Ўзбекистонга давлат ташрифи якунида йигирмага яқин ҳужжат, жумладан, Малакали ва профессионал кадрлар тайёрлаш бўйича ҳамкорлик тўғрисида меморандум имзолагани, давлат раҳбарлари музокараларида меҳнат миграциясига доир таклифлар кўриб чиқилгани ҳақида хабар қилган эди.

Озодлик журналистларининг Жанубий Кореяда юрган ўзбеклар ҳаёти ҳақида ҳикоя қилувчи фильмини қуйида томоша қилишингиз мумкин:

Wizz Air авиакомпаниясининг 30 ноябрь кунги 5W7160 рақамли рейси билан Тошкентдан БААнинг Абу Даби шаҳрига учиб борган 31 нафар Ўзбекистон фуқароси аэропортдан чиқарилмаган.

Gazeta.uz хабарига кўра, Шайх Зайд номидаги аэропорт ходимлари аёллар, болалар ва кексаларни қўйиб юборгани ҳолда 20 ёшдан 40 ёшгача бўлган эркакларни ушлаб қолган.

Номаълум сабабларга кўра ўзбекистонлик эркакларнинг паспорти олиб қўйилиб, сўроқ қилинган.

Йўловчилар узоқ вақт овқатсиз қолганлари ва босимга учраганларидан шикоят қилишган.

Ўзбекистоннинг БААдаги элчихонаси 31 нафар Ўзбекистон фуқароси “номаълум сабабларга кўра” аэропортда ушлаб турилганини тасдиқлади.

“Ўзбекистоннинг Абу Дабидаги элчихонаси ва Дубайдаги бош консулхонаси аэропорт маъмурияти ва амирликларнинг масъул идоралари вакиллари билан мулоқотда бўлиб, вазиятни назоратга олган”, дейилган дипломатик ваколатхона ахборотида.

Элчихонага кўра, аэропорт маъмурияти билан ҳамкорликда ўзбекистонликларни уч маҳал овқат билан таъминлаш ҳамда уларга зарур тиббий ёрдам чоралари кўрилган.

Cўнгги хабарларга кўра, Абу Даби аэропортида бир суткадан ортиқ қолиб кетган 10 дан зиёд Ўзбекистон фуқароси Тошкентга қайтарилган. Улар ўз ҳисобидан чипта харид қилишга мажбурланган.

Ушбу ҳодиса ортидан ижтимоий тармоқларда БАА ҳудудига муайян ёшдаги ўзбекистонлик эркакларнинг кириши тақиқлангани ҳақида тахминлар илгари сурилди.

Абу Даби ҳаво қўналғасида ўзбекистонликларнинг ушлаб қолиниши ва сўроққа тутилиши Амирликлар ҳудудида яҳудий руҳонийси Цви Коган ўлдирилиши ортидан рўй бермоқда.

Ўтган ҳафта Бирлашган Араб Амирликлари Ички ишлар вазирлиги исроиллик раввин ўлимида гумонланган уч ўзбекистонлик қўлга олинганини маълум қилганди.

БАА ИИВ баёнотига кўра, қотилликда гумонланаётганларнинг исми Олимбой Тоҳирович, Азизбек Комилович ва Маҳмуджон Абдураҳим бўлиб, улардан икки нафари 28 ёшда, яна бири эса 33 ёшдадир.

Тошкент шаҳридаги “Чорсу” меҳмонхонаси харобасининг юқори қаватига чиққан ўсмир у ердан тушиб кетиб вафот этди.

Kun.uz нашрининг Ўзбекистон Бош прокуратураси матбуот хизматига таянган ҳолда хабар қилишича, ҳодиса 28 ноябрь оқшомида содир бўлган.

“Мирзо Улуғбек туманида яшаган, 2008 йилда туғилган фуқаро Е.Э. собиқ “Чорсу” меҳмонхонаси биносига таниши билан бирга рухсатсиз чиққан. У бинонинг 21-қаватидан 3-қаватигача тушиб кетиб, воқеа жойида вафот этган”, дейилган БП ахборотида.

Қайд этилишича, ўлим юзасидан судга оид тиббий экспертиза тайинланган. Ҳолат юзасидан Шайхонтоҳур прокуратураси терговга қадар текширув олиб бормоқда.

Озодлик аввалроқ Тошкентнинг рамзларидан бўлган “Чорсу” биноси бузилиши ҳақида хабар қилганди.

Германиянинг Tchoban Voss Architekten компанияси ишлаб чиққан 170 миллион долларлик лойиҳа доирасида эски мусофирхона ўрнида 29 қаватли янги меҳмонхона, бизнес-марказ ва тураржой бинолари барпо этилади.

Қурилиш ишларини 2025 йилда бошлаб, 2029 йилда якунлаш режалаштирилган.

1982 йилда меъмор Владимир Спивак лойиҳаси бўйича қурилган ва дастлаб “Москва” деб номланган “Чорсу” меҳмонхонаси салкам чорак асрдан бери қаровсиз ҳолда ётибди.

Сўнгги йилларда хароба аҳволдаги иншоот араб, корейс ва турк сармоядорларига сотилган.

Ўзбекистонда 1 декабрь куни “Редакция” ютуб-каналининг тасвирга олиш гуруҳи, бу гуруҳ асосчиси бўлган россиялик журналист Алексей Пивоваров ҳамда Hook нашри журналисти Фарида Мехсетова ушланган. Улар мамлакат тўғрисида ҳужжатли фильм суратга олаётган бўлган.

“Нукусга келганимизда бизни ИИВ ходимлари суҳбатга таклиф қилишди. Биз улар билан гаплашдик, уларга ўзимиз ҳақимизда ва режаларимиз ҳақида гапириб бердик, ходимлар ўзларини хушмуомала ва сипо тутишди. Ҳозир йўлимизда давом этяпмиз. Ҳаммаси яхши!”, деб ёзган Пивоваров қўлга олинган журналистлар тақдиридан хавотир олган барчага миннатдорлик билдирар экан.

Пивоваров бошчилигидаги тасвирга олиш гуруҳи Нукус шаҳар ИИБ ходимлари томонидан қўлга олингани ҳақида биринчи бўлиб Podrobno.uz нашри хабар қилган. Бу нашр маълумотига кўра, журналистларнинг ушланишига қандайдир маҳаллий турғундан тушган ариза сабаб бўлган.

Hook иддаосича, ҳуқуқ-тартибот идоралари “Редакция” журналистларидан тасвирга олинган бутун материални олиб қолган, кейин эса улар Тошкент аэропортига етказилган. Ўзбекистон томони бу маълумотни ҳозирча расман тасдиқлагани йўқ.

Алексей Пивоваров НТВ телеканалининг собиқ мухбири ҳамда RTVI телеканалининг собиқ бош продюсери бўлиб ҳисобланади. 2019 йил мартида журналист контентининг асосий қисмини янгиликлар ва ҳужжатли фильмалар ташкил қилган “Редакция” ютуб-каналини ишга туширган.

Ҳозирда бу каналнинг қарийб 4,5 йил обуначиси бор. Россия расмийлари “Редакция” ва Пивоваровни “хорижий агент” деб эълон қилган.

Биринчи декабрь куни Чэнду шаҳрида Ўзбекистон ва Хитой ташқи ишлар вазирлари ўзаро визадан озод қилиш тўғрисида ҳукуматлараро битимни имзолади. Бу ҳақда Ўзбекистон ташқи сиёсат маҳкамаси раҳбари Бахтиёр Саидов Телеграмдаги расмий саҳифасида маълум қилди.

Битимга мувофиқ, Ўзбекистон ва Хитой фуқаролари икки давлат ҳудудларига кириш, ундан чиқиш ёки транзит қилиш учун 30 кунгача муддатга виза талабларидан озод қилинади.

“Бу ҳужжат алоқаларимизни янада фаоллаштириш, савдо айланмасини ошириш ва халқлар ўртасидаги муносабатларни ривожлантириш йўлидаги яна бир муҳим қадамдир”, деган Саидов.

Расмий Тошкент изоҳига кўра, “мазкур халқаро шартнома томонлар зарур бўлган давлат ички тартиб-таомилларини бажарганидан сўнг кучга киради”.

Озодлик ўтган ҳафта бошида Тошкент Пекинга виза тартибини эркинлаштиришни таклиф қилгани ҳақида хабар қилган эди.

Маълумот ўрнида: Ўзбекистон 2021 йил март ойидан Хитой фуқаролари учун 10 кунлик визасиз режим жорий қилганди.

Хитойнинг Ўзбекистондаги элчиси Юй Сзюн 2023 йил октябрь ойида Тошкентда ўтказилган матбуот анжуманида икки давлат ўртасида визасиз режимни жорий этиш бўйича Пекин ҳукуматида “кучли хоҳиш борлиги”ни таъкидлаганди.

Жиноят ишлари бўйича Тошкент шаҳри Яккасарой тумани суди Маъмурий жавобгарлик тўғрисидаги кодекснинг 41-моддасида (ҳақорат қилиш) назарда тутилган ҳуқуқбузарликни содир қилган икки фуқарога БҲМнинг 20 баравари миқдорида (6,8 миллион сўм) жарима тайинлади.

Daryo.uz нашри хабарига кўра, бухоролик 32 ёшли М.Р. ва фарғоналик 28 ёшли И.М. Каниза тахаллуси билан ижод қилиб келаётган хонанда Шаҳризода Аҳмедовани Instagram тармоғида “ҳароми” ва “жинсий алоқа қилишдан бошқага ярамайди” деб ҳақорат қилган.

Каниза ўз кўрсатмасида Ўзбекистон демократик давлат экани, унинг қандай кўринишда кийиниши белгиланган тартибга зид эмаслигини айтар экан, айримлар ўзларини ислом давлатида яшаётган шахслардек тутиб, қонун талабларни тушунмай, уни ижтимоий тармоқлар орқали мунтазам ҳақорат қилаётганини таъкидлаган.

Суд ишида ҳуқуқбузар М.Р. хонандадан узр сўраб, бундай ҳолат бошқа такрорланмаслигини билдирган. Иккинчи ҳуқуқбузар И.М. суд мажлисига тегишли тартибда чақиртирилганига қарамай келмаган ва иш унинг иштирокисиз кўрилган.

Хонанда Каниза аввал ҳам “очиқ-сочиқ кийиниши” cабаб танқидга учрагани маълум.

Ўтган йили “Ўзбекконцерт” хонандани “иштони сабаб” лицензиядан маҳрум қилганди.

2017 йилда эса Каниза Президент виртуал қабулхонасига “Миллион” жамоаси унинг шаънини поймол этаётгани ҳақида шикоят йўллаганди.

Жиноят ишлари бўйича Мирзо Улуғбек туман судида 29 ноябрь куни 3 яшар болани ўлдиришда айбланаётган фуқаро С. М.га нисбатан жиноят ишини кўриб чиқиш якунланган.

Олий суд матбуот котиби Азиз Обидовнинг маълум қилишича, жиноят иши судья С.Абдуғаниев раислигида кўриб чиқилган.

Фарғона вилоятида туғилган 31 ёшли судланувчи С.М. Ўзбекистон Жиноят кодексининг 97-моддаси 2-қисми “в”, “ж” бандлари (айбдорга аён бўлган ожиз аҳволдаги шахсни ўта шафқатсизлик билан ўлдириш), 25, 97-моддаси 2-қисми “б”, “г”, “ж”, “р” бандлари (ҳомиладорлиги айбдорга аён бўлган аёлни; ўз хизмат ёки фуқаролик бурчини бажариши муносабати билан шахсни ёки унинг яқин қариндошларини ўта шафқатсизлик билан такроран ёки хавфли рецидивист томонидан ўлдиришга уриниш), 219-моддаси 2-қисми (ҳокимият вакилига ёки фуқаровий бурчини бажараётган шахсга қаршилик кўрсатиш) ва 251−1-моддаси 3-қисмида (гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи ёхуд заҳарли моддаларни ўтказиш мақсадида қонунга хилоф равишда тайёрлаш, қайта ишлаш, олиш, сақлаш, ташиш ёки жўнатиш, худди шунингдек уларни қонунга хилоф равишда ўтказиш ёхуд уларни ўтказиш мақсадида тайёрлаш ёхуд қайта ишлаш учун асбоб-ускуналарни тайёрлаш, олиш, сақлаш, ташиш, жўнатиш ёки ўтказиш) назарда тутилган жиноятларни содир этганликда айбдор деб топилган.

Унга Жиноят кодексининг 59-моддаси тартибида 24 йил муддатга озодликдан маҳрум қилиш жазоси тайинланган.

Шунингдек, ЖКнинг 50-моддаси 9-қисмига асосан судланувчи тайинланган жазонинг дастлабки тўрт йилини турмада, қолган қисмини эса қаттиқ тартибли колонияда ўташи белгиланган.

Қонунчиликка мувофиқ, тарафлар биринчи инстанция судининг ҳукми устидан Тошкент шаҳри судининг жиноят ишлари бўйича судлов ҳайъатига апелляция ёки кассация тартибида шикоят бериш ва протест келтиришга ҳақли.

Маҳаллий матбуот хабарига кўра, прокурор ҳам, марҳумнинг ота-онаси ҳам суддан судланувчига умрбод қамоқ жазоси тайинлашни сўраган.

Озодлик аввалроқ суд-психиатрия экспертизаси “ақли расо ва руҳий соғлом судланувчи ижтимоий хавфли қилмиш содир этган вақтда физиологик аффект ҳолатида бўлмаган” дея хулоса бергани ҳақида хабар қилган эди.

Жорий йилнинг 9 июль куни Тошкент шаҳри Яшнобод туманида фуқаро С.М. қонуний никоҳсиз яшаб келган хотини билан жанжаллашув ортидан аёлнинг биринчи турмушидан бўлган норасида фарзандини чавақлаб ўлдиргани тармоқларда муҳокамаларга сабаб бўлганди.

Қашқадарё вилояти Қарши шаҳрида 24 ёшли қиз ўз йигитини пичоқлади.

Xabar.uz нашрининг ёзишича, Э.М. (қиз) билан беш йил давомида ишқий муносабатда бўлган Ф.Н. (йигит) ота-онаси бошқа қиз топгани, шу сабаб унга уйланолмаслигини айтган.

Бундан жаҳли чиққан қиз йигит билан жанжаллашиб қолган ва ошхона пичоғи билан йигитнинг орқа елка соҳасига бир неча марта пичоқ санчиб, уни жароҳатлаган.

Суд-тиббиёт экспертизаси хулосасида Ф.Н. ҳаёт учун хавфли тарзда оғир яралангани қайд этилган.

Жиноят ишлари бўйича Қарши шаҳри суди Э.М.ни Ўзбекистон Жиноят кодексининг 104-моддасида (қасддан баданга оғир шикаст етказиш) назарда тутилган жиноятни содир қилган, деб топган.

Ҳодиса тафсилотларидан англашилишича, шифокорлар ярадор йигитнинг ҳаётини сақлаб қолган.

Судланувчи судда айбига иқрорлик билдирган. Жабрланувчи эса айбдорга нисбатан даъвоси йўқлигини билдириб, унга нисбатан қамоқ билан боғлиқ бўлмаган жазо чорасини қўллашни сўраган.

Суд юқоридагиларни инобатга олиб, 24 ёшли Э.М.га нисбатан 4 йил муддатга озодликни чеклаш жазосини тайинлаган.

Қашқадарё вилоятида жорий йил ёзида шунга ўхшаш ҳодиса рўй берган, бироқ унда айбланувчи йигит, жабрланувчи эса қиз бўлган эди.

Йигирма иккинчи июнь куни Қарши тумани Узуннаво МФЙда яшовчи йигит Қарши давлат университети ҳовлисида 4-босқич талабаси бўлган қизни ўлдириш мақсадида унга бир неча марта пичоқ билан зарба берган.

Суриштирувларда оила аъзолари қизнинг йигитга турмушга чиқишига қаршилик қилгани ушбу жиноятга сабаб бўлгани аниқланган.

Жиноят ишлари бўйича Тошкент вилоят суди бир оиланинг 5 нафар аъзосини ўлдирган ва уларни уйи билан бирга ёқиб юборган 29 ёшли эркакни умрбод қамоқ жазосига ҳукм қилди. Жазо махсус тартибли колонияда ўталиши белгиланди.

Олий суд матбуот котиби Азиз Обидов қайдича, 1995 йилда Наманган вилоятида туғилган З. С. Ўзбекистон Жиноят кодексининг 97 (қасддан одам ўлдириш), 118 (номусга тегиш), 134 (қабрни таҳқирлаш), 164 (босқинчилик) ва 173 (мулкни қасддан нобуд қилиш ёки унга зарар етказиш) моддаларида назарда тутилган жиноятларни содир этганликда айбдор деб топилган.

Мазкур жиноят иши Жиноят-процессуал кодексининг 19-моддаси талабларига мувофиқ ёпиқ суд мажлисида кўриб чиқилган.

Қонунчиликка мувофиқ, биринчи инстанция судининг ҳукми устидан тарафлар Тошкент вилоят судининг жиноят ишлари бўйича судлов ҳайъатига апелляция ёки кассация тартибида шикоят бериш ва протест келтиришга ҳақли.

Жорий йил 26 июль Янгийўл тумани Нурафшон кўчасида жойлашган хонадонда ёнғин содир бўлган эди. Хонадон кўздан кечирилганда 5 нафар (1991 йилда туғилган эркак, 1999 йилда туғилган аёл, 2021 ва 2022 йилда туғилган бола ва 2018 йилда туғилган қиз) шахснинг мурдалари турли тан жароҳатлари билан топилган.

Кейинроқ ҳуқуқ идоралари 5 нафар шахсни қасддан ўлдиришда гумонланаётган шахсни ушлаганди.

Прокуратура ахборотига кўра, судланувчи жабрланувчи эркакнинг (марҳум) қариндоши бўлган. У ушбу жиноятни ўрталарида мавжуд бўлган қарз муносабати сабаб содир этганини айтган.

Тошкент шаҳрининг Сергели, Янгиҳаёт ва Бектемир туманларида фаолият олиб борувчи ишлаб чиқариш корхоналари газдан узиб қўйилди. Бу ҳақда хабар қилган Kun.uz нашри бизнес эгалари олдиндан миллиардлаб сўмлик буюртмалар олиб қўйгани, агар газ берилмаса, улар касод бўлишидан огоҳлантирди.

“Кўплаб корхоналар фақат табиий газга таяниб ишлайди. Чекловлар шароитида муқобил энергияга ўтиш харажатлари тадбиркорларга оғирлик қилади, қўшимча вақт ва маблағ талаб этади. Якунда маҳсулот ва хизмат нархлари қимматлашиши, иш ўринлари қисқариши мумкин”, деб ёзган нашр.

“Ҳудудгазтаъминот” АЖ матбуот хизмати ахборотига кўра, “газ етказиб бериш кафолатланмаган 15 мингдан ортиқ тадбиркорлар рўйхати шакллантирилган. Улар босқичма-босқич тармоқдан узиляпти”.

Масъуллар тадбиркорларни газдан узишга асос сифатида Вазирлар Маҳкамасининг 2024 йил 31 майида қабул қилинган “Электр энергияси ва табиий газдан фойдаланиш қоидаларини тасдиқлаш тўғрисида”ги қарорини келтирган.

Ушбу қарорда об-ҳаво совиб кетган пайтда маиший истеъмолчиларни табиий газ билан узлуксиз таъминлаш мақсадида тегишли ташкилотлар билан келишилган ҳолда тўлиқ ўчириладиган, қисман ўчириладиган ва чеклов киритиладиган истеъмолчилар рўйхати шакллантирилиши белгиланган.

Айни пайтда тадбиркорлар охирги 10 кун мобайнида Тошкент шаҳрида ҳарорат манфийга тушмагани, ҳаво илиқ эканига эъибор қаратган.

Эслатиб ўтамиз, Энергетика вазири Жўрабек Мирзамаҳмудов яқинда Ўзбекистонда ҳарорат -10, -20 даражагача пасайган тақдирда ҳам аҳоли ва иқтисодиётни энергия билан таъминлаш бўйича ҳаракатлар режаси ҳозирлангани, мамлакат президенти мутасаддиларга чекловларсиз, узлуксиз электр таъминотини таъминлаш бўйича топшириқ берганини айтганди.

Бир ҳафтача аввал вазирлик матбуот хизмати иссиқхона хўжаликларига газ етказиб беришда чекловлар мавжудлигини рад этиб, “иссиқхона эгалари белгиланган тўловларни амалга оширган ҳолда табиий газдан фойдаланиш имкониятига эга” экани ҳақида баёнот берганди.